أهلا وسهلا يا أصدقاء ! متحمسة جدا اني اعلن عن تحدي المصممين الأسبوعي 🚀
وفي التحدي ده هنختار موضوع معين نعمل عنه تصميم كل اسبوع ، وده هيفيدكم كتير جدًا وهيعود عليكم بفايدة رهيبة إن شاء الله
موعد التحدي :
التحدي هيكون كل يوم ثلاثاء، وبشكل اسبوعي هيكون عندكم مشروع تصميم تشتغلوا عليه خلال الأسبوع
تفاصيل التحدي :
تفاصيل التحدي هتنزل في بوست منفصل هنا على المدونة كل يوم ثلاثاء ، وخلال أسبوع التحدي هنشر ريل على انستجرام فيه مشاركتي في التحدي مع شغل ٣ منكم في الريل كنوع من الدعم ليكم وشكركم على مشاركتكم في التحدي
مطلوب منكم ايه ؟
تدخلوا على المدونة يوم الثلاثاء وتشوفوا بوست التحدي وتقروا تفاصيله كويس
تشتغلوا على التحدي وتوروني الابداع والشغل الحلو بتاعكم
تنشروا شغلكم على انستجرام وتكتبوا الهاشتاج ده
#CREATEWITHTOHFA
وتعملوا لي منشن
نشر أعمالكم :
هنشر أعمالكم اللي هتشاركوا بيها في أكتر من مكان ، ٦ منكم شغلكم هنشره هنا على المدونة و٣ في الريل اللي هينزل على انستجرام وفيسبوك ويوتيوب
ليه تحدي اسبوعي ؟
على مر الزمان في حقيقة مهمة جدا وثابتة وهى Practice makes perfect اللي بيتدرب اكتر وبيطبق ويشتغل اكتر دايما هتلاقوه الاكثر مهارة
الجملة دي نقدر نطبقها في اغلب المجالات اذا مكانتش كلها
أي شخص بيحاول يطور مهارة معينة ويتقنها لو جينا نقارن شغله في اليوم رقم ١ وشغله في اليوم رقم ١٠٠ اكيد هنلاقي فرق رهيب وتحسن للأفضل
في كتير منكم لسه في بداية الطريق وعايز مشاريع يشتغل عليها ويبقى عنده أعمال يضيفها للبورتوفوليو بتاعه وفي منكم عنده وقت فاضي وعايز يسلي وقته بحاجة مفيدة
وعشان كدا كان التحدي الأسبوعي للمصممين
مهارات مختلفة لاحتراف التصميم
كل مصمم بيكون في مجال معين واسلوب ما بيقدر يبدع فيه اكتر وبيلاقي نفسه فيه ، ومش هتعرف الاسلوب المناسب ليك ولا المجال اللي هتبدع فيه اكتر غير لما تجرب حاجات كتيرة
في التحدي الاسبوعي مش هنثبت على موضوع او مجال واحد وهنجرب اساليب ومجالات مختلفة في التصميم
نستخدم ايه في التحدي ؟
تقدروا تستخدموا أي برنامج تحبوه للتصميم سواء كانفا ، اليستريتور، فوتوشوب أو أي أداة تحبوها
وممكن تشتغلوا من الموبايل أو الكمبيوتر اللي تحبوه والمتاح عندكم
جايين متأخر ؟
لو جايين متأخر وفاتكم تحديات كتير وعايزين ترجعوا لها تقدروا تشوفوها كلها هنا وتختاروا منها اللي يعجبكم وتتدربوا عليه ، وتشاركوني بردو بنفس الطريقة عشان ننشر أعمالكم هنا
