أهلا يا أصدقاء ! في بوست النهارده هقولكم على افضل الطرق اللي تحطوا بيها الـ لينك في البايو أو الرابط في بايو انستجرام أو تيك توك أو أي موقع تاني
انستجرام وتيك توك بيسمحوا اننا نضيف رابط واحد فقط في البايو ، وأكيد انتم كصُناع محتوى عندكم روابط ولينكات كتيرة جدًا عايزين تضيفوها وتقولوا عليها لجمهوركم ، ورابط الوحيد اللي في البايو ده مش عارفين هيكفي ايه ولا ايه
عشان كدا لازم تستخدموا أداة تساعدكم انه يكون الـ لينك في البايو بتاع انستجرام احترافي اكتر ، بحيث أما حد يضغط على الرابط اللي في البايو بتاع حسابكم يطلع له كل الروابط المهمة اللي ممكن تفيده وتوصله ليكم
كل اللي عليكم تعملوه انكم تستخدموا أداة من الادوات الجاية وتضويفوا لها كل روابطكم المهمة ، وبعدين تاخدوا الرابط الخاص بيكم من الأداة دي وتضيفوه في بايو انستجرام أو تيك توك وغيره
أدوات لينك في البايو احترافي لاسنتجرام أو تيك توك
1. link tree
ده تقريبًا اكتر أداة مشهورة لـ رابط احترافي في البايو وأول أداة انا استخدمتها وناس كتيرة جدًا بتستخدمها
استخدامه سهل وبسيط ، وشكله نضيف كدا ومش معقد
تقدروا تضيفوا عدد كبير جدًا من الروابط بتاعتكم فيه ، وبيكون شكلها زي مستطيلات تحت بعضها
الاداة دي متاح فيها خطة مجانية فيها مميزات كتيرة حلوة
ومتاح بردو فيها بردو خطط مدفوعة فيها مميزات اكتر زي:
- اضافة الشعار الخاص بيكم
- اضافة عدد غير محدود من الروابط
- اضافة ايقونات لحساباتكم على مواقع السوشيال ميديا المختلفة
2. Link in Bio
الاداة دي تابعة لموقع Later موقع وتطبيق مشهور نقدر نستخدمه في جدولة محتوى انستجرام ، اتكلمنا عنه في بوست دليلك لجدولة محتوى انستجرام
لينك ان بايو فيه مميزات عظيمة جدًا
- أولها انكم تقدروا تضيفوا صور وكل صورة بتكون مربوطة برابط معين ، يعني لما الشخص يضغط على الصورة بيفتح له الرابط
- تقدروا تخلوا الصور في شكل صفوف وعواميد زي انستجرام بالظبط ، بحيث لو كل بوست ليكم بينزل على انستجرام بيكون له علاقة برابط معين فلما تقولوا للمتابعين الرابط في البايو يقدروا بكل سهولة يضغطوا على الـ رابط اللي في البايو وبعد كدا يضغطوا على نفس صورة البوست فـ يفتح لهم اللينك
- تقدروا تضيفوا أيقونات للسوشيال ميديا بحيث المتابعين يقدروا يوصلوا لكم ويتابعوكم في أي منصة تواصل اجتماعي تانية
- تقدروا تضيفوا فيديو ، زي مثلا آخر فيديو ليكم على اليوتيوب ، مش مجرد رابط ! لأ تقدروا تضيفوا الفيديو نفسه والمتابعين يتفرجوا على الفيديو على طول
مثال على استخدامي ليها : بتكون بالشكل ده كدا وتقدروا تعملوا تعديلات كتيرة جدًا
كمان في خطة مدفوعة تقدروا تشتركوا فيها وبتديكم مميزات وخواص اكتر بكتير
3. beacons
موقع beacons شبه Linktree لكن تقدروا تعملوا تعديلات اكتر بكتير جدًا ، وتقدروا تضيفوا خواص وايقونات وحاجات تانية كتيرة
الخطة المجانية بتديكم كمان احصائيات ، تقدروا تعرفوا في كام شخص ضغط على الروابط بتاعتكم
الخطة المدفوعة كمان فيها خواص ومميزات اكتر بكتير
4. Campsite
الموقع ده بيقدم لنا مميزات كتيرة زي اننا :
- نقدر نضيف عدد غير محدود من الروابط
- نضيف عنوان ومقدمة
- نغير الالوان والخطوط
- نشوف الاحصائيات
- نضيف حساباتنا على مواقع التواصل زي لينكد ان فيسبوك انستجرام وغيره
وخواص تانية كتيرة في خطة مجانية وخطة مدفوعة كمان فيها مميزات وخواص اكتر
5. your Website
من الطرق الاحترافية اللي نقدر نضيف بيها رابط في البايو هى الموقع الخاص بينا ، لو عندكم موقع خاص بيكم تقدروا تعملوا صفحة على الموقع بتاعكم وتضيفوا فيها كل الروابط الخاصة بيكم
وفي مميزات كتيرة للموضوع ده زي:
- تقدروا تنسقوها زي ما انتم عايزين وزي ما تحبوا وتضيفوا لها ايقونات السوشيال ميديا وكل اللي تحبوه
- تستفيدوا من كل الزوار والترافيك اللي بيدخلوا على الرابط ويدخلوا على موقعكم بدل ما تبعتوهم على موقع غريب فـ يروحوا على موقعكم
ودي الطريقة اللي بستخدمها حاليًا وهى اني عملت صفحة على موقعي وسميتها دليل تحفة
وجمعت فيها كل الروابط المهمة والفيديوهات بتاعتي على يوتيوب وحطيت فيها ايقونات السوشيال ميديا بتاعتي بحيث تقدروا تعملوا الصفحة دي لو عندكم موقع وتسموها دليل – خريطة – كل حاجة – أو أي اسم تحبوه
لو تعرفوا أداة تانية نقدر نستخدمها عشان نعمل رابط احترافي لانستجرام اكتبوا لي اسمها في الكومنتات أو قولوا لي ايه اسم الاداة اللي بتستخدموها حاليًا
ولحد هنا خلص بوست النهارده
.
شكرًا عشان وصلتوا للنقطة دي وإلى اللقاء في بوست جديد ! باي
ودمتم بخير
اخترت لك:
منتج جديد ! قالب كانفا لتصاميم رائعة لمحتوى احترافي
ازاي نستلم فلوسنا وأرباحنا من العمل اونلاين ؟
***
