في خبر انتشر في الساحة من كام يوم وكل المصممين مالهمش حديث غير عنه، واعتقد انه الخبر ده بسببه شركة ادوبي هتخسر ماديًا مبالغ ضخمة واشتراكات كتيرة هتتلغي
بتخيل حال الناس اللي بتدير شركة ادوبي دلوقتي ! طالعين يجروا مش عارفين يعملوا ايه ! هما فعلًا في مأزق وورطة كبيرة
الخبر الجديد المُبهر
الخبر الجديد هو إطلاق affinity studio أو بيسموه Affinity all-in-one
مش قادرة اوصف لكم قد ايه فرحت بالخبر ده حدا وحسيته من افضل الاحداث اللي حصلت من ساعة ما بدأت في مجال التصميم
وأحب اشكر صديقتي الجميلة جهاد 💖 لأن هى أول من بلغني بالخبر بتاع affinity !
شكرًا جهاد 💖
القصة من البداية خالص
أول ما بدأت اتعلم تصميم اتعلمت ادوبي اليستريتور ، وطبعا هو برنامج قوي جدا جدا ، ولما بدأ يبقى عندي عملاء بالفعل اشتركت في ادوبي وبقيت بدفع الاشتراك كل شهر لكن الموضوع كان بيستنزفني جدا لأن أسعار الاشتراك مبالغ فيها
البحث عن بديل
في بداية ٢٠٢٥ أو يمكن قبلها بشوية قررت اني مش هدفع ولا قرش لادوبي ومش هشترك معاهم وكمان مش هستخدم برامجهم لأني مؤمنة إنه حرام استخدم كراك وانا بكسب من استخدام البرنامج المسروق ، ربنا يرزقنا الرزق الحلال الطيب جميعا يا رب ، قولوا آمين
قررت إني ابحث عن بدايل اعمل بيها شغلي ، وبالفعل استخدمت كذا بديل منهم
- انك سكيب Inkscape كبديل لادوبي اليستريتور في التصاميم
- فوتوبيا Photopea كبديل لفوتوشوب في التعديلات على الصور
- دافنشي ريسولف Davincci Resolve بدل ادوبي بريميير للمونتاج
- وطبعًا كانفا Canva معايا كدا كدا بستخدمه في حاجات كتيرة جدًا
في الوقت ده كنت سمعت عن افينيتي Affinity اللي بالفعل كنت بفكر فيه كبديل قوي لبرامج التصميم بتاعت ادوبي
حكاية برامج افينيتي Affinity :
من فترة في شركة اسمها Serif بتعمل برامج softwares اطلقت ٣ برامج :
Affinity Design :
ده زي ادوبي اليستريتور ، بيشتغل بشكل اساسي على الفيكتور
Affinity photo
بيشتغل بشكل اساسي على البيكسل ويعتبر بديل لادوبي فوتوشوب
Affinity publisher
يعتبر بديل لادوبي ان ديزاين Indesign ، وبيستخدم اكتر لتصميم الكتب والمجلات
الميزة المختلفة في برامج Affinity
الميزة العظيمة وقتها لافينيتي انه مفيش اشتراك شهري ، انت بتشتري البرنامج مرة واحدة فقط ، بتدفع قيمة البرنامج مرة واحدة بس ، والبرنامج بيبقى معاك تقدر تستخدمه سنين مع مميزات رهيبة وتستخدمه زي ما تحب بشكل شخصي أو تجاري وتقدر تطلع بيه شغل احترافي جدا
والاقوى كمان ان كان في منه ٣ نسخ ، نسخة للويندوز ونسخة للماك ونسخة للايباد يعني مفيش احلى من كدا
ومع حلول شهر نوفمبر كان بينزل خصم على اسعار البرامج بمناسبة خصومات الجمعة البيضا
وده اللي خلاني افكر بشكل جدي انه اشتري افينتي ديزاين الشهر ده لكن اللي حصل كان مفاجأة
مفاجأة Affinity اللي غيرت كل حاجة
من فترة فصيرة افينيتي شالت كل صفحات الدفع بتاعتها من على الويب ومبقاش متاح اصلا اني الاقي صفحة الاسعار والدفع
وصرحوا ان في مفاجأة ضخمة هيعلنوا عنها يوم ٣٠ اكتوبر 2025
طبعًا كل المصممين قاعدين مترقبين يا ترى ايه المفاجأة ؟!
لحد ما تم الاعلان إن تم دمج الـ 3 برامج بتوع Affinity في برنامج واحد وهو Affinity Studio ، وطبعًا مش هى دي المفاجأة ! المفاجأة الحقيقية إنه البرنامج ده
مجـــــــــــــــــــــــــــــــــــــــــــــاني !
اتصدمتوا واندهشتوا زيي مش كدا ؟! في بعض المميزات اللي ليها علاقة بالذكاء الاصطناعي دي هتكون مدفوعة ، وخدوا بقى المفاجأة اللي بعدها ! اعتقد عايزين تقولوا لي كفاية مفاجآت بقى يا سلمى !
ان لو معاكم اشتراك كانفا برو Canva Pro ، فـ المميزات المدفوعة دي كدا خلاص معاكم عادي جدًا ، طب ايه علاقة كانفا بالموضوع ؟ كملوا وهقولكم كل حاجة
تفاصيل التفاصيل :
اللي حصل بالتفصيل الممل ان شركة Canva في شهر مارس 2024 اشترت برامج Affinity ، بحيث يبقى مع كانفا منافس قوي لبرامج ادوبي
ومن وقتها وشركة كانفا شغالة على انها تطور في برامج افينيتي وتدمجهم في برنامج واحد وتخليه مجاني ، وده اللي يفسر ان لو معاك اشتراك كانفا برو هيبقى معاك كل المميزات اللي في افينيتي
مميزات برنامج affinity :
- برنامج واحد فيه كل حاجة
- بدل ما يكون عندك 3 برامج (Photo, Designer, Publisher)، دلوقتي كله في برنامج واحد. تقدر تنتقل بسهولة بين الرسم، تعديل الصور، وتصميم الصفحات.
- مجاني للاستخدام الأساسي
- تقدر تستخدم البرنامج الأساسي مجانًا، وتفتح معظم الأدوات بدون دفع أي فلوس إضافية. بعض الميزات المتقدمة أو أدوات الذكاء الاصطناعي ممكن تحتاج نقاط أو اشتراك مدفوع.
- أداء أسرع وأقوى
- البرنامج سريع وسلس جدًا حتى لو الملفات كبيرة.
- أدوات تصميم متقدمة وسهلة
- تقدر ترسم أشكال فيكتور، تعدل الصور، تستخدم أقنعة وطبقات بسهولة، وتتحكم في كل جزء من تصميمك بحرية.
- توافق بين الملفات
- الملفات الواحدة تقدر تفتحها في أي وضع (تصميم أو تعديل صور أو صفحات) بدون مشاكل.
- ممكن تصدر مشاريعك بسهولة، وتكامل مع بعض خدمات الذكاء الاصطناعي زي Canva.
- تحسين تجربة العمل
- أدوات جديدة لتسهيل الرسم والتحرير.
- كل العناصر (صور، خطوط) موجودة في مشروع واحد لتسهيل المشاركة أو النقل بين الأجهزة.
- تقدر تفتح ملفاتك القديمة عادي
- فتح ملفات فوتوشوب (.PSD) مدعوم بالكامل تقريبًا
- فتح ملفات إليستريتور (.AI) لأن افينيتي بيدعم معظم ملفات AI المحفوظة كـ PDF-compatible: يعني إذا الملف محفوظ بطريقة تدعم PDF، تقدر تفتحه بسهولة.
- مع الأخذ في الاعتبار إنه أكيد لو في تأثيرات معقدة ممكن متفتحش زي ما هى ويبقى في اختلاف بس أحسن من مفيش خالص
عيوب برنامج affinity
أنا لما عرفت بالخبر بتاع اطلاق برنامج افينيتي من صديقتي جهاد 💖 كان الوقت بالليل وكنت عايزة انام جدًا بس لما عرفت النوم طار من عيني وقمت بالفعل حملت البرنامج وقعدت اكتشف فيه شوية
والعيب اللي لاحظته حتى الآن هو إن البرنامج مش بيدعم الكتابة باللغة العربية ، يعني لما تيجي تكتب نص بالعربي بيطلع الخط مفروط ومقلوب يعني لما جيت اكتب سلمى اتكتبت لي كدا : ى م ل س
أنا كنت فاكرة ان دي مشكلة وليها حل من اعدادت البرنامج بس طلع ان المشكلة دي لسه المطورين بتوع البرنامج شغالين على حلها واعتقد هتتحل في أقرب وقت
وهى حاليًا ليها حل إننا نكت النص في برنامج تاني وناخده نضيفه في افينيتي كـ فيكتور بصيغة .svg مثلًا ونعدل عليه كفيكتور أو Outline ، مش كـ نص
وبس كدا دي كانت كل حاجة لـ بوست النهارده ، لو وصلتوا لحد هنا فـ انتم فعلًا أبطال ، ولو عندكم أي اسئلة اكتبوها لي في التعليقات ودمتم بألف خير