أهلا بيكم يا أصدقاء في بوست جديد ! النهارده هنتكلم عن بايبال عامة وباي بال في مصر خاصة ، وهنجاوب على السؤال الاكثر تكرارًا

“ازاي نستلم الفلوس؟”

ازاي استلمت الفلوس اللي كسبتها من أول شغل ليا وازاي بستلم أي فلوس بكسبها اونلاين

وده أكتر سؤال بيجي في بال أي حد أول ما تيجي سيرة الشغل اونلاين لأن اكيد اول حاجة بنفكر فيها هى ازاي هاخد الفلوس في ايدي بعد ما تعبت واشتغلت عشان كدا هقولكم بالتفصيل ازاي نستلم الفلوس وفي آخر البوست هتلاقوا الخلاصة

ازاي بستلم فلوسي اللي بكسبها من الشغل اونلاين ؟

في مواقع كتيرة جدا للعمل اونلاين مفيهاش الامكانية اننا نبعت الفلوس على حساباتنا في البنوك العربية ، عشان كدا انا بستلم فلوسي عن طريق حسابي على موقع بايبال ، عملت حساب مجاني عليه وفعلته وربطته ببطاقة بنكية ، وبقيت بستلم الفلوس اللي بكسبها من الشغل الاونلاين عن طريق حسابي على بايبال

ايه هو بايبال Paypal ؟

بايبال هو موقع خدمي ، بيقدم خدمة ارسال واستقبال الأموال عن طريق الانترنت ، والناس بتقول عليه مجازًا : “بنك الكتروني” لأن فعليًا بايبال مش بنك حقيقي وله فروع وكدا ، هو مجرد موقع بنقدر من خلاله اننا نستقبل الفلوس ونرسلها لاشخاص تانيين

هل الموقع آمن ويستحق الثقة ؟

اكتر من 286 مليون شخص من اكتر من 200 دولة حول العالم بيستخدموا بايبال ، يعني الموقع مشهور وله سمعته الكويسة بين المستحدمين

ازاي نعمل حساب على موقع باي بال مصر أو من أي دولة تانية ؟

 

الخطوة الاولى : انشاء حساب بايبال Paypal:

أول حاجة هنعملها اننا نعمل اكونت ع موقع بايبال ودي حاجة مجانية تمامًا وأهم حاجة اننا ندخل بياناتنا صح الاسم يكون مظبوط مش اسم مستعار ويكون الاسم الاول والتاني زي ما في البطاقة يعني متكتبوش اسمكم باللقب لآ الاسم يكون مظبوط وهنعرف بعد شوية ليه الخطوة دي مهمة

هندخل على موقع بايبال عشان نعمل حساب عليه

هتظهر لنا الصفحة دي ، بيسألنا هل عايزين حساب بايبال شخصي ولا تجاري ، لما تيجوا تعملوا حساب على موقع بايبال بيطلع لكم اختيارين تعملوا حساب شخصي personal او تجاري business 

الاتنين تقدروا تعملوهم بشكل مجاني وتقدروا تحولوا من نوع الشخصي للتجاري والعكس في اي وقت وبشكل مجاني

وهنتكلم في بوست قادم ان شاء الله عن الفرق بين النوعين وايه مميزات كل نوع

هنضغط على العلم اللي فوق ، عشان نقدر نختار البلد بتاعتنا ونغير اللغة

هنختار البلد بتاعتنا من هنا

لما نختار دولة عربية هيظهر لنا من تحت اختيار اللغة العربية نختاره عشان نحول الموقع للغة العربية ، وطبعًا ممكن نغير اللغة لللغة الانجليزية او الفرنسية زي ما نحب

 

هندخل رقم الموبايل بتاعنا ونضغط التالي

 

هتظهر لنا الصفحة دي هندخل فيها البريد الالكتروني وكل البيانات المطلوبة

بعد كدا هتظهر لنا الصفحة دي ، هندخل فيها العنوان وباقي البيانات المطلوبة ، ونعلم صح في المربعات انناموافقين على الشروط ونضغط موافقة وانشاء حساب

 

بعد كدا هتطلع لنا الصفحة دي ، بيقولنا ان تم انشاء حساب بنجاح ، وكدا مبروك بقى عندكم حساب بايبال بكل سهولة

 

تاني خطوة هى اننا نربط البايبال ده بكارت ، هنقول دلوقتي الخطوات وبعد كدا نتكلم على كل التفاصيل اللي تخص الكارت ده

هندخل على بايبال ونعمل تسجيل الدخول أو log in من فوق

وندخل البريد الالكتروني وكلمة المرور

هيفتح لنا حسابنا في البايبال ، طبعا لو في أي فلوس في الحساب بتظهر لنا تحت ، بس عشان الحساب ده مفيهوش فلوس فمكتوب تحت 0.00

الخطوة الثانية : تفعيل حسابنا على باي بال وربطه ببطاقة لاستلام الاموال:

 

عشان نربط الحساب ببطاقة نقدر نستلم عليها الفلوس هنضغط على ربط بطاقة أو حساب بنكي

هنحتار أول اختيار “ربط بطاقة سحب أو ائتمان” ، لأننا منقدرش نربط حسابنا في بايبال ببنك في بلد عربي

هندخل هنا بيانات البطاقة اللي عايزين نربط حسابنا في بايبال عليها واللي عايزين نسحب بيها الفلوس

بعد ما ضيفنا بيانات الكارت وعشان يتأكدوا ان الكارت ده بتاعنا وشغال ؛ بايبال بيخصموا من الكارت حوالي يورو ونص وبعد كدا بيرجعوه لينا تاني والعملية دي بيكون ليها كود الكود ده بيتبعت لنا في رسالة على الموبايل اللي مربوط بحسابنا البنكي

بندخل الكود في موقع بايبال وكدا الكارت بيكون اتفعل ونقدر نستلم عليه الفلوس

 

شروط قبول وتفعيل حساب باي بال في مصر :

• الكارت يكون مكتوب عليه فيزا Visa مش ماستر كارد Mastercard
• ان يكون الاسم المكتوب ع الكارت هو نفس اسم الاكونت بتاعك ع بايبال بمعنى ان لو اسمك مها محمد حسن خلفاوي مينفعش اسمك ع بايبال يكون مها خلفاوي مثلا ، احتمال كبير الكارت يترفض الافضل اسم حساب البايبال يكون باسم مها محمد

 

وده ياخدنا لنقطة مهمة وهى ان لو لأي سبب عايزين تستلموا الفلوس ع كارت مش بتاعكم ، بتاع حد من الاهل او الاصدقاء يبقى تعملوا اكونت بايبال باسم الشخص اللي هتستخدموا الكارت بتاعه

ازاي يبقى عندنا كارت أو بطاقة نستلم عليها الفلوس من بايبال ؟

في اختيارات كتيرة منها :

بطاقة الـ Debit Card:

كارت الـ debit card أو البطاقة اللي بتكون مربوطة بشكل مباشر بحسابكم البنكي ، واللي ناس كتيرة في مصر بتسميها كارت الـ ATM

الكارت ده بيكون مكتوب عليه Visa ومربوط بالحساب بتاعكم في البنك،  وكمان الكارت ده لما تربطوه بالبايبال هينزل عليه الفلوس كل أول شهر يعني الفلوس بتدخل لحسابكم مباشرةً و تقدروا تسحبوا منه الفلوس زي ما بتسحبوا أي فلوس من حسابكم ، من البنك نفسه او من ماكينات الـ ATM 

عشان تحصلوا على الكارت ده بتفتحوا حساب في البنك وبتعملوا ايداع لمبلغ ما في الحساب ده ، وكل بنك بيكون له حد ادنى للمبلغ اللي مفروض تعملوا له ايداع عشان تقدروا تفتحوا حساب وفي بنوك بتدي كارت الـ Debit Card ده بشكل تلقائي مع فتح الحساب وفي بنوك لازم تقدموا طلب لاستخراك البطاقة دي

ميزة كارت البنك ان بيجي لكم رسالة على الموبايل فيها كود تفعيل البايبال بكل سهولة ولو في أي مشكلة تقدروا تتصلوا بالبنك وخدمة العملا بيكونوا متعاونين جدا

كمان في بنوك دلوقتي ليها تطبيقات على الموبايل ومواقع على الانترنت والموضوع بقى اسهل نوعًا ما عن قبل كدا

 

وتقدروا تتصلوا على أي بنك يعجبكم الاول قبل ما تروحوا البنك نفسه تستفسروا عن كل الاوراق والمصاريف المطلوبة وتجمعوا معلومات الاول قبل ما تعملوا المشوار ده

فيزا ايزي باي من البريد المصري :

كارت فيزا البريد المصري easy pay وده بيتعمل في مكتب البريد او البوسطة ومميزاته:

• بتحتاجوا البطاقة الشخصية ومبلغ صغير فاجراءات استخراجه مش صعبة

عيوبه:

• لازم تتصلوا بخدمة العملاء عشان تفعلوه وتاخدوا الكود وخدمة العملاء بتاعتهم كذا حد اشتكى منها
• لما بتيجوا تسحبوا الفلوس بيتخصم منها مبلغ والمبلغ ده كل شوية بيتغير، يعني من فترة طلعوا قانون انهم هياخدوا نسبة من الفلوس اللي هتسحبيها من الكارت ونسبة من مجموع كل الفلوس اللي اللي اتسحبت من الكارت قبل كدا ودي حاجة صعبة ومكلفة جدا لأن كدا النسبة اللي هتتخصم هتبقى كبيرة اوي والقرار ده اثار غضب ناس كتير من مستخدمين الكارت وبعد كدا اتغلى القرار ده

عن نفسي ماليش تجربة شخصية مع بطاقة ايزي باي ، عشان كدا لو قررتوا تستخدموه اقروا عنها كويس الاول واعرفوا اكتر عن تجارب الناس معاها

بطاقة الـ Credit Card :

في بعض الناس بتربط البايبال بتاعها ببطاقة ائتمان أو كريديت كارد Credit Card ، صحيح الفلوس هتنزل في الكارت عادي ولو في مديونية هتسدها بس عيوب الموضوع ده هى :

• لو عملية ارسال الفلوس على الكارت وسحبها دي اتكررت كتير الكارت هيكون معرض انه يتقفل لأن كدا الكارت مش بيستخدم استخدامه الصحيح المخصص له ، وده مش كلامي ده كلام موظف بأحد البنوك كنت استفسرت منه عن الموضوع ده
• لو جيتوا تسحبوا فلوس بشكل نقدي من ماكينة البنك باستخدام كارت كريديت كارد بيتخصم من الفلوس نسبة مش بسيطة لأن الموضوع بيكون كأنكم بتستلفوا من بطاقة الائتمان بتاعتكم أو بتاخدوا منها قرض ودي حاجة مش مظبوطة
  
  

الفرق بين الـ Credit & Debit Card :

للي متلخبط ومش عارف ايه الفرق بين الكروت دي كلها ، هشرح لكم الفرق بكل بساطة

كريديت كارد Credit Card : هو كارت بيطلع بضمان حاجة معينة ، بضمان المرتب أو بضمان وديعة أو شهادة في البنك وطريقة عمله هى كأننا بنستلف من الكارت عشان نشتري حاجة بعدين نرجع نرد الفلوس اللي استلفناها من الكارت ده

وبيكون له حد أو Limit ، يعني مثلا لو بطاقة كريديت كارد الحد بتاعها 20 ألف حنيه معناه اني اقدر استخدم البطاقة دي في شراء حاجات بقيمة 20 ألف جنيه ، بس لازم ارجع اسدد الفلوس دي قبل ما يمر كدة معينة على عملية الشراء ، ولو مسدينهاش في الموعد المحدد بيتحسب علينا فايدة ، يعني كأن الدين اللي علينا بقى اكتر

ديبيت كارد Debit Card : ده كارت مربوط مباشرةً بحسابنا في البنك، يعني بدل ما تمشوا بكل الفلوس اللي في حسابكم في البنك في جيبكم بتاخدوا الكارت ده ، يعني لو اشترينا بيه حاجة بتتخصم الفلوس من حسابنا في البنك وكدا معليناش أي ديون

والكارت ده الافضل اننا نستخدمه في حاجات محدودة ، والاحسن اننا منستعملهوش في الشراء اونلاين لأن لو الموقع اللي بتشتري منه مش موثوق فيه ممكن الكارت بتاعنا يتعرض للسرقة والاختراق hacking تتسرق الفلوس اللي فيه

لما ندخل ع أي موقع بنشتغل عليه ونطلب اننا نسحب الفلوس هيطلب مننا ندخل له ايميل البايبال وساعتها هندخل له الايميل اللي عاملين بيه اكونت البايبال

يعني لما باجي ادخل ع الاكاونت بتاعي ع بايبال بكتب ايميل وباسوورد انا بقى لما باجي اسحب الفلوس بكتب الايميل ده ان هو ده حساب البايبال اللي عايز اسحب عليه الفلوس عشان كدا لازم نركز واحنا بنكتب الايميل ونراجع عليه عشان منبعتش الفلوس لحد تاني بالغلط

في مواقع بتبعت الفلوس خلال 24 ساعة زي موقع خمسات ومستقل، في مواقع بتختار يومين في الاسبوع الفلوس بتتبعت خلالهم وفي مواقع بتخصم دولار لما نبعت الفلوس زي ابوورك بس الفلوس بتتبعت في نفس اللحظة

أول ما الفلوس تدخل بايبال هتيجي لنا رسالة ع الايميل ان الفلوس وصلت ولما نفتح بايبال هنلاقي ان الفلوس بقت موجودة في حسابنا فعلًا

امتى بنستلم الفلوس؟

الفلوس بتتحول تلقائيًا automatic من بايبال للكارت اللي ربطناه بيه في أول يوم عمل من كل شهر من غير مصاريف اضافية

لو احنا مش عايزين نستنى لأول الشهر نقدر نسحب الفلوس في أي وقت مقابل اننا ندفع 5 دولار زيادة

هل بايبال متاح في كل دول العالم ؟

بايبال متاح في دول كتيرة جدا حول العالم ، لكن في بعض الدول اللي مش بيشتغل فيها ، عشان تعرفوا اذا كانت بلدكم بايبال شغال فيها ولا لا ، تقدروا تدخلوا على الدول المدعومة من بايبال عشان تعرفوا ايه اللي مسموح لكم تعملوه في حسابكم على بايبال في بلدكم

نعمل ايه اذا باي بال مش متاح في بلدنا ؟

اذا بايبال مش متاح في بلدكم ساعتها هتلجأوا للحل التاني وهو انكم تعملوا حساب في بنك اجنبي زي بايونير payoneer أو بايسيرا paysera ، وهنتكلم عليهم في بوست قريب ان شاء الله ، لكن لو مستعجلين تقدروا تعملوا بحث عليهم وتشوفوا مين الافضل بالنسبة لكم لأن عشان تعملوا حساب عليهم الحساب مش بيكون مجاني وبيكون في مصاريف

يبقى يلا بينا نلخص كل حاجة

الخلاصة:

• هنعمل اكونت ع بايبال ونربط الاكونت بكارت معانا يكون مكتوب عليه Visa
• هنحول الفلوس من المواقع اللي شغالين عليها لبايبال
• في أول كل شهر بايبال اوتوماتيك بيبعت الفلوس دي ع الكارت بتاعنا اللي رابطينه بحسابنا في بايبال، لوعايزين نسحب الفلوس دي في أي يوم في الشهر نقدر نعمل كدا طبعًا بس بايبال هياخد 5 دولار مصاريف اضافية

آخر حاجة حابة اقولها ان الموضوع مش صعب خالص وفعلًا بلاش في الاول نشغل بالنا الفلوس هنستلمها ازاي ، نركز الاول هنجيب الفلوس ونكسبها منين

لازم الاول نلاقي طريقة نكسب بيها الفلوس والفلوس دي بتفضل ع الموقع اللي اشتغلنا عليه لحد ما نسحبها وقت ما نحب ، موضوع انكم تثبتوا نفسكم في شغلانة معينة ده بياخد وقت ومش بيجي بين يوم وليلة؛ عشان كدا ابدأوا شغل وبعد كدا دوروا على طريقة استلام الفلوس واسعوا فيها

فـ لو في اي ظروف دلوقتي تمنعكم انكم تسحبوا الفلوس او تعملوا حساب في البنك متخلوش الموضوع ده يعطلكم ويحبطكم واستغلوا الوقت في انكم تكسبوا فلوس وكل ما كانت الفلوس اكتر كل ما كان ليها طعم احلى واحساس اجمل وانتوا بتستلموها

بس كدا ولحد هنا خلص بوست النهارده يا رب يكون مفيد ولو في اي اسئلة اكتبوها لي في الكومنتات وهحاول ارد عليها في اسرع وقت

.

شكرًا عشان وصلتوا للنقطة دي وإلى اللقاء في بوست جديد

اخترت لك :

عشر نصائح تساعدك في العمل الحر من المنزل

أفكار للعمل من المنزل مناسبة للطلاب

فيديو : أسرار نجاح قناتي على يوتيوب في فترة قصيرة

***

دمتم بخير

Instagram| Facebook | Youtube

***