السلام عليكم و رحمة الله و بركاته النهارده هنتكلم عن حاجات هنستفيدها لما يبقى عندنا ايميل
الاول بس احب اقولكم هلا هلا في بوست جديد مبسوطة انكم بتقروا الكلام ده
نزلت فيديو ع اليوتيوب بيتكلم عن ازاي نعمل ايميل أو بريد إلكتروني لنفسنا بالتفصيل ..
ولما يبقى عندنا ايميل
ازاي نفتحه ونتعامل معاه، شوفوا الفيديو من هنا ودلوقتي يلا نبدأ البوست بتاعنا
زمان كانت الناس بتتواصل مع بعضها عن طريق الجوابات والرسايل اللي بتتبعت عن طريق البريد ونشتري ظرف وطوابع ونقعد نكتب وليلة كبيرة وف الآخر يا ترى هتوصل ولا هتضيع ف السكة
الايام دي الدنيا بتتطور بشكل فظيع جدًا وحاجات كتير جدًا بقت بتدور حوالين الانترنت والتكنولوجيا وحاجات كتير بقت سمارت موبايلات ذكية نظام معرفش ايه الذكي وهكذا
وعشان نواكب التطور السريع ده لازم يكون عندنا ايميل .. انا عارفة ان اغلب اللي هيقروا البوست ده عندهم ايميل بس انا قابلت ناس كتير جدًا لما كان يتطلب منهم الايميل ميعرفوش يردوا أو يستغربوا .. ايميل ايه ؟ ايميل الفيسبوك ؟
حتى ايام الكلية .. كان في لكل طالب ايميل الكلية عملته لينا عشان يبعتوا لنا عليه اي اخبار مهمة أو نكد ?? زي ترقبوا ظهور النتيجة.. كان في ناس كتيرة مش مفعلة الايميل ده ومش بتستخدمه خالص
عشان كدا عملت لكم الفيديو ده بشرح لكم فيه ازاي نعمل ايميل عشان نبدأ شغلنا بطريقة بروفيشنال واحترافية سواء كان الشغل ده كسب فلوس من ع الانترنت زي الفريلانس أو لو عايزين نشتري بضاعة من برة أو جوه مصر أو حتى الشغل العادي بتاعنا
شوفوا الفيديو من هنا
دلوقتي هقولكم ع 3 حاجات هنستفيدها لما يبقى عندنا ايميل
-
الاشتراك في نشرات الايميل لمواقع التسوق
وده مثال عليه موقع زي جوميا مثلا، لما تشتركوا ف النشرة بتاعته بيبعت لكم كل يوم احدث العروض وفي ايام معينة بتتلغي مصاريف الشحن الدولي ده بيتبعت لكم ف رسالة ع الايميل تستفيدوا انتوا بقى وتشتروا اللي تحبوه من بره مصر ومن غير مصاريف شحن
-
التقديم على شغل
التقديم على شغل سواء اونلاين او ع ارض الواقع بيحتاج الايميل جدا أولًا عشان تقدموا اصلا ع الشغل ف تبعتوا السي في بتاعتكم ع الايميل ثانيًا لو ردوا عليكم هتيجي لكم بردو رسالة ع الايميل كمان في مواقع البحث عن وظائف زي وظف وفرصنا و دي مواقع للبحث عن شغل لما تشتركوا فيهم بيبعتوا لكم كل اسبوع رسالة بأكتر الوظايف المناسبة ليكم يعني كأن فرصة الشغل بتقولكم انا اهو
-
متابعة احدث التطورات
في مواقع زي مثلا بيهانس انا مش بفتح الموقع ده كل يوم فـ ساعات بتيجي لي رسايل عليه الحمدلله ان الايميل موجود أول ما حد بيبعت لي رسالة ع بيهانس بتيجي لي رسالة ع الايميل ان فلان بعت لك رسالة بتقول كذا انا بقى بفتح بيهانس وارد ع الرسالة دي، ممكن تبقى رسالة مهمة وعشان انا مش بفتح بيهانس كل يوم كان ممكن افتح الرسالة دي بعد فترة طويلة جدا بعد ما يكون الموضوع راحت عليه خالص كمان الاشعارات اللي بتيجي ع بعض المواقع اللي بردو مش بنفتحها كل يوم زي لينكد ان وغيره
عشان كدا شيء اساسي دلوقتي ان يبقى عندنا ايميل وبنفتحه كل يوم نشوف ايه الرسايل الجديدة اللي وصلت لنا
فـ يلا مستنية ايه ؟
لو اتفرجتي ع الفيديو وعملتي ايميل متنسيش تبعتي لي ايميل هنا
tohfaemail@gmail.com
تابعوني الفترة اللي جاية عشان مجهزة لكم مواضيع كتيرة حلوة جدًا بإذن الله
ولحد هنا خلص بوست النهارده يا رب تكونوا استفدتوا منه وإلى اللقاء ف بوست جديد ان شاء الله
???
