أهلا يا اصدقاء ! النهارده هكلمكم عن روتين قبل النوم لتحقيق الاهداف ، هيكون عبارة عن عادات بسيطة نعملها قبل النوم ، العادات أو الخطوات دي هتساعدنا جدًا اننا نجهز لليوم اللي بعده ويبقى يوم مليان انجازات
ليه مهم يبقى عندنا روتين قبل النوم وخطوات نعملها كل يوم بالليل ؟
مش هكذب عليكم واقولكم ان طول عمري كنت منظمة وماشية ع روتين ، لكن بما اني بحاول الايام دي اظبط نظام لحياتي كـ سيدة بتشتغل من البيت وعندي اهداف بحاول احققها وحاجات بحاول انجزها ، وكتير جدا بيكون قدامي صعوبات وساعات كسل وتسويف ، فـ كان لازم احط نظام أو روتين امشي عليها كل ليلة ، انا في العادي كن بنام متأخر لو خلصت اللي ورايا بفضل ماسكة الموبايل في السرير قبل انوم اقلب فيه لحد ما ازهق أو الموبايل يفصل ، فـ اقرر اني انام واصحى تاني يوم مش واخدة كفايتي من النوم ، عشان كدا حسيت ان الحياة كدا صعبة اوي واني لازم اجي ع نفسي واجبر نفسي اني امشي ع روتين لو فعلا عايزة انجح واحقق كل اللي نفسي فيه
اختاري الروتين الانسب ليكي
أفضل روتين في العالم هو الروتين الانسب ليكي ، لحياتك وظروفك انتِ ! مش اللي انا ماشية عليه أو اللي فلانة بتعمله ، خدي الحلو من كل حد وطوعيه وشكليه عشان يناسب حياتك انتِ
انا كمان قعدت اقرا كتير واشوف الناس بعمل ايه كـ روتين مسائي يساعد على زيادة الانجاز والانتاج واخترت منهم الانسب ليا ولظروف حياتي
روتين قبل النوم لتحقيق الاهداف والانجاز اكتر
الخطوة الأولى: تحديد 3 مهام لليوم اللي بعده
خطوة مهمة اوي اننا نحدد 3 مهام عايزين ننجزهم وننفذهم تاني يوم ، المهام دي يكون ليها علاقة بمجال شغلنا وتطوير نفسنا ، مهام تساعدنا نحقق أهدافنا ونوصل لأحلامنا
المهم اننا منزودش اوي في المهام ، الافضل انهم يكونوا مش اكتر من 3 عشان منصعبهاش ونعقدها ع نفسنا ، وضروري تكون مهام محددة ومش مركبة ، يعني المهمة تكون اننا نعمل التصميم ده او نكتب البوست ده ، لكن مش مثلا نجدول محتوى انستجرام ، لأن جدولة محتوى انستجرام فيها اكتر من خطوة زي اننا نختار الصور اللي هننشرها وخطوة كمان هى اننا نكتب الوصف او الكابشن اللي هيتكتب تحت كل صورة وهكذا دي كدا مهمة مركبة ، كن لو كل ده جاهز وناقص بس نحدد المواعيد بتاعت البوستات ساعتها دي تبقى مهمة واحدة ، وكنت نزلت قبل كدا تحدي تحديد المهام قبلها بيوم وكنت بشارك المهام معاكم كل ليلة تقدروا تشوفوا التحدي من هنا
الخطوة التانية: مفيش شاشات قبل النوم
بما اني كنت بسهر بالليل وبتأخر في النوم عشان بقعد اقلب في الموبايل واقلب في السوشيال ميديا من باب الفراغ ومن غير اي سبب كدا فـ قررت ان قبل النوم بساعة مش همسك أي موبايل أو ابص في أي شاشة الكترونية من أي نوع وتكون الساعة اللي قبل النوم دي بتاعتي وبس ، ساعة زي أيام زمان من غير تكنولوجيا وأي حاجة تلهيني وتأخر وقت نومي
الخطوة التالتة: تنضيف وترويق لمدة 5 دقايق
قبل النوم ولمدة 5 أو 10 دقايق بختار منطقة صغيرة مش كبيرة وبظبط الـ
Stop watch
بتاعت الموبايل ع 5 أو 10 دقايق وارتب واروق أو انظف مكان ما في البيت ، ممكن المكتب ، اوضة المعيشة ، جزء من المطبخ ارجع مثلا الاطباق والحلل المغسولة بعد ما نشفت في مكانها ، هو آه جزء بسيط من البيت بس بيفرق كتير اوي مع الوقت
الخطوة الرابعة: ربع ساعة للعناية بالنفس
قبل النوم حلو انه يكون في ربع ساعة نهتم فيها بنفسنا ، الربع ساعة دي بتكون من ضمن الساعة اللي مفيهاش شاشات
ساعات بعمل فيها ماسك لوشي ، ممكن اعمل فيها روتين بسيط للعناية بالبشرة ،لأن لو في يوم كسلنا نغسل وشنا بالغسول الصبح ممكن ميبقاش مهم اوي ، لكن الروتين بتاع بالليل أهم بكتير ، لأن بشرتنا طول اليوم بتتعرض لاتربة وحاجات تلوثها فـ مهم نهتم بيها وننضفها كويس بالليل
الربع ساعة للعناية بالنفس ممكن نهتم فيها بنفسنا ، نشرب مشروبنا المفضل ، نقرا كتاب أو مجلة ، نعمل أي حاجة للترفيه ع نفسنا وتكون حاجة بسيطة ومش بتاخد وقت طويل
الخطوة الخامسة: تمرين بسيط لراحة الجسم
آخر خطوة معانا في روتين قبل النوم هى عمل سترتش وتمارين لشد الجسم التمارين دي بتكون بسيطة بس بتفرق جدا عشان نريح جسمنا كله ، بتخلي الجسم يتشد ويتفرد وبالتالي ننام احسن وده بيريح ضهرنا وباقي عضلات جسمنا جدا عشان احنا اغلب اليوم بنكون يا اما قاعدين بشكل غلط فـ جسمنا محتاج يرتاح وعضلاتنا محتاجة تتفرد بشكل مظبوط
كمان بحب اعمل تمرين بلانك ، انا حلم حياتي اني اعرف اعمل بلانك لفترة طويلة ، عشان كدا بحب أعمل بلانك كل يوم بالليل قبل ما انام يوم اوصل لـ نص دقيقة يوم اقدر اعمل بلانك لفترة اطول وهكذا ، انا بحب تمرين البلانك عشان سهل وبيشد عضلات كتيرة في الجسم ، وكنت من فترة عملت تحدي اسبوعي اننا نعمل بلانك كل يوم تقدروا تشوفوا التحدي من هنا
وبكدا اكون حكيت لكم على خمس خطوات أو عادات بحب اعملهم في روتين قبل النوم وده بيساعد جدا في اننا ننجز اكتر عشان هننام بشكل افضل وهنصحى واحنا عارفين هنعمل ايه تاني يوم
لو عجبكم البوست متنسوش تشاركوه مع اصدقائكم وقولوا لي في الكومنتات ع عادة بتحبوا تعملوها قبل النوم
.
شكرًا عشان وصلتوا للنقطة دي وإلى اللقاء في بوست جديد
يلا نبقى أصدقاء هناك كمان
اخترت لك