نصائح للعمل من المنزل من ماري كوندو

اهلا يا اصدقاء ! اذا متعرفوش ماري كوندو فأحب اعرفكم عليها ، ماري كوندو هى سيدة يابانية صاحبة الكتاب الشهير “سحر التنظيم: الفن الياباني في التنظيم وإزالة الفوضى The Life-Changing Magic of Tidying Up

اللي بيتكلم عن أساليب ماري كوندو في الترتيب والتنظيم والتخلص من الفوضى واللي ناس كتيرة بدأت تطبقها الايام دي وبدأت طرقها وأساليبها في الترتيب والتخلص من الفوضى تنتشر اكتر يوم بعد يوم

من فترة بقى ماري كوندو اصدرت كتاب تاني اسمه Joy at Work أو المتعة في العمل

الكتاب هدفه إنه يساعدنا في تنظيم مساحة العمل الخاصة بينا لأن اكيد لما الدنيا حوالينا تكون رايقة ومنظمة ده هيساعدنا في زيادة الانتاجية والانجاز بتوعنا

النصايح اللي في الكتاب نقدر نطبقها على المكاتب الفعلية ، يعني المكاتب اللي في الشركات والمؤسسات ، وكمان نقدر نطبقها على المكتب الخاص بينا في البيت او مساحة العمل الخاصة بينا اللي في بيتنا لو بنشتغل من البيت

ماري كوندو بتقول في كتابها ان عشان نبدأ في تنسيق وتنظيم مساحة العمل الخاصة بينا مهم نسأل نفسنا الاول ايه الهدف من مساحة العمل دي ؟ وايه الحاجات اللي عايزين نعملها وننجزها في مساحة العمل الخاصة بينا ؟

أول خطوة عشان ننظم مساحة العمل الخاصة بينا هى اننا نختار المكان المناسب ، وأهم نقطة في اختيار المكان اللي هنشتغل فيه هى اننا نختار مكان نقدر نركز فيه وبعيد عن المشتتات ، لما نرفع عنينا عن الشغل ونبص حوالينا ميبقاش في حاجات تخلينا نفقد تركيزنا ونسرح او ننشغل بيها

بعد ما اخترنا المكان المناسب اللي هنشتغل فيه هنبدأ نختار الحاجات اللي هننظم بيها شغلنا والحاجات اللي هنضيفها لمساحة العمل الخاصة بين بحيث ان الادوات دي سواء ادوات حقيقية او رقمية – ديجيتال – تخلينا نبقى منجزين وسعداء لأطول فترة ممكنة

دلوقتي بقى هنبدأ في الخطوات والنصايح اللي ماري كوندو قالت عليها في كتابها

أولًا : نصائح ماري كوندو لتنظيم مساحة العمل الحقيقية

1- حاولوا يكون في حاجات قليلة جدًا على سطح المكتب الخاص بيكم

المكتب بتاعكم السطح بتاعه مكان خاص للعمل فقط ، مش مساحة تخزين فأهم نقطة هى إن سطح المكتب أو طاولة العمل ميكونش عليها أي حاجة بهدف التخزين ابدًا ، الحاجات اللي تتحط على سطح المكتب هى الحاجات اللي بنستخدمها دايما للشغل بشكل منتظم

مثلًا : سطح المكتب تقدروا تحطوا عليه اللابتوب أو جهاز الكمبيوتر الخاص بيكم – لو شغلكم يعتمد على الكمبيوتر

لو شغلكم بيعتمد على الكتابة باستخدام اقلام ، فـ ممكن تحتفظوا بالاقلام اللي بتكتبوا بيها على المكتب جوا منظم أو مقلمة خاصة بالاقلام بتاعتكم

2- فرقوا ما بين حاجات الشغل والحاجات الشخصية

ماري كوندو بتقول لو بتشتغلوا من البيت ، اتعاملوا بشكل مختلف ومنفصل مع الحاجات الشخصية والحاجات الخاصة بالشغل

مثال : لو في كتب وملفات خاصة بالشغل وكتب وملفات تانية شخصية او مالهاش علاقة بالشغل واحنا دلوقتي هنرتب وننظم مساحة العمل الخاصة بينا ، يبقى نركز على ترتيب الحاجات الخاصة بالعمل دلوقتي ونسيب الحاجات الشخصية لبعدين ، للوقت الخاص بترتيب وترويق البيت

3- استخدموا صناديق صغيرة لتنظيم ادوات العمل

استخدموا صناديق صغيرة أو منظمات – موجودة عندكم مش لازم تشتروا جديد واستفيدوا من المتاح حواليكم – واحتفظوا بالصناديق او المنظمات في ادراج أو على سطح المكتب لو مفيش فرصة ان يكون في ادراج أو دواليب تخزين

الصناديق أو المنظمات بتساعد ان الادوات بتاعتكم متبقاش تايهة على سطح المكتب الخاص بيكم

وماري كوندو بتنصح اننا نعيد استخدام الصناديق والكراتين الموجودة عندنا ، زي مثلا اننا نعيد استخدام علبة الموبايل اللي محتفظين بيها بقالنا سنين بلا هدف ومش بنعمل بيها حاجة – العلبة اللي بيكون الموبايل موجود جواها لما بنشتريه –

3- احفظوا مكان كل حاجة

ماري بتقول لما نحفظ اماكن تخزين الادوات بتاعت الشغل بتاعنا هنقدر نتغلب على الفوضى وننظم مساحة العمل بتاعتنا بسهولة ؛ لأننا لما نيجي ننظم مساحة العمل الخاصة بينا هنقدر بكل سهولة نرجع كل حاجة مكانها لأننا حافظين مكان كل حاجة فين

ثانيًا : مساحة العمل الافتراضية أو الرقمية

1- خلي سطح المكتب Desktop الخاص بالكمبيوتر أو الابتوب مترتب

أكتر حاجة بنعملها هو اننا بنحفظ أي ملف جديد عى سطح المكتب ، انا عن نفسي اي فايل جديد بحمله على الـ Desktop و بعد فترة بتتراكم الملفات وسطح المكتب بيبقى زحمة جدا جدا

لكن فعلا شكل سطح المكتب اللي كله ملفات ومش منظم خالص وفوضى كدا وحش اوي

ماري كوند بتقول ان اكيد المنظر الزحمة ده اخر منظر عايزين نشوفه في بداية يوم العمل بتاعنا ، وبتقول كمان ان سطح المتب ده لملفات العمل الضرورية فقط ، واللي هتكون هناك لفترة مؤقتة بس

الملفات دي ممكن تكون مثلا الفواتير اللي لسه متدفعتش أو الملفات اللي بنشتغل عليها حاليًا ولما نخلص شغل عليها نوديها لمكانها اللي تنتمي له

2- اصنعوا ملف باعث للسعادة

من الحاجات اللي ماري كوندو بتحطها على المكتب بتاعها هو ملف باعث للسعادة ، فيه بحث اتنشر لها وفخورة اوي بالنشر ده ، فيديو ليها من حديث قدمته وبتسعد جدا لما تفتكره ، التقييم الأخير لطلابها لآخر دورة أو كورس قدمته

والصندوق أو الملف الباعث للسعادة ده بتجدد فيه كل شوية وتعمل له update ، كل ما تكتب مقالات جديدة ، كل ما تدرس لمجموعة طلاب جديدة وهكذا بتجدد في الملف ده

3- نظموا البريد الالكتروني الخاص بيكم عشان متضيعوش وقت عليه

ناس كتيرة بتحس انها بتضيع وقتها لما تفتح الايميل وتشوف الرسايل اللي جت لها ، في وقت كتير اوي بيضيع خصوصًا لما يكون في ايميلات ورسايل مش مهمة

عن نفسي أي رسايل مشتركة فيها بقعد اكتر من شهر مش بفتحها بلغي اشتراكي في الرسايل دي ، وبعمل unsubscribe من خدمة الرسايل دي

4- متردوش على كل ايميل لوحده بشكل فردي

لما تفتحوا عشان تردوا على ايميل تقدروا تفتحوا اكتر من ايميل في اكتر من نافذة window في نفس الصفحة ، لما تعملوا كدا ده هيخليكم تحسوا انكم ملزمين تردوا على اكتر من ايميل في نفس جلسة العمل وردوا على الايميلات اللي فعلا الرد عليها مهم عشان الشغل يمشي بشكل مظبوط

5- خلوا الموبايل بعيد عنكم اثناء الشغل

لو الموبايل جمبكم وانتم بتشتغلوا دي حاجة بتقلل جدا من الانتاجية بتاعتكم ، لأن الموبايل في تصميمه كجهاز معمول للاستمتاع مش للتعلم أو انجاز المهام ، وحتى تطبيقات الموبايل معمولة بنفس الطريقة ، طريقة تجذبكم بحيث تفضلوا في نفس التطبيق اطول فترة ممكنة من غير ما تخرجوا منه

مثلًا لو انا قلت هاخد كورس على Udemy وهذاكره من الموبايل وحملت ابليكيشن Udemy ع الموبايل هلاقي وسط الدرس ان جالي نوتيفيكيشن من تطبيق معين ، أو ساعات اصلا ومن قبل ما افتح Udemy اقول هشوف حاجة في انستجرام بسرعة واخرج وادخل على انستجرام اتوه جوه حبة حلوين

طبعًا لو الموبايل هو الوسيلة الحيدة للتعلم أو الشغل فـ دي حاجة تانية واستخدموا المتاح ، انا دايمُا بشجع اننا نبدأ بالموجود ، لكن لو متوفر كمبيوتر او لابتوب فأكيد اشجعكم تسيبوا الموبايل

عن نفسي صعب اخلي الموبايل بعيد عني تمامًا اثناء الشغل ، بس اللي بحب اعمله اني اعمل الموبايل صامت او افعل عدم الازعاج ، او اوقف التطبيقات الخاصة بالسوشيال ميديا لأنها اكتر حاجة بتضيع الوقت ، وانا مش عايزة وقت الشغل يضيع

6- وازن بين الحياة والعمل

ماري كوندو بتقول عشان نقدر نلاقي التوازن بين الحياة والشغل لازم نقعد مع نفسنا ونفكر ونفتكر كويس احنا بنشتغل ليه ؟ ايه الاهداف اللي عايزين نحققها من خلال الشغل ده ؟ ايه هى حياة العمل المثالية بالنسبة لنا ؟

ومن اجابات الاسئلة دي هنعرف ايه هى اولوياتنا وايه المهام اللي مفروض نبدأ بيها كل يوم وايه المهام اللي ممكن تيجي بعد كدا أو تتأجل عادي

وبكدا نكون عرفنا ايه المهام اللي مش مهمة ومالهاش لازمة ، وساعتها نقدر نوجه الوقت والطاقة بتاعتنا لحاجة تانية تستاعل اكتر وتبعث في نفوسنا السعادة اكتر

بوست مقترح : نصائح للعمل كـ فريلانسرز

وانتم يا أصدقاء ! عندكم نصايح حلوة تساعدنا اكتر على الشغل من البيت ؟ شاركونا نصايحكم في التعليقات

.

شكرًا عشان وصلتوا للنقطة دي

ودمتم بألف خير

اخترت لك:

يلا نبقى أصدقاء هناك كمان