ايه هو اللابتوب المناسب لتصميم الجرافيك ؟ اشتري لابتوب ايه ؟ ايه اللابتوب المناسب لتعلم تصميم الجرافيك ؟ ايه أحسن لابتوب للشغل في تصميم الجرافيك ؟ ايه نوع اللابتوب بتاعي وايه مواصفاته ؟
الاسئلة دي تعتبر من الأسئلة الأكثر تكرارًا عليا وهتلاقوا اجابة على كل الاسئلة دي هنا
اشتري لابتوب نوعه ايه ؟
بنصح دايمًا تبدأوا باللابتوب المتوفر عندكم ، ومتحطوش العقدة في المنشار
يعني لو عندكم لابتوب مش اسرع حاجة بس ماشي حاله ؛ انصحكم تتعلموا وتبدأوا تشتغلوا عليه ، لحد ما تصميم الجرافيك يجيب لكم دخل مناسب وساعتها تقدروا تشتروا اللابتوب السريع اللي مواصفاته مناسبة اكتر لشغل الجرافيك ديزاين واللي هيسهل عليكم شغلكم
بس الأول لازم يكون في شغل بيدخل لكم فلوس تشتروا بيها اللابتوب الجديد ، مش العكس وتبدأوا القصة بالشقلوب من شرا اللابتوب وبعد كدا تدوروا على التعلم والشغل
لما بدأت اتعلم جرافيك ديزاين كان معايا لابتوب Lenovo z510 وكان بطيء بالنسبة لبرامج ادوبي Adobe زي اليتسريتور وفوتوشوب ، وبعدها ركبت له SSD
ساعتها بقى اسرع شوية بس طبعًا يعتبر مرهق بردو ، كان من الصعب افتح اكتر من برنامج مع بعض ، ولو تقلت على برنامج زي اليستريتور في الشغل شوية يهنج ويقفل وهكذا
بس فضلت اتعلم واشتغل باستخدام اللابتوب ده فترة لحد ما الحمدلله قدرت اجيب من فلوس شغلي اللي حوشتها – ادخرتها – لابتوب جديد يسهل عليا الشغل وتكون البرامج اخف عليه شوية
اقرأ أيضًا : تحدي تصميم الباترن ! وازاي نكسب من الباترن فلوس ؟
ايه اللابتوب المناسب لتصميم الجرافيك ؟
المواصفات المناسبة لتصميم الجرافيك سواء للشغل أو التعليم هى المواصفات اللي تقدر تشغل برامج زي ادوبي اليستريتور وادوبي فوتوشوب وادوبي ان ديزاين ، لأن دي أكتر برامج بيستخدمها مصمم الجرافيك في شغله
الخواص والمواصفات دي تقدروا تلاقوها في الروابط الجاية بناءً على رأي شركة ادوبي نفسها صاحبة البرامج دي
ايه اللابتوب اللي ارشحه ؟
خبرتي في اللابتوبات واجهزة الكمبيوتر ومواصفاتها مش كبيرة كفاية ومش كافية اني ارشح لابتوب بعينه لحد ، عشان كدا بحب اشوف رأي ناس مختصة وفاهمة اكتر في المواصفات واللابتوبات ، وايه قيمته مقابل سعره كويسة وايه لأ
في ما شاء الله ناس كتيرة على فيسبوك ويوتيوب فاهمين في المجال ده ، ومن الناس اللي بتقول رأيها وبتقول لو في صفقة لابتوب أو جهاز كويس هو اكونت المهندس يوسف أيمن على فيسبوك وكمان القناة الخاصة به على تليجرام ، بينشر فيها لو في عرض كويس اونلاين على امازون وغيره وكمان لو عروض كويسة في المحلات
ايه نوع اللابتوب اللي بستخدمه؟
زي ما ذكرت سابقًا اللابتوب بتاعي اللي بدأت بيه مكانش افضل حاجة ، ومبدأتش اتعلم واشتغل في الجرافيك ديزاين من اللابتوب اللي معايا دلوقتي
اللابتوب اللي معايا دلوقتي هو Lenovo Legion 5 لونه Stingray White
واكرر مرة تانية ، انا مش بقول النوع ده عشان احطم أي حد بيبدأ ويحس انه مش معاه لابتوب كويس ، انا بقول نوعه عشان السؤال ده بيتكرر كتير ، وكمان ممكن حد يكون عايز يستثمر في لابتوب كويس وحابب يعرف رأيي فيه ، زي ما حصل معايا لما سألت بعض مصممي الجرافيك اللي بيستخدموا اللابتوب ده عن رأيهم فيه وفعلًا رأيهم فادني
رأيي في اللابتوب :
اللابتوب سهِّل عليا حاجات كتيرة جدًا ، زي ان البرامج نفسها اخف عليه واسرع في الاستخدام ، اقدر اتقل عليه – مقارنةً باللابتوب القديم بتاعي – من غير ما البرامج تقفل ، واقدر افتح اكتر من برنامج من برامج ادوبي مع بعض ، وبالتأكيد في حاجات أقوى وأفضل واحترافية اكتر من اللابتوب بتاعي ، بس حاليًا ده المناسب معايا
تقدروا تعرفوا كل المنتجات والادوات اللي بستخدمها وبرشحها ليكم وتستفيدوا من العروض والخصومات الحصرية من قسم أدوات بحبها هنا في المدونة
أدوات بحبها
اخترت لك :
