قصتي مع الفريلانس والشغل من البيت

اهلا بيكم في بوست جديد النهارده هكلمكم عن قصتي مع الفريلانس والشغل من البيت اونلاين

Freelancing

كان الدايمًا كان في جوايا صراع وجدل اني عايزة اقضي اكبر وقت ممكن مع عيلتي مش عايزة اصحى كل يوم بدري وانزل واسيبهم عشان اروح الشغل، بس في نفس الوقت عايزة يبقى ليا مصدر دخل مستقل، عايزة احقق المعادلة الصعبة وهى اني اشتغل ويبقى ليا مصدر دخل خاص بيا وف نفس الوقت ابقى مديرة نفسي وبشتغل وسط عيلتي ومن بيتي

الموضوع بدأ من زمان شوية من لما كنت ف الكلية .. بدأت اقرا اكتر عن الفريلانس أو العمل الحر وعرفت ان في مواقع ع النت اونلاين اقدر اعمل اكونت عليها واشتغل من المواقع دي

من باب الفراغ كدا اتعلمت برنامج ادوبي اليستريتور من فيديوهات اليوتيوب، معملتش باللي اتعلمته حاجة ف الاول غير لوجو بسيط لاسمي وبعد كدا عملت بيدج ع الفيسبوك وبدأت اعمل ديزاينات لاسامي الناس وانزلها عليها، اعمل كوفرات فيسبوك وهكذا

بعد كدا اكتشفت ان في مواقع اونلاين اقدر ابيع عليها الكلام ده

وعشان انا اخدت فترة لحد ما فهمت واكتسبت خبرة واتعلمت وبدأت اثبت اقدامي والمحتوى العربي على الانترنت مش كتير وغني، في محتوى بالانجليزي اكبر وتحسوا ان يااه احنا بعاد اوي يا لطيف ??

عشان كدا حابة اني اساعد كل بنت عايزة يبقى ليها دخل خاص ويبقى ليها بيزنس خاص، كل ست نفسها تكسب فلوس من البيت من غير ما تنزل الصبح تودي ولادها الحضانة وتروح الشغل وترجع تعبانة، عشان كدا هبدأ معاكم من الصفر خالص وكل اسبوع هنزل لكم فيديوهات و بوستات ع المدونة هنا هنمشي فيه خطوة بخطوة من الصفر أو يمكن ما قبل الصفر كمان

طريقة حقيقية تجيبوا بيها دخل، اقولكم ع كل حاجة عيني عينك مش الجو بتاع بوستات الفيسبوك تعالي اقولك ع شغلانة تقبضي منها خشروميت الف جنيه التفاصيل انبوكس

كل حاجة هنا ع عينك يا تاجر، هقولكم ع افكار كتيرة وتقدروا تختاروا اللي يناسب ظروفكم ووقتكم وتعملوه

بس دايمًا خليكم فاكرين ان الشغل يعني مجهود وتعب ومش معنى انه شغل من البيت يبقى هننام ونصحى الصبح نلاقي شوال الفلوس تحت المخدة .. لأ بردو هنتعب ونشقى بس بشكل مختلف

في ملحوظة مهمة عايزة اقولها وحاجة عايزة اوضحها وهى إن البوست ده مش عشان اقلل من قيمة اي حد بيشتغل شغل روتيني او احبطه بس يمكن يكون تشجيع لبنات كتير زيي انهم يدوروا ع فرص تناسب حياتهم ويمكن يسهل ع ناس تانية كتيرة انها تزود دخلها جمب شغلها الرئيسي

المهم نرجع لموضوعنا وقصتي مع الفريلانس والشغل من البيت ومعنى كلمة فريلانسر؛ كلمة فريلانسر يعني حد بيشتغل مع نفسه مش تبع مكان معين أو بمعنى أصح عمل حر، بدأت ع كذا موقع زي فريلانسر مستقل وخمسات لكن أول شغل جالي طلب من شخص اني اعمل له لوجو لاسمه بخط النسخ عملته لِه وكنت سعيدة جدًا الحمدلله

الشهر اللي بعده جالي اوردر كمان، الشهر اللي بعده جالي 3 اوردرات منهم اوردرين كانوا ف نفس الوقت وكنت ساعتها عندي برد وحالتي حال بس الحمدلله عرفت اخلصهم والشغل عجب الناس

بوست النهارده كان مجرد دردشة عن تجربتي الشخصية، عايزاكم تستعدوا لمجموعة  بوستات جامدة جدًا الفترة اللي جاية ان شاء الله هنتكلم فيها بشكل تقني اكتر عن كل حاجة وهتكون مفيدة جدًا فـ كونوا بالقرب