أهلًا وسهلًا بيكم يا أصدقاء في مذكرات شهر ديسمبر 2022 ، حبيت اشارككم في البوست ده أهم الأحداث والحاجات اللي انجزتها والحاجات اللي جربتها خلال شهر ديسمبر 2022
ونبدأ أول حاجة بالشغل:
بالنسبة للمحتوى اللي بقدمه على اليوتيوب : قدرت الحمدلله إني انشر فيديوهين كل أسبوع على قناتي على الوتيوب ، بدأت في نشر دروس تعليم برنامج انك سكيب inkscape البديل المجاني لادوبي اليستريتور ، اللي بنستخدمه في تصميم الجرافيك ودي من الفيديوهات اللي كان نفسي ابدأ فيها وبقالي فترة بخطط لها عشان زي ما انتم عارفين ان اليستريتور برنامج مدفوع ، ومش كل الناس سهل عليها انها تبدأ التعلم ببرنامج مدفوع ، فحبيت اني اشيل العقبة دي بتاعت الدفع والاشتراك واني اعلم من البداية برنامج مجاني ، حسيت ان ده هيساعد ناس كتير
ولو بتتابعوني من زمان فـ أكيد عارفين إن أنا بنظم حياتي كلها على نوشن Notion ، ناس كتيرة كانت بتطلب مني انزل دروس أو شرح لنوشن ، فـ نشرت كذا فيديو عن نوشن فيهم شرح لاستخدام نوشن نفسه ، ونموذج مجاني للتنظيم للعام الجديد وغيره
الفيديوهات اللي نزلت خلال شهر ديسمبر :
بالنسبة لانستجرام والمحتوى اللي بقدمه هناك : نشاطي على انستجرام كان أكتر في الستوري سواء في تحفة أو في حسابي الشخصي ، شاركت معاكم تفاصيل كتيرة من خلف الكواليس سواء بالنسبة للشغل أو العناية بالبيت والزراعة وهواياتي اللي بحب امارسها خلال اليوم
منتجات حبيتها
كريم Care & More
جربت الكريم ده من براند مصري اسمه Care & more الكريم برائحة الفراولة ، وفعلًا ريحته حلوة جدًا وترطيبه حلو اوي ، ريحته جميلة تشجع ان الواحد يستخدمه كل شوية
شاي ديلما بالفراولة :
في العادي انا مش من محبين الشاي ، لكن من بعد ما جربت الشاي اللي بنكهات وانا بقيت بحبه ، جربت قبل كدا الشاي اللي بنكهات بتاع أحمد تي Ahmad Tea ، والشهر ده جربت شاي الفراولة من ديلما Dilmah ، عجبني شاي ديلما اكتر الحقيقة وتقريبًا بقيت بشرب شاي ديلما كل يوم سواء اللي بالفراولة أو الخوخ ، أو الشاي الأخضر بالنعناع المغربي ، حببوني في الشاي فعلًا
الهوايات :
وانا في المدرسة ، كنت ساعتها في إعدادي ، كان في حصص في مادة الاقتصاد المنزلي المدرسة كانت بتعلمنا فيها تريكو ، الوحيدة اللي كانت بتعمل تريكو في عيلتنا كانت جدتي الله يرحمها ، باقي العيلة بتعمل كروشيه وما شاء الله محترفين فيه ، وبما اني حاولت اتعلم كروشيه كتير وفشلت فشل ذريع فـ قلت خلاص فرصتي بقى اتعلم تريكو ، محدش بيعرف يعمله غير تيته وحسيت انها هتبقى حاجة مميزة لما ابقى بعرف اعمله
لما حكيت لجدتي ساعتها ادتني ابرتين تريكو بتوعها لونهم ذهبي ، وروحت بيهم المدرسة عشان اتعلم من ميس نادية – مدرسة الاقتصاد المنزلي – حاولت اتعلم منها لكن النتيجة كانت فشل ذريع ومعرفتش اتعلم حاجة
وقتها التعلم من الانترنت مكنش منتشر زي دلوقتي ، وجالي احباط ، والكل قالي اني بمسك الخيط جامد وان ايدي مشدودة ومتشنكة ، سواء وانا بتعمل تريكو أو كروشيه ، فضيتها سيرة وقلت كار الصوف والتريكو والكروشيه ده مش كاري ، بس فضلت محتفظة بإبر التريكو بتاعت تيته الله يرحمها
لحد ما بقيت في جامعة وفتح في شارعنا محل بيبيع كل مستلزمات الخياطة والتريكو والكروشيه ، خيوط زراير ابر وكل ما تتخيلوه
قلت اما ادور كدا على اليوتيوب واشوف درس تريكو يمكن اعرف اعمل حاجة ، ودرس ورا درس بدأت اتعلم ولقيت نفسي عارفة اعمل تريكو ، والابر الذهبية بتاعت تيته اللي يرحمها استخدمتها واشتريت كمان ابر جديدة احجام مختلفة
عملت كوفيات ، طاقية وحاجات تانية كتيرة ، وكنت الحمدلله فرحانة اني بعرف اعمل حاجة مش كل الناس بتعملها ، وكنت فخورة اني بعرف اعمل التريكو اللي جدتي الله يرحمها كانت بتعمله
لحد سنة 2019 ما بدأت ولظروف ما وقفت تريكو وشيلت الابر والخيوط كان وقتها الظروف مش مناسبة اني اشتغل تريكو وكان وقتي مشغول جدًا
الأيام دي لقيت شوية وقت فاضي ، وبقيت حابة اني ارجع للتريكو تاني ، ويبقى عندي هواية اطلع فيها طاقة ، بس كنت شايلة هم اني هبقى ناسية الغرز ومسكة الابرة
طلعت خيوطي وابري وفتحت نفس دروس التريكو اللي كنت اتفرجت عليها زمان ، واتفاجئت ان ايدي لسه فاكرة الغرز ، ولسه فاكرة مسكة الابرة بالرغم ان في سنين عدت وانا ممسكتش أي ابر وخيوط ، حقيقي فرحت اوي اني مش هبدأ من نقطة الصفر تاني
عندي هدف اني انجز شوية مشاريع بالتريكو بالخيوط اللي موجودة عندي ، يا مسهل الحال يا رب
مذكراتي في المطبخ في ديسمبر 2022:
من الحاجات اللي بحب اعملها في المطبخ هى العجين ، أي عجينة بحب أعملها سواء عجينة ونحشيها حاجة حادقة أو عجينة مسكرة ، أي عجن بحبه
وبما اننا في الشتا والدنيا برد فـ ده الوقت المناسب اننا نشغل الفرن ونتدفى جمبه
كنت شوفت من فترة فيديو لطريقة عمل فطائر الكاستر بالفراولة في قناة آية حبيب ، وبالرغم ان العجينة دي مش اسهل حاجة في العجن والافضل تتعجن بعجان بس انا معنديش عجان اساسًا ، فـ عجنتها من غير عجان عادي والحمدلله استمتعت اوي وانا بعجنها بشكل يدوي
استنيت لما كل المكونات بقت عندي ، وخصوصًا الفراولة البيض الفانيليا وبدأت اعمل الوصفة وكانت جميلة جدًا
حصل بعض الخسائر في النص بس مستلمتش وكملت 😂 جيت اعمل الكاستر ، المفروض اني بقلب صفار البيض على جمب وبعدين انزله في اللبن السخن واقلب جامد ، طبعًا الصفار نزل في اللبن واستوى – قلبي كان حاسس اساسا ان ده اللي هيحصل 🙈- كنت متوقعة – المهم مستسلمتش
ورجعت اعيد من الأول خلطت كل مكونات الكاستر على البارد ، اللبن مع صفار البيض والسكر والدقيق والنشا وبعدين رفعتهم على النار والحمدلله نجح وكانت الفطاير جميلة جدًا
وطبعًا من الأكلات الجميلة اللي بحب اعملها كل فترة هى المقلوبة الفلسطينية بالدجاج على طريقة أبو جوليا ، حلو اوي بجد واكلة فخمة ومتعوب عليها وبستمتع جدًا وانا باكلها
مذكرات حديقتي الصغيرة في شهر ديسمبر 2022:
نعناع :
اشتريت حزمة نعناع وللمرة المليون بعد الألف بحاول ازرع نعناع ، حطيته في ماية والحمدلله لأول مرة في حياتي يطلع جذور ، اخدت 3 فروع من اللي طلعوا جذور وزرعتهم في التربة وللأسف دبلوا وماتوا
سيبت باقي الفروع في الماية ، وآخر يوم في شهر 12 ، آخر يوم في السنة كلها ، زرعت الفروع اللي شكلها كويس ومطلعة جذور في التربة مرة تانية بعد ما جذورهم كترت وعلى أمل ان زراعة النعناع تنجح المرة دي ، يا مسهل الحال
بوتس:
عندي نبات بوتس داخلي – بحبه جدًا النبات ده – وكل ما يطول شوية باخد الفروع وبحطها في ماية عشان تطلع لي جذور وفي نيتي اني ازرعهم في التربة بعد كدا ويبقى عندي اكتر من نبات بوتس في البيت
الجذور بدأت تكبر بشكل كويس وبقى عندي غابة في المطبخ ما شاء الله ، كلها بوتس مزروع في ماية
وكذلك في آخر يوم في السنة ، اخدت فروع البوتس اللي طلعت جذور قوية وزرعتها في التربة ، قسمتهم على اصيصين على امل ان البوتس يكبر ويبقى حلو ، لو اللي نفسي فيه حصل والبوتس كبر وانبسط في بيئته الجديدة ، هحتفظ بواحدة منهم والتانية ههاديها لحد
فلفل من البذور :
كمان خلال شهر ديسمبر زرعت بذور فلفل رومي ، بس لسه محصلش أي انبات ، اعتقد اني اتأخرت السنة دي في الزراعة ، كان مفروض ابدأ زراعة البذور بدري شوية في شهر اكتوبر أو نوفمبر ، قبل ما الدنيا تبقى برد كدا ، البرد ده مش بيكون أفضل جو للانبات ، بس اديني بجرب وهشوف ايه اللي هيحصل
ودي كانت أهم الأحداث اللي حصلت معايا خلال شهر ديسمبر لعام 2022 ، انتم كمان شاركوني في التعليقات ، ايه أهم الأحداث اللي حصلت معاكم خلال الشهر ده ؟
دمتم بألف خير
