إزاي تختار اللابتوب الصح للجرافيك؟ أقل مواصفات تديك بداية قوية

ايه هو اللابتوب المناسب لتصميم الجرافيك ؟ اشتري لابتوب ايه ؟ ايه اللابتوب المناسب لتعلم تصميم الجرافيك ؟ ايه أحسن لابتوب للشغل في تصميم الجرافيك ؟ ايه نوع اللابتوب بتاعي وايه مواصفاته ؟

الاسئلة دي تعتبر من الأسئلة الأكثر تكرارًا عليا وهتلاقوا اجابة على كل الاسئلة دي هنا

الجهاز المناسب لبداية قوية في تصميم الجرافيك

ابدأ منين ؟

بنصح دايمًا تبدأوا باللابتوب المتوفر عندكم ، ومتحطوش العقدة في المنشار

يعني لو عندكم لابتوب مش اسرع حاجة بس ماشي حاله ؛ انصحكم تتعلموا وتبدأوا تشتغلوا عليه ، لحد ما تصميم الجرافيك يجيب لكم دخل مناسب وساعتها تقدروا تشتروا اللابتوب السريع اللي مواصفاته مناسبة اكتر لشغل الجرافيك ديزاين واللي هيسهل عليكم شغلكم

بس الأول لازم يكون في شغل بيدخل لكم فلوس تشتروا بيها اللابتوب الجديد ، مش العكس وتبدأوا القصة بالشقلوب من شرا اللابتوب وبعد كدا تدوروا على التعلم والشغل

لما بدأت اتعلم جرافيك ديزاين كان معايا لابتوب Lenovo z510 وكان بطيء بالنسبة لبرامج ادوبي Adobe زي اليتسريتور وفوتوشوب ، وبعدها ركبت له SSD

ساعتها بقى اسرع شوية بس طبعًا يعتبر مرهق بردو ، كان من الصعب افتح اكتر من برنامج مع بعض ، ولو تقلت على برنامج زي اليستريتور في الشغل شوية يهنج ويقفل وهكذا

بس فضلت اتعلم واشتغل باستخدام اللابتوب ده فترة لحد ما الحمدلله قدرت اجيب من فلوس شغلي اللي حوشتها – ادخرتها – لابتوب جديد يسهل عليا الشغل وتكون البرامج اخف عليه شوية

أقل مواصفات لازم تدور عليها في اللابتوب لو عايز تبدأ تتعلم وتشتغل جرافيك ديزاين

هنا هنشرح أقل مواصفات لازم تدور عليها، مع توضيح بسيط ليه كل جزء مهم:

اختيار اللابتوب المناسب هو أول خطوة مهمة لأي مصمم جرافيك. مش لازم تبدأ بأغلى جهاز في السوق، لكن لازم يكون عندك جهاز يقدر يشغّل البرامج الأساسية زي Adobe Photoshop, Illustrator, InDesign أو حتى بدائل زي Affinity و Canva من غير ما يهنج أو يبطّأ شغلك.

هنا هنشرح أقل مواصفات لازم تدور عليها، مع توضيح بسيط ليه كل جزء مهم:

1. المعالج (CPU)

الحد الأدنى: Intel Core i5 (جيل 10 أو أحدث) أو AMD Ryzen 5.
ليه مهم؟
المعالج هو عقل الجهاز. في برامج التصميم، سرعة فتح الملفات وتنفيذ الأوامر بتعتمد بشكل كبير على قوة المعالج. معالج ضعيف هيخلي تجربة الشغل بطيئة جدًا ومرهقة.

2. الذاكرة العشوائية (RAM)

الحد الأدنى: 8 جيجابايت، والمثالي 16 جيجابايت.
ليه مهم؟
الرام هي اللي بتسمح لك تشغّل أكتر من برنامج في نفس الوقت. لو هتشتغل على Photoshop ومعاه Illustrator، فـ 8 جيجا ممكن تشتغل بس هتلاحظ بطء. الـ 16 جيجا هتديك سلاسة أكبر خاصة مع ملفات التصميم الكبيرة

3. كارت الشاشة (GPU)

الحد الأدنى: كارت مدمج حديث زي Intel Iris Xe أو كارت منفصل بسيط زي NVIDIA MX450.
ليه مهم؟
كارت الشاشة بيساعد في تسريع عرض الصور والتأثيرات. لو شغلك بس تصميم ثنائي الأبعاد (2D)، الكروت المدمجة الحديثة تكفي. لكن لو بتفكر تدخل 3D أو موشن جرافيك، يبقى لازم كارت أقوى (مثلاً NVIDIA GTX أو RTX).

4. التخزين (Storage)

الحد الأدنى: SSD بسعة 256 جيجابايت.
ليه مهم؟
الـ SSD أسرع بكتير من الـ HDD التقليدي. بيخلي الجهاز يفتح في ثواني والبرامج تشتغل بسرعة. بس لو هتحفظ ملفات كتير أو مشاريع ضخمة، حاول تختار 512 جيجابايت أو تضيف هارد خارجي.

5. الشاشة

الحد الأدنى: مقاس 14 بوصة بدقة Full HD (1920×1080).
ليه مهم؟
التصميم محتاج شاشة واضحة وألوان دقيقة. الشاشة الـ Full HD هتديك تفاصيل كويسة. ولو تقدر تجيب شاشة فيها تقنية IPS يبقى أفضل، لأنها بتعرض ألوان واقعية وزوايا رؤية واسعة.

المواصفات المقترحة لتشغيل بعض برامج تصميم الجرافيك

لو في برنامج معين هتشتغل عليه اكتر من غيره تقدر تعمل بخث بنفسك على المواصفات المطلوبة لتشغيل البرنامج ده قبل ما تاخد قرار الشراء ، وأغلب المواقع الخاصة بالبرامج دي بتوفر لك تفاصيل مهمة زي المواصفات المناسبة لتشغيلها

الخواص والمواصفات دي تقدروا تلاقوها في الروابط الجاية بناءً على رأي شركة ادوبي نفسها صاحبة البرامج دي

المواصفات المناسبة لبرنامج اليستريتور Illustrator

المواصفات المناسبة لبرنامج فوتوشوب Photoshop

المواصفات المناسبة لبرنامج ان ديزاين In Design

ايه اللابتوب اللي ارشحه ؟

كتير بيسألوا: “ترشحيلي لابتوب معين أشتريه للجرافيك؟”
والحقيقة مفيش إجابة واحدة تنفع للجميع. السوق فيه تنوع هائل من الأجهزة، وكل لابتوب له مميزات وعيوب. كمان احتياجاتنا مختلفة: في حد عايز جهاز للتعلم والتجربة، وحد تاني بيشتغل بشكل احترافي على ملفات ضخمة، وحد بيفضّل يشتغل في البيت، وحد تاني محتاج لابتوب خفيف يتنقل بيه.

عشان كده، بدل ما أقول اسم جهاز واحد، الأفضل تعرف المواصفات الأساسية اللي لازم تدور عليها. لما تبقى فاهم إيه اللي يفرق في المعالج أو الرام أو كارت الشاشة، ساعتها تختار الجهاز اللي يناسب ميزانيتك واحتياجاتك من غير ما تتلخبط بين عشرات الموديلات.

ايه نوع اللابتوب اللي بستخدمه؟

زي ما ذكرت سابقًا اللابتوب بتاعي اللي بدأت بيه مكانش افضل حاجة ، ومبدأتش اتعلم واشتغل في الجرافيك ديزاين من اللابتوب اللي معايا دلوقتي

اللابتوب اللي معايا دلوقتي هو Lenovo Legion 5 لونه Stingray White

واكرر مرة تانية ، انا مش بقول النوع ده عشان احطم أي حد بيبدأ ويحس انه مش معاه لابتوب كويس ، انا بقول نوعه عشان السؤال ده بيتكرر كتير ، وكمان ممكن حد يكون عايز يستثمر في لابتوب كويس وحابب يعرف رأيي فيه ، زي ما حصل معايا لما سألت بعض مصممي الجرافيك اللي بيستخدموا اللابتوب ده عن رأيهم فيه وفعلًا رأيهم فادني

رأيي في اللابتوب :

اللابتوب سهِّل عليا حاجات كتيرة جدًا ، زي ان البرامج نفسها اخف عليه واسرع في الاستخدام ، اقدر اتقل عليه – مقارنةً باللابتوب القديم بتاعي – من غير ما البرامج تقفل ، واقدر افتح اكتر من برنامج من برامج ادوبي مع بعض ، وبالتأكيد في حاجات أقوى وأفضل واحترافية اكتر من اللابتوب بتاعي ، بس حاليًا ده المناسب معايا

تقدروا تعرفوا كل المنتجات والادوات اللي بستخدمها وبرشحها ليكم وتستفيدوا من العروض والخصومات الحصرية من قسم أدوات بحبها هنا في المدونة

https://tohfa.me/mylist

اخترت لك :