أهلا وسهلا بيكم يا أصدقاء في بوست جديد وتحدي جديد من التحديات الشهرية ، أهلا بيكم في تحدي ديسمبر تحفة ، عشان تشوفوا باقي التحديات ممكن تدخلوا على قسم التحديات لمدونتي
فكرة تحدي مارس تحفة
في تحدي مارس تحفة كل اللي علينا نعمله هو اننا نكتب سبع حاجات كل يوم ، تقعد مع نفسنا كل يوم لمدة 10 دقايق او ربع ساعة ، ونكتب قايمة بـ سبع حاجات ، كل يوم ممكن نعمل قايمة عن موضوع مختلف ، مثلا : سبع عادات عايزين نلتزم بيهم ، سبع كتب قرأناهم أو عايزين نقرأهم وهكذا ، ولو مش عارفين تكتبوا ايه ، هقولكم بعد شوية على اسئلة كتيرة ، اختاروا منها السؤال اللي يعجبكم وجاوبوا عليه بـ 7 حاجات
التحدي ممكن تنفذوه عن طريق انكم تكتبوا الـ7 حاجات بشكل ورقي في نوتة أو اجندة أو ورقة ، أو بشكل رقمي على اي تطبيق على الموبايل أو الكمبيوتر ، عن نفسي بستخدم تطبيق وموقع Notion
فكرة تحدي الشهر ده بسيطة وسهلة جدًا وكلنا نقدر نعملها ، ومع ذلك الالتزام بأي حاجة مش سهل ، عشان كدا بتحداكم انكم تلتزموا بالتحدي ده لمدة شهر ، لو بتشوفوا البوست ده في أي وقت بعد شهر مارس 2021 خلص تقدروا طبعًا تلتزموا وتبدأوا فيه
فوايد التحدي : تحدي مارس تحفة
ممكن حد يفكر ويقولي طيب ايه لازمة التحدي ده وهستفيد ايه لما نكتب سبع حاجات كل يوم ؟
- أول فايدة اننا نقضي وقت مع نفسنا ، وقت خاص بينا ، في ايام بتعدي علينا روتين الحياة بياخدنا وبنحس اننا في دوامة أو زي المربوطين في ساقية ، كل يوم شبه اللي قبله ، حلو اننا نكسر الروتين والدوامة دي باننا نقعد كل يوم لمدة عشر دقايق او ربع ساعة بس نفكر في حاجة خاصة بينا
- تاني فايدة هى تسجيل الافكار وحمايتها من الضياع ، كام مرة جت لكم فكرة حلوة جدا بس ضاعت واتنست لأنكم مكتبتوهاش؟ لما تسجلوا الافكار اللي بتيجي لكم ده هيساعدكم انكم تحتفظوا بالافكار دي بشكل مدون ومكتوب ، وكمان لو في فكرة او مشروع في بالكم بس مش عارفين تشتغلوا عليه حاليا وكل شوية تيجي في بالكم ده بيعمل عليكم ضغط عصبي وتوتر وقلق ، لما تنقلوا الافكار دي من دماغكم على ورق أو في نوت على الموبايل ده هيساعدكم ان التوتر يقل لأن ساعات بنكون متضايقين أو متوترين ومش عارفين ايه السبب ، لما نبدأ نفكر ونكتب الاسباب دي التوتر والضيق ده بيقل ، لأن أول خطوة في حل أي مشكلة هو اننا نعرف المشكلة ايه وفين
- تالت فايدة هى ان التحدي ده هيساعدكم على الابداع ، هيساعدكم تكتشفوا نفسكم من أول وجديد ، يعني لو قررتوا تكتبوا سبع مشاريع عايزين تعملوها أو سبع مهارات عايزين تنموها ، وهتبدأوا فعليًا تاخدوا خطوات عملية عشان نتعلم المهارات دي ونطور من نفسنا
- رابع فايدة انعاش الذاكرة ، وده عن طريق اننا ممكن السبع حاجات يكونوا حاجات نفتكرها ، وننفض التراب اللي على الذاكرة ، مثلا نفتكر سبع اماكن روحناهم أو سبع كتب قريناهم
أمثلة على الاسئلة:
لو محتارين ايه الـ 7 حاجات اللي عايزين تكتبوهم في أي يوم في تحدي مارس تحفة اختاروا أي سؤال من هنا وجاوبوا عليه بسبع حاجات
- سبع كتب قرأتوهم قبل كدا
- سبع كتب عايزين تقروهم
- سبع مهارات عايزين تنموها
- سبع كورسات عايزين تاخدوها
- اكتر سبع قنوات يوتيوب بتحبوها
- سبع حسابات على انستجرام بتتابعوها وبتحبوا المحتوى بتاعهم
- سبع عادات صحية نفسكم تلتزموا بيها
- سبع مصادر للدخل نفسكم يبقوا موجودين عندكم وبتكسبوا منهم فلوس
- سبع مصادر للتعلم من المنزل
- سبع افكار لفيديوهات يوتيوب – لو عندكم قناة يوتيوب أو لو ناويين تفتحوا قناة يوتيوب
- سبع كورسات ممكن تقدموها ، لو حبيتوا تقدموا كورسات
- سبع لغات نفسكم تتقنوها
- سبع تمارين رياضية تعرفوهم
- سبع اكلات حادقة – مالحة – بتحبوها
- اسماء سبع اشخاص كنتم تعرفوهم في مرحلة المدرسة
- سبع بلاد نفسكم تسافروا لها
- سبع حاجات نفسكم تشتروهم
- سبع معالم سياحية تعرفوهم
- سبع حلويات بتحبوها
- اسماء سبع اشخاص كنتم تعرفوهم وقت الجامعة
- سبع تطبيقات applications عندكم على الموبايل
- سبع مميزات أو ايجابيات شايفينهم في نفسكم
- سبع سلبيات أو عيوب شايفينهم في نفسكم
- سبع شعارات Logos بتحبوهم
- سبع نعم في حياتكم بتحمدوا ربنا على وجودهم
- سبع حاجات بتحسسكم بالسعادة وبتعدل مزاجكم
- سبع اهداف نفسكم تحققوها خلال السنة دي ان شاء الله
- سبع مواقع مفيدة في مجال تخصصكم
- سبع اماكن بتحبوهم في بلدكم أو مدينتكم
- سبع منتجات حقيقية أو رقمية لو عندكم متجر تحبوا تبيعوها
وطبعًا تقدروا تختاروا أي سبع حاجات تحبوها ، ودي مجرد اقتراحات ، متنسوش تشاركوني في التحدي وتنزلوه في ستوري وتعملوا لي منشن @tohfaworld وانا كمان هنزل ستوري كل يوم بقائمة السبع حاجات بتاعتي
ولحد هنا خلص بوست النهارده ، هنبسط جدًا بمشاركتكم في التحدي وتفاعلكم معايا ، قولوا لي تحبوا التحديات الجاية تكون عن ايه ؟ وإلى اللقاء في بوست جديد !
.
شكرًا عشان وصلتوا للنقطة دي ودمتم بخير
***
يلا نبقى اصدقاء هناك كمان
***
اخترت لك :
مصادر لتعلم الجرافيك ديزاين من الصفر
انا قريت المقال في سبع دقايق ??♂️?
شكرًا جدًا جدًا انك فضلت تقضي الوقت ده في قراءة المقال