اهلا وسهلا بيكم يا أصدقاء ! النهارده هقولكم ازاي نعمل مدونة وموقع احترافي وكمان هقولكم كل حاجة عن مدونتي وازاي فتحتها وكل التفاصيل اللي محتاجين تعرفوها عن المدونة
الحكاية بدأت ازاي ؟ وعرفت عن التدوين والمواقع ازاي
من كام سنة تابعت بنت بتقدم محتوى على انستجرام وعرفت ان عندها مدونة أو موقع بتنشر عليه مقالات أو تدوينات جميلة جدًا عن حياتها ويومياتها والوصفات اللي بتعملها والحاجات اللي بتشتريها
قبل ما اشوف المدونة دي كانت كل فكرتي عن المواقع ان الموقع ده مثلا بيكون موقع فيه اخبار أو موقع تعليمي وكدا
ومن هنا جت لي الفكرة ان يبقى عندي موقع اكتب فيه عن كل الحاجات اللي نفسي فيها ، وبدأت ادور ازاي اقدر افتح مدونة أو موقع وانشر عليه مقالات وايه الادوات اللي هحتاجها
ازاي اقدر افتح موقع أو مدونة ؟
عندي طريقين يا اما طريقة مجانية وهى اني افتح مدونة أو موقع على حاجة زي بلوجر Blogger ، وبالفعل بدأت على بلوجر ، وكانت أول مدونة افتحها
المميزات:
- مجانية
- استخدامها مش صعب
العيوب:
- الخدمات أو الحاجات المتاحة محدودة بما انها مجانية فـ في حاجات كتيرة مش بنقدر نعملها
- بلوجر نفسه مش احسن حاجة للظهور في محركات البحث أو ساعات بيتقال عليها مش SEO Friendly
بعد ما قضيت حبة وقت حلوين في بلوجر واخدت على جو التدوين وكتابة المقالات قررت اني اطلع بالموقع بتاعي لمستوى اعلى وده طبعا بعد ما قريت عن المواقع المدفوعة وفهمت الدنيا ماشية ازاي وكان عندي استعداد اني استثمر وادفع فلوس في موقع مدفوع
عرفت اني عشان افتح موقع احترافي محتاجة 3 حاجات ، هنتكلم عليهم بالتفصيل دلوقتي
3 حاجات مهمة لانشاء مدونة او موقع احترافي
1. نظام انشاء المواقع
أول حاجة هتحتاجوها هو النظام نفسه اللي هتقدروا تعملوا بيه المدونة ، اللي بيكون فيه ازرار بتضغطوا عليها عشان تعملوا صفحة جديدة أو تكتبوا مقالة جديدة وتنشروها وهكذا
في كذا نظام تقدروا تعتمدوا عليه زي:
- square space
- وفي wordpress اللي انا وناس كتيرة بتفضله وهو wordpress.org
وخلوا بالكم ومتتلخبطوش عشان في حاجة تاني اسمها wordpress.com وده حاجة تانية مختلفة
مواقع مشهورة كتيرة جدا بتستخدموها وبتفتحوها بشكل يومي تم انشاءها عن طريق wordpress.org ، ومثال على كدا المواقع الخاصة بالمؤسسات دي:
- Reuters
- BBC America
- Microsoft
- The New York Times
لو عايزين تعرفوا أي موقع تابع لووردبريس ولا لآ تقدروا تدخلوا على الموقع ده واسمه لايق على استخدامه اوي ، اسمه Is it wordpress
يعني هل الموقع ده تم بناءه بووردبريس ؟
بنكتب فيه اسم الموقع ويطلع لنا اذا كان تابع لووردبريس ولا لآ
2. استضافة Hosting
الاستضافة دي يعني مساحة تخزين ، يعني احنا لما بنفتح موقع بيكون مليان كتابة نصوص وصور وغيره ، كل المعلومات دي محتاجة مساحة تخزين عشان تتحفظ فيها ، المساحة دي هى الاستضافة
والاستضافة دي خدمة مدفوعة ، بتقدمها مواقع معينة وبيكون دفعها في صورة اشتراك شهري ، وممكن تدفعوه بشكل مقدم زي ان اول 3 سنين يتدفعوا مرة واحدة مقابل خصم معين
الاستضافة اللي بستخدمها من موقع Bluehost
عندهم مميزات كتيرة من افضلها ان في خدمة عملاء خلال الـ 24 ساعة والـ 7 أيام في الاسبوع
يعني لو واجهتني أي مشكلة اقدر اتواصل معاهم في اي وقت في شكل مكالمة او شات واستجابتهم سريعة جدًا
وطبعًا الاستضافات من واقع زي بلوهوست بيكون مدمج فيها الـ wordpress.org ، يعني خدمة الاستضافة بتقدم لي مساحة التخزين وكمان واجهة wordpress.org اللي بقدر منها انشر المقالات واقدم الخدمات وغيره
بيعملوا عروض حلوة جدا بمناسبة البلاك فرايداي وفعلا كنت اشتركت معاهم وقتها واستفدت من عرض جميل جدا
وتقدروا تستفيدوا من العرض الموجود دلوقتي وهو ان سعر الاستضافة 2.95$ وده بيشمل :
- موقع ووردبريس احترافي
- اكتر من 300 تصميم وقالب ورد بريس للموقع بتاعكم
- نطاق أو دومين مجاني – لأول سنة فقط بعد كدا بتدفعوا سعر النطاق كل سنة –
تقدروا تستفيدوا من العرض بلوهوست وتشتروا الاستضافة بكل المميزات دي لما تضغطوا هنا
3. دومين أو نطاق Domain
النطاق أو الدومين يعني الرابط اللي بتدخلوا عليه من اي متصفح على الموقع بتاعكم
يعني انا النطاق بتاعي هو www.tohfa.me
لو المدونة بتاعتكم على بلوجر ف بتاخدوا نطاق مجاني ومش بيكون مستقل ، يعني بيكون نطاق تابع لموقع تاني وبيكون شكله عامل زي كدا
وده بيكون ماشي حاله في البداية ، لكن مش بيكون احترافي اوي يعني بصراحة وتقدروا طبعا تشتروا نطاق مدفوع وتنقلوا مدونة بلوجر عليه ، بس دي حاجة انا مجربتهاش بنفسي بس في ناس بتعملها
النطاق بتاعي اشتريته من موقع godaddy
تقدروا تدخلوا عليه بكل سهولة وتكتبوا اسم النطاق أو الدومين اللي عايزينه وتشوفوه متاح ولا لا وتعرفوا سعره كام
النطاق بردو ده حاجة مش بنشتريها ، المسمى الصح ليها هو اننا بنحجزه ، يعني طول ما احنا بندفع كل سنة سعر النطاق ده فـ هو بتاعنا
انما لو في سنة اتأخرنا ومدفعناش مثلًا النطاق يقدر أي حد تاني يشتريه ويبقى بتاعه عادي ويبقى بيفتح على موقع تاني
في خدمات استضافة زي Bluehost نقدر نشتري منهم دومين أو نطاق ، بس ساعتها اسعار godaddy كانت احسن بالنسبة لي فـ اشتريت منهم
وعملية اني انقل المدونة بتاعتي على النطاق ده كانت سهلة جدا ، قلت لخدمة العملاء بتوع bluehost وهما قاموا بالموضوع كله من الالف للياء من غير ما اعمل انا اي حاجة
بعد ما حجزت الدومين واشتركت في موقع الاستضافات ، بقى عندي مدونتي او الموقع بتاعي خلاص نيجي بقى لشوية تفاصيل مهمة
الثيم Theme
الثيم هو المظهر أو الشكل الخارجي اللي ظاهر لكم لما بتفتحوا المدونة ، وانا مش ببرمج أي حاجة أو بكتب أي اكواد
كل اللي بعمله انه بيكون متاح اكتر من ثيم واقدر اتفرج عليهم واختار منهم اللي يعجبني ، وطبعا الثيمات في منها مجاني وفي منها مدفوع
الثيم اللي بستخدمه في مدونتي هو ثيم مجاني اسمه Astra
الاضافات Plug-ins
الاضافات دي حاجات بردو نقدر نحملها على ووردبريس تدينا ميزات اضافية وكل اضافة بتديكم مميزات معينة زي مثلًا :
- اضافات تقدروا تخلوا بيها الموقع بتاعكم فيه اكتر من لغة
- اضافات تقدروا تحولوا الموقع بتاعكم لموقع شوبينج وتسوق والناس تقدر تشتري حاجات زي Woocommerce
- اضافات تقدروا بيها تغيروا شوية في شكل الثيم بتاعكم وتقدروا تضيفوا له حاجات اضافية زي الاضافة اللي بستخدمها وهى gutenberg ، ودي اضافة بتخليني اقدر اقسم الصفحة بتاعته لمكونات أو blocks زي اللي مثلا اللي عملت بيها الصفحة الرئيسية والصفحة اللي فيها كل بوستات ومقالات المدونة
***
دلوقتي بقى نيجي لكذا سؤال مهم
امتى افتح موقع أو مدونة لنفسي ؟
برأيي ان أي بيزنس أو مشروع لازم يكون له موقع حتى لو موقع بسيط
الموقع بتاعكم هو الاساس ، كأنه المقر الرئيسي اللي المتابعين والجمهور بتاعكم بيرجعوا لكم فيه
لو في يوم من الايام حساباتكم على السوشيال ميديا اتعطلت أو عملتوا حساب باسم جديد فأسهل طريقة المتابعين يدوروا عليكم بيها هى الموقع بتاعكم
كمان تقدروا تكتبوا مقالات عن المنتجات أو الخدمات اللي بتقدموها ودي هتكون من افضل الطرق اللي بتسوقوا بيها للخدمات بتاعتكم وهى التسويق بالمحتوى
تقدروا كمان تضيفوا صفحة فيها بيانات التواصل الخاصة بيكم عشان أي حد عايز يتواصل معاكم يقدر يوصل لكم
نبدأ الموقع أو المدونة منين ؟
ابدأوا بمنصة تدوين مجانية وبعد كدا لو لقيتوا نفسكم في الموضوع وحسيتوا انكم عايزين تطوروه اكتر وتخلوه احترافي اكتر ومعاكم ميزانية تدفعوا فلوس في موقع ونطاق واستضافة يبقى ساعتها خدوا الخطوة دي
ازاي استفيد من الموقع أو المدونة ؟
نقدر نستفيد منها بأكتر من طريقة
- لو عدد زوار المدونة كبير تقدروا تضيفوا لها اعلانات وتكسبوا منها فلوس
عن نفسي جربت استخدم الطريقة دي بس لقيت انها مش أحسن حاجة ولغيت ان يبقى في اعلانات على المدونة لأنها كانت مزعجة لزوار المدونة اوي
- تقدروا تكسبوا من المدونة عن طريق التسويق بالعمولة ، بحيث تضيفوا روابط منتجاتكم المفضلة واكواد الخصم الخاصة بيكم على الموقع بتاعكم
- تقدروا تقدموا خدمات أو تبيعوا منتجات حقيقية أو رقمية على الموقع بتاعكم زي ما انا بقدم خدمة استشارة انستجرام وخدمة تصميم المحتوى على الموقع بتاعي كدا
ودي كانت كل حاجة عن مدونتي ، وازاي نعمل مدونة وموقع احترافي ، وبكدا نكون وصلنا لنهاية بوست النهارده ، لو في عندكم أي سؤال عن التديون وانشاء المواقع والمدونات اكتبوه ليا في تعليق عشان اقدر اساعدكم وارد عليكم
.
شكرًا عشان وصلتوا للنقطة دي وإلى اللقاء في بوست جديد !
دمتم بخير
اخترت لك:
