مع بداية كل سنة الحماس بيزيد والأحلام بتكبر ، وبيبقى عندي طاقة كبيرة اني اخطط وانظم حياتي بشكل أكبر ، والتزم بعادات صخية اكتر واخطط لأهداف اكتر واسعى ورا تحقيقها ، السنة دي حبيت اختار 23 هدف نفسي احققهم في السنة الجديدة 2023 إن شاء الله
في الفيديو اللي فات خططت لعام 2023 وكتبت الـ 23 هدف من خلال نوشن ، والنموذج اللي استخدمته تقدروا تحملوه وتستخدموه للتخطيط للسنة الجديدة بشكل مجاني ، من خلال الزرار اللي في آخر البوست
خطتي للعام الجديد 2023 :
السنة دي حابة اني اخطط لها بشكل ربع سنوي ، يعني بقسم السنة لأربعة ارباع ، كل 3 شهور عبارة عن ربع سنة وده بالتفصيل بيكون ازاي ؟
- الربع الأول : يناير ، فبراير ومارس
- الربع الثاني : ابريل مايو ويونيو
- الربع الثالث : يوليو اغسطس وسبتمبر
- الربع الرابع : اكتوبر نوفمبر وديسمبر
كل ربع منهم بخطط له بشكل منفصل ، وده لأن السنة 12 شهر 365 يوم وربع ، ودي فترة طويلة وكبيرة جدًا ومليانة أحداث ومتغيرات ومفاجآت فـ صعب جدًا ومش عملي اننا نخطط للمدة الطويلة دي كلها في بدايتها
مراجعة الأهداف والخطة أول بأول :
من أهم العوامل اللي بتساعد أي خطة انها تنجح انه يكون في مراجعة أول بأول ، بالظبط كدا زي ما يكون عندنا مشروع ضخم ، مركز تجاري Mall مثلًا ، عشان المركز التجاري ده ينجح ويستمر في نجاحه لازم يكون في صيانة بشكل دوري عشان لو في أي مشكلة تتحل ونحاول نتجنب إنها متحصلش تاني
نفس الكلام بالنسبة لخطة وأهداف السنة الجديدة ، كل فترة لازم مراجعة ، ونشوف ايه اللي عرفنا ننفذه وايه اللي معرفناش ، والحاجات اللي معرفناش ننفذها ؛ ايه المشاكل اللي ظهرت قدامنا خليتنا منعرفش نمشي على خطتنا مظبوط
التحديث أول بأول :
ومعاكم هنا هراجع على الخطة بتاعتي ، أول بأول وهقولكم كل شهر ايه الحاجات اللي نفذتها وايه الحاجات اللي اجلتها وهعمل تقييم للخطة معاكم أول بأول ، وأي هدف خلاص خلصته أو شغالة عليه هتلاقوني كاتبة عنده انه تم تنفيذ الهدف ، أو اني لسه شغالة عليه ، وكل التفاصيل هتلاقوها مذكورة زي اشتغلت على الهدف في أي شهر ولمدة قد ايه وهكذا ، يعني الخلاصة ان البوست ده هيكون متجدد وكل شوية فيه آخر التحديثات
امتى هنفذ الأهداف والعادات دي ؟
كل الأهداف دي مش هنفذها واشتغل عليها في أول شهر ، في أهداف ، هقسمهم على مدار الـ 12 شهر ، وفي أهداف منهم هتخلص بمجرد ما اعملها ، يمكن تاخد يوم أو يومين ، وفي أهداف تانية ممكن استمر شهور في اني اشتغل عليها
أهدافي لعام 2023 :
أهداف للتطوير والتعلم الذات :
اطور من اللغة الانجليزية بتاعتي : الانجليزي بتاعي إلى حد ما كويس الحمدلله ، لكن محتاجة اني احسنه وخصوصًا من ناحية مهارة التحدث Speaking Skill ، لأن مفيش حد امارس معاه اللغة الانجليزية واتكلم معاه بيه ، فـ من أهدافي السنة دي إني الاقي طريقة امارس بيها اللغة كـ تحدث ، بحيث لما اتكلم ميبقاش في أي تردد أو لجلجة وميبقاش في خوف أو خجل من اني انطق أو اقول حاجة غلط
اتعلم Ui/Ux Design : من المجالات اللي نفسي اتعلمها ، وقررت اني ادي نفسي فرصة اني اتعلمه السنة دي ، وبالعربي Ui : User Interface معناها تصميم واجهات المستخدم ، و Ux : User Experience وهى تجربة المستخدم ، عندي فضول كبير جدًا تجاه المجال ده وعندي فضول اتعلمه ، حاسة اني ممكن ابدع فيه
ارسم يومين في الاسبوع : زمان كنت بحب الرسم جدًا ، قبل ما التكنولوجيا تظهر في حياتنا ابلاشكل الرهيب ده ، كنت بحب الرسم على الورق ، بعد ما الدنيا اتطورت وظهر الرسم الورقي ولحد دلوقتي بستمتع جدًا لو رسمت أو لونت بألوان من أي نوع ، اعتقد اني لو رجعت ارسم تاني ممكن اعمل حاجات بالرسومات بتاعتي دي ، احولها لرسومات رقمية مثلًا أو استفيد بيها بشكل ما
قراءة كتاب واحد على الأقل كل شهر : أنا بحب القراءة جدًا وممكن تشوفوا كتبي المفضلة في مكتبتي كمان ، هتلاقوها كلها كتب مفيدة وملهمة جدًا ، وهدف من أهدافي السنة دي اني اقدر اخلص كتاب واحد أو كل شهر إن شاء الله
أهداف خاصة بالشغل :
المدونة : المدونة أو الموقع بتاعي ده كان حلم من أحلامي زمان ، ان يبقى عندي موقع ، وزوار يقروا المقالات اللي بكتبها ، ويتفاعلوا معايا ويقولوا لي رأيهم ونستفيد من آراء ونصايح بعض ، لكن طبعًا ساعات بكون مقصرة في نشر المحتوى على الموقع ، عشان كدا من أهم 2023 اني اهتم بالمدونة وانتظم في نشر المحتوى عليها
ولأن الهدف لزم يكون محدد وله تفاصيل ، يعني مينفعش اكتفي فقط بإني اقول ” اهتم بالمدونة” كـ هدف في 2023 ، لازم اقول تفاصيل محددة أكتر ، فـ أهدافي بالنسبة للمدونة كالتالي :
- نشر مقالين كل أسبوع
- زيادة في عدد الزوار للضعف ، وده عن طريق اني اخدت Screenshot لاحصائيات المدونة في شهر ديسمبر 2022 ، وهتبقى دي الاحصائيات اللي هقارن بيها كل شهر ، لحد ما اوصل لهدفي وان عدد الزوار يوصل الضعف
تحديث : الهدف ده بدأت بالشغل عليه في شهر فبراير ، وده عن طريق كذا خطوة أخدتها :
- حددت يومين في الأسبوع وهما الأحد والأربعاء عشان انشر فيهم مقالات جديدة على المدونة
- بقيت انشر روابط المقالات دي على اليوتيوب وقناتي على التليجرام وكمان في ستوري انستجرام عشان ازود الزوار للمدونة
انستجرام : هدفي في انستجرام اني انشر محتوى بشكل منتظم ، فـ اللي عايزة اعمله هو :
- نشر 3 حاجات جديدة كل أسبوع
- نشر على الأقل 6 ستوري في اليوم
اليوتيوب : بالنسبة لليوتيوب حابة اني انتظم أكتر في نشر الفيديوهات واني اركز اكتر على المحتوى اللي بيعجب المشتركين في القناة ، ومن ضمن الحاجات اللي عايزة اعملها هى :
- نشر 2 فيديو كل أسبوع
- نشر 3 شورتس Shorts كل أسبوع
انستجرام الاكونت الشخصي : لو متعرفوش فـ انا عندي حساب انستجرام تاني شخصي ، بنشر فيه حاجات مختلفة شوية عن اللي بنشرها في تحفة ، منتجات اشتريتها وعجبتني ، خطوات بتساعدني اوازن بين حياة الشغل والبيت ونفسي وهكذا ، لحد دلوقتي بنشر عليه ستوريز Stories فقط ، لكن ناوية انشر عليه محتوى ان شاء الله، لسه بفكر في شكل المحتوى وطريقة تقديمه ، وحابة مطولش اوي في خطوة التفكير والتخطيط دي وابدأ بنشر المحتوى عليه
خطتي للمحتوى بتاع الاكونت الشخصي هى كالتالي :
- نشر 3 حاجات جديدة كل أسبوع
- 4 ستوري كل يوم
تحدي جديد كل شهر : من الحاجات اللي نفسي اعملها ان كل شهر يكون في تحدي جديد ، له علاقة بالتصميم ، السوشيال ميديا أو أي مهارة من اللي بنتكلم عليهم ، تحدي تقدروا تشاركوني فيه ونستفيد كلنا منه
تحديث : بدأت بنشر أول تحدي بالفعل في نهاية شهر يناير 2023 الحمدلله
منتج رقمي جديد كل شهر : من الحاجات اللي بستمتع وانا بعملها جدًا هى المنتجات الرقمية ، لحد دلوقتي عندنا اكتر منمنتج رقمي متاح للشراء زي :
- خلفيات لستوري انستجرام – أشكال متنوعة وتصاميم وألوان مختلفة – تناسب جميع الأذواق
- Instagram Story – ستوري للصلاة على النبي لانستجرام وفيسبوك
- Duaa Story – ستوري أدعية لزيادة التفاعل على انستجرام
حابة إني كل شهر اطلق منتج رقمي جديد ان شاء الله كل شهر
تصميمات أو كولكشن جديد كل شهر : من الحاجات اللي بعملها بردو هى تصاميم من تصميمي ببيعها على براويز في تحفة شوب ، كل فترة بنزل مجموعة Collection جديد ، حابة ان يبقى كل شهر في مجموعة تصاميم جديدة
انشر كورس اونلاين
أهداف لحياة صحية أكتر :
آخد فيتاميناتي كل يوم : من الحاجات اللي بهمل فيها الفترة الأخيرة هى فيتاميناتي ، وان شاء الله مع بداية السنة الجديدة هحاول التزم بيها
تحديث : في آخر شهر فبراير 2023 روحت زيادة للدكتور ، وكتب لي على فيتامينات جديدة آخدها وبدأت التزم بيها الحمدلله
بلانك كل يوم : من زمان جدًا وانا بحاول التزم بالرياضة ، وفي فترة كنت بروح فيها الجيم ، وكانت من أحلى الحاجات اللي عملتها وفعلًا حسيت بفرق في لياقتي البدنية ، لكن بعد كدا الظروف مبقتش مناسبة اني اروح الجيم ، وبطلت رياضة وحاليًا مش لاقية وقت اعمل فيه رياضة ، فـ اللي بحب اعمله اني اختار تمرين مش بياخد وقت طويل واعمله كل يوم ، والتمرين اللي بحبه هو تمرين البلانك لأنه بيشد عضلات كتيرة في الجسم وعلى قد ما من بعيد يبان سهل إلا انه مش سهل خالص ، اكتبوا لي في التعليقات بتعرفوا تعملوا بلانك لمدة قد ايه ؟
أهداف للترفيه وقضاء وقت مع نفسي:
قراءة ورد قرآن كل يوم : في العام الجديد ان شاء الله هحاول اقرا ورد قرآن كل يوم ، وبحب استخدم تطبيق ختمة ، وعشان تبقى عادة ومنساش فـ بحاول اثبت ورقت قراءة القرآن بعد الصلاة عشان العادة دي ليها وقت ثابت ومقطعهاش
اشتغل تريكو : زمان كنت بحب اشتغل تريكو ، واتكلمت عن حبي للتريكو في المقال بتاع مذكرات شهر ديسمبر 2022
تحديث : في شهر يناير رجعت اعمل تريكو تاني ، وبالفعل في مشاريع مستمرة عليها ولسه شغالة فيها في شهر فبراير كمان
ازرع نباتات أكتر : انا بحب الزرع جدًا ، الزرع كان ونيسي في اكتر الأوقات اللي كنت زعلانة وحزينة فيها ، كنت بتسلى بيه وبخرج في الزراعة طاقتي ، وحقيقي فعلًا بستمتع وانا بمسك الطينة وبزرع نباتات جديدة ، واشوفها بتكبر من البذرة لحد ما تديني ثمرة ، ومن أهدافي لـ 2023 انه يبقى عندي نباتات أكتر
تحديث : بالفعل الهدف ده شغالة عليه من بداية السنة يناير 2023 ، وزرعت بذور جديدة لنباتات جديدة ، والاهتمام بالنباتات ده هدف مستمر معايا طول السنة ومش بيخلص
اشوف الشمس يوم ورا يوم : لما بشوف السما وبتعرض للشمس كل يوم الموضوع بيفرق جدًا معايا من الناحية النفسية وبيخليني في موود ومزاج أحسن ، عشان كدا مهم اوي بالنسبة لي اني اشوف السما واقف تحت الشمس حتى لو من الشباك أو البلكونة
أهداف عشان ابقى منظمة أكتر:
19. ابقى مرتبة أكتر : انا اكتر انسانة فوضوية في العالم ، بس بحاول اصلح من نفسي ، عن طريق اني اعمل جداول لتنظيم وترتيب البيت ، روتين وانظمة عشان حياتي تبقى مرتبة اكتر وبحاول استغل أي حاجة تساعدني اني اقلل الفوضى اللي في حياتي
20. فوضى وكراكيب أقل : أنا من النوع اللي بيحب يحتفظ بالذكريات ، ويفكر قبل ما يرمي الحاجة وهل ممكن نحتاجها ولا لآ والأجواء دي ، فـ عشان كدا مثبتة كل يوم أربعاء يبقى يوم خاص بالكراكيب ، سميته أربع الكراكيب ، بلف فيه على البيت وأي حاجة كراكيب أو حاجة مالهاش لازمة ااخرجها من حياتي ، يا اما ارميها لو حاجة أصلا مالهاش لازمة أو لو ليها استخدام بس انا مش محتاجاها اديها لحد محتاجها وهكذا وبتكلم على اربع الكراكيب كتير اوي في الاكونت الشخصي
21. ترتيب السرير كل يوم : ترتيب السرير كل يوم مش بس عادة بتساعدني اني ابقى مرتبة اكتر ومنظمة اكتر ، لأ دي عادة بحس انها بتأثر على حياتي كلها ، يعني اذا قدرت التزم بعادة زي ترتيب السرير كل يوم فـ ده معناه اني اقدر التزم بأي عادة تانية واحقق اللي انا عايزاه ، وده إلى جانب الفوايد التانية لترتيب السرير زي :
- لما السرير بيكون مترتب الاوضة كلها بيكون شكلها منظم أكتر حتى لو في حاجات في باقي الاوضة مش في مكانها
- ترتيب السرير بيساعدني اني مقعدش اشتغل عليه ، وبيكون بالنسبة لدماغي زي اشارة كدا ان خلاص اليوم بدأ واني مش هرجع تاني غير بالليل على النوم
22. روتين مفصل خاص بالشغل : انا بحب الأنظمة والروتين ، بتخليني عارفة يومي رايح فين ووقتي جاي منين ، ومن أهدافي لـ 2023 ان يبقى في زي جدول أو نظام مفصل للشغل في أيام الأسبوع ، يعني ابقى عارفة مثلا ان يوم الاتنين من الساعة 1 الظهر لـ 3 العصر هشتغل على كذا وانه قبل ما اقعد على المكتب اكون عارفة انا هعمل ايه ومفروض انجز ايه
23. روتين مفصل خاص بالبيت : وبما انه حياتي مليانة جوانب تانية غير الشغل ، فـ طبعًا البيت فيه واجبات ومهام بتتعمل كل يوم ، وفي مهام منها تبان انها مبتخلصش ابدًا – زي الغسيل كدا 😂 – فـ عايزة بردو ان شاء الله في 2023 اني اعمل روتين ونظام مفصل فيه مهام البيت اللي بعملها بشكل دورس زي الطبخ ، التنظيف والترويق والغسيل وغيره والجدول أو النظام ده ادمجه مع نظام الشغل ويبقى في روتين أو نظام عملاق لحياتي كلها يقلل من احساسي بالتشتت والتوهان
الحصول على نموذج Template نوشن لتخطيط العام الجديد مجانًا :
تقدروا تحصلوا على النموذج وتخططوا فيه بشكل مجاني بطريقتين :
الطريقة الأولى وهى الأسهل : وهى انكم تضغطوا على الزرار اللي جاي ده
الطريقة التانية هى انكم تعملوه بنفسكم عن طريق الشرح اللي في الفيديو اللي جاي ده ، والطريقة دي مفيدة أكتر طبعًا عشان هتتعرفوا اكتر على نوشن وتعرفوا ازاي النموذج ده اتعمل من الصفر