من الحاجات اللي مهم يعرفها كل مصمم جرافيك ، كلنا أكيد مرينا باللحظة دي في بداية مشوارنا لتعلم تصميم الجرافيك وهى اننا نعمل تصميم وبعدين نحس ان شكله غريب أو فيه نشاز وان شكله مش زي التصاميم الاحترافية البروفيشنال اللي بنشوفها
وده لأننا في البداية مش بنبقى عارفين مبادئ تصميم الجرافيك وبنبقى مستعجلين وعايزين نتعلم بسرعة ومركزين أكتر على الجانب التقني زي تعلم البرامج اللي هنستخدمها في تصميم الجرافيك زي ادوبي اليستريتور مثلا وفوتوشوب وغيرهم
اقرأ أيضًا : كورس تعليم ادوبي اليستريتور المجاني
ليه اتعلم مبادئ تصميم الجرافيك ؟
في حكمة جميلة بتقول ان لازم نتعلم القواعد والقوانين الأول عشان نقدر نكسرها ، فـ عشان تعملوا تصاميم احترافية وتكون فيها لمسة ابداعية خارجة عن المألوف مهم انكم تعرفوا الأول ايه الخطوط العريضة وايه الأساسيات اللي بيتعمل بيها أي تصميم وبعد كدا نبدأ نبدع ونطوع في المبادئ دي بما يخدم التصميم بتاعنا
ودلوقتي بقى يلا بينا نبدأ في مبادئ لتصميم الجرافيك
مبادئ تصميم الجرافيك
1. التباين Contrast
التباين هو واحد من أهم مبادئ تصميم الجرافيك اللي لازم نهتم بيه ، وهو عبارة عن الاختلاف بين العناصر المختلفة في التصميم اللي بيخلي العناصر اوضح وظاهرة أكتر
مثال : إذا كان اللون الغالب على التصميم بتاعنا هو لون فاتح فـ مهم ان باقي عناصر التصميم يكون لونها غامق عشان تتباين وتظهر والعكس صحيح
مثال 2 : لو خلفية التصميم لونها أسود أو لون غامق ، والتصميم فيه نص مكتوب ، مهم جدًا ان النص المكتوب يكون بلون فاتح عشان يتم قراءة النص بسهولة ، على عكس لو كانت الخلفية غامقة والنص المكتوب لونه غامق فهنلاقي صعوبة شديدة في قراءة النص ده والتصميم هيكون مزعج للعين
2. التكرار Repetition
التكرار هو أداة حلوة جدا للتأكيد على فكرة معينة ، وكان بيخلي شكل التصميم موحد ومتناغم مع بعضه
التكرار ممكن يكون لأنواع مختلفة من العناصر ، زي الأشكال ، لون معين ، وكمان لنوع خط معين
التكرار مطلوب لأنه بيخلي التصميم متناسق اكتر وقلته بتحسس بالنشاز والضياع
مثال : لو التصميم بتاعنا فيه ألوان كتيرة جدًا ومفيهوش ولا لون متكرر ، وكمان كل سطر بنوع خط مختلف التصميم هتحسوا فيه بالفوضى وانه مش انيق أبدا
وده للأسف خطأ شائع بيقع فيه ناس كتيرة في البداية وهو انهم بيكونوا فرحانين بالأدوات اللي عندهم والخطوط الجديدة اللي بيحملوها وعايزين يستخدموها كلها في نفس التصميم فـ للأسف بيطلع تصميم مش متناسق ومزعج للعين
3. التناسب Proportion
التناسب من أسهل المبادئ في تصميم الجرافيك ، وهو تناسب الأحجام مع بعضها في نفس التصميم ، لأن العنصر اللي حجمه كبير بيكون سهل اننا نشوفه مقارنة بالعنصر اللي حجمه صغير
4. التسلسل Hierarchy
مبدأ التسلسل بيعتمد على إن العناصر الأكثر أهمية في التصميم تكون ظاهرة اكتر من العناصر الأقل أهمية ، وده هيساعد ان رسالة التصميم توصل لأي حد بيشوفه
مثال : العناوين الرئيسية في أي تصميم بتكون أوضح من النص الأكبر المكتوب
5. التناغم Rhythm
وده بردو من المبادئ السهل فهمها في مبادئ تصميم الجرافيك ، التناعم هو ان العناصر والمسافات اللي بينها والنصوص كلها تكون متواترة ومتناغمة مع بعضها
والتناغم في منه أنواع زي التناغم المنتظم والتبادلي والتناغم العشوائي
6. التوازن Balance
أي تصميم جرافيك بيكون مكون من عدة عناصر ، كل عنصر من دول بيكون له وزن ، الوزن ده بيجي من حجم لون وملمس العنصر نفسه
وعشان نحقق التوازن مينفعش نحط كل العناصر اللي وزنها تقيل في مكان واحد أو جانب واخد من التصميم
مثال : لو التصميم بتاعنا فيه دائرة ومربع والاتنين لونهم فاقع وحجمهم كبير وملمسهم خشن مينفعش نحط العنصرين دول في نفس المكان ، الأفضل نحطهم بعيد عن بعض او نخلي وزن عنصر منهم خفيف وعنصر منهم تقيل
7. التركيز والتوكيد Emphasis
كل تصميم بيكون فيه عنصر مهم هو ده الهدف من التصميم ، العنصر المهم ده هو اللي لازم ينطبق عليه مبدأ التركيز والتوكيد
ببساطة شديدة اكتر عنصر مهم في التصميم هو اللي المفروض أول حاجة عين اللي بيشوف التصميم تيجي عليها في التصميم أو المشروع كله
مثال : لو بنصمم اعلان لشركة اتصالات عاملة عرض على الدقيقة وليكن بـ 10 قروش ، أكتر حاجة عايزينها تلفت نظر العميل أو المارة في الشوارع هو العرض القيم إن مثلا الدقيقة بـ 10 قروش ، ودي الجملة اللي التصميم هيركز ويوكد عليها ، على عكس مثلا جملة “ تطبق الشروط والأحكام “ مش مهم بالنسبة لي انها تلفت نظر اللي بيشوف التصميم من أول نظرة
8. النمط أو الباترن Pattern
النمط أو الباترن في تصميم الجرافيك هو تكرار بعض العناصر في التصميم بحيث لما العين تشوف التكرار ده يلفت نظرها ويجذبها بشكل يخدم التصميم
اقرأ أيضًا : تحدي تصميم الباترن وازاي نكسب من الباترن فلوس
9. المساحة البيضاء White Space
المساحة البيضاء وساعات بيتقال عليها المساحة السلبية negative space
وهى عبارة عن الجزء الفاضي من التصميم ، اللي مفيش فيه أي عناصر جرافيك خالص أو نصوص
المساحة البيضا مهمة جدًا للتصميم ، وبتخلي التصميم يتنفس ويكون مريح للعين اكتر
10. الحركة Movement
مبدأ الحركة في تصميم الجرافيك المقصود بيه تفاعل وحركة العين لما تشوف التصميم ، وده يرجعنا لمبدأ التركيز أو التوكيد
اللي اتفقنا فيه إن أهم حاجة في التصميم لازم العين تيجي عليها الأول وبعد كدا العين تيجي على الأقل أهمية وهكذا
11. التنوع Variety
مبدأ التنوع ممكن نطبقه بالتنويع في اختيار الالوان الأشكال العناصر الخطوط والصور المستخدمة في التصميم ، عشان التصميم كله ميبقاش ممل وكأنه كله قطعة واحدة جامدة على بعضها
وهنا لازم نأكد ان مهم يكون في توازن بين مبدأ التنوع ومبدأ التكرار ، عشان لو نوعنا زيادة عن اللزوم في العناصر المستخدمة في التصميم هنلاقي التصميم قلب نشاز وفوضى وبقى مزعج جدًا للعين
12. الوحدة Unity
مبدأ الوحدة في تصميم الجرافيك معناه ان كل العناصر المستخدمة في التصميم متناسقة ومتناغمة مع بعض ، وكلهم بيشتغلوا مع بعض عشان يوصلوا الهدف والمعنى من التصميم
وده بيخلي التصميم شكله احترافي اكتر ومتناسق وجذاب
كل المبادئ اللي ذكرناها مهم اننا نعرفها كمصممين حرافيك ونحاول نطبقها في المشاريع اللي بنشتغل عليها عشان يبقى شكلها احترافي اكتر ،
وزي ما قلنا لازم نتعلم كويس القواعد عشان نقدر نكسرها
شاركوني في التعليقات ايه المبدأ اللي كنتوا تعرفوه من قبل ما تقروا المقالة دي وايه كان أول مرة تسمعوا عنه ؟
.
وشكرًا عشان وصلتوا لهنا ودمتم بألف خير