اهدافي للعام الجديد 2021

أهلًا وسهلًا بيكم يا أصدقاء في بوست جديد ! بوست النهارده هتكلم معاكم فيه عن اهدافي للعام الجديد 2021 إن شاء الله

بحب دايمًا البدايات الجديدة ، بداية أسبوع جديد ، بداية شهر جديد ، بداية سنة جديدة ، بحسها بتديني حماسة وتشجيع إني ابدأ واركز واخطط للجاي وانظم حياتي بشكل اكبر

عشان كدا بوست النهارده هيكون عبارة عن رغي وكلام عن الحاجات اللي نفسي احققها في السنة الجديدة ان شاء الله ، متنسوش تشاركوني في الكومنتات أهدافكم للسنة الجديدة عشان ناخد الالهام من بعض

هدفي الأساسي للعام الجديد

لو في كلمة واحدة عايزة اوصف بيها اهدافي للعام الجديد ان شاء الله فالكلمة دي هتكون ” التنظيم “

هدفي الأساسي للسنة الجديدة هو ان التنظيم يشمل كل جوانب حياتي ، عايزة كل  حاجة تبقى منظمة ومرتبة ، مع الوقت لاحظت إني بكون مرتاحة نفسيًا أكتر لما كل جاجة حواليا تبقى مترتبة منظمة ، سواء بيتي ، مكتبي ، المهام اللي ورايا

لما يومي ووقتي نفسه يكونوا منظمين التوتر بيقل ، وبحس نفسيتي احسن وبقدر انجز بشكل اكبر بكتير بيجي لي أفكار اكتر وبقدر ابدع بشكل كبير تنظيم المنزل

اهدافي للعام الجديد بالتفصيل

*قررت اني اقسم اهدافي للسنة الجديدة 2021 ان شاء الله لاكتر من كذا جانب في حياتي ، الجانب الصحي الجانب المالي الجانب الحياتي والجانب المهني

أهدافي للعام الجديد 2021 من الجانب الصحي

في القسم ده من حياتي قررت اني اكون منظمة اكتر من حيث اني احدد التوقيت بتاع كل حاجة عايزة اعملها ، عن نفسي عايزة اشرب ماية اكتر ودي حاجة بقالي سنين وسنين بحاول احافظ عليها ، وعشان يبقى الهدف أسهل قررت اني اشرب كل يوم الصيح اما اصحى كوباية ماية كاملة ، وحددت 4 مواعيد تانية اشرب فيهم ماية وهما:

• الساعة 2 الضهر
• الساعة 5 المغرب
• الساعة 7 مساءً
• الساعة 9 مساءً

وفي الأوقات دي هشرب ماية على قد ما اقدر ، ممكن كوباية وممكن اكتر ، زي ما احب

تاني هدف ليا في الجاب الصحي من حياتي هو اني آكل اكل صحي اكتر ، ده ياخدنا للتنظيم تاني ، بمعنى تنظيم الوجبات

قررت اني يوم السبت من كل أسبوع اشوف ايه الاكل المتوفر عندي في التلاجة وابدأ اخطط لوجبات الأسبوع ده هيقلل من اهدار الطعام وان يبقى في اكل يبوظ ويترمي وكمان هيخلي التلاجة منظمة اكتر لأن الاكل اللي فيها بيخلص أول بأول 

اهدافي للعام الجديد 2021 للجانب المهني

أول اربع شهور من سنة 2020 كنت لسه تايهة ومش عارفة احدد مجال اكمل فيه ، ومكنتش لسه اخترت مجالي ده ، في شهر ابريل 2020 بدأت اركز في مجالي اكتر واهتم بيه على انستجرام والمدونة ويوتيوب

ومع الوقت بدأت احط نظام يربط كل المنصات اللي انا موجودة عليها وبقدم محتوى فيها مع بعض ، بحيث استفيد من مميزات كل منصة فيهم بأكبر قدر ممكن

ولأني بشتغل من البيت فبيكون في أوقات صعب عليا اني الزم نفسي اني اخلص المهام اللي ورايا وساعات بسوف امور مهمة والمهام تتراكم عليا ، عشان كدا من أهم اهدافي للسنة الجديدة اني انظم وقتي بشكل دقيق جدًا وده عن طريق:

• تنظيم اليوم وتحديد وقت الراحة ووقت الشغل:

بحاول قدر الامكان اني الاقي أفضل شكل ليومي ، وبدأت فعلًا اقسم اليوم لفترات ، واحدد دي فترة الشغل دي فترة الراحة ، وبحاول امشي على النظام ده ولو نجح معايا اكيد هشارككم هجكي لكم ازاي نظمت يومي بالتفصيل

• تحديد المهام مسبقًا:

من اكتر الحاجات اللي بتضيع الوقت اننا نلاقي الوقت الفاضي ونبقى قاعدين مش عارفين هنعمل ايه ومشتتين بين ألف حاجة عايزين نعملها ، عشان كدا اكتر حاجة هتخلينا نتجنب المشكلة دي هى اننا نحدد الأهداف مسبقًا ونكتبها قبلها بيوم أو في بداية الأسبوع ، وده كمان بيساعد ان لما يكون في مهمة تيجي في بالنا فجأة نكتبها ونضيفها ليوم معين بدل ما نشتت نفسنا ونسيب اللي في ايديا ونروح لها لأن الكتابة أو التسجيل هتساعدنا اننا نحفظ الفكرة دي بدل ما تضيع ومنشتتش نفسنا

• تحديد أهداف ربع سنوية:

لو حاولتوا تخططوا لكل الأهداف والحاجات اللي عايزين تحققوها خلال السنة هيكون صعب جدًا لأن سنة يعني 12 شهر ودي فترة طويلة جدًا عشان تقدروا تخططوا لها وتحطوا على مدارها أهداف عايزين تحققوها

عشان كدا بحب اكتر اني احط أهداف عامة للسنة كلها ، واهداف مفصلة ودقيقة لكل 3 شهور من السنة، يعني ايه الحاجات اللي عايزة اكون انجزتها بنهاية شهر مارس ؟ وابدأ على هذا الأساس اقسم المهام الي عندي على شهر يناير فبراير ومارس

عن نفسي عايزة التزم باني اقدم محتوى مستمر على المدونة وبوتيوب خلال ال3 شهور دول من غير أي انقطاع ، ده معناه حوالي 13 فيديو و 14 بوست لمدونتي وده ياخدنا للهدف اللي بعد كدا

• التخطيط للمحتوى بشكل دوري:

عشان اقدر اني استمر في تقديم محتوى بشكل منظم لازم يكون عندي خطة مسبقة على الأقل العناوين الرئيسية للحاجة اللي هتكلم عنها ، عشان لو جيت كل اسبوع اقول هتكلم عن ايه النهارده ولسه هدور على الفكرة مش هقدر انجز ابدًا واقدم المحتوى في وقته ، لأن بالنسبة لي لو الفكرة الاساسية للفيديو أو بوست المدونة موجودة خلاص كدا باقي الأمر سهل وعندي خطوات همشي عليها وعارفة انا هعمل ايه

اهدافي للعام الجديد 2021 من ناحية الجانب المالي :

حطيت لنفسي هدف رقم معين عايزة اكسبه خلال أول 3 شهور من السنة ، الهدف ده هحققه عن طريق اني اتحكم اكتر في المصاريف والحاجات اللي بشتريها ، بحيث اقدر احوش الرقم ده ، تاني حاجة هى اني اشتغل اكتر على المحتوى اللي بقدمه والمنتجات اللي ببيعها بحيث نسبة المبيعات والارباح تزيد بإذن الله واقدر اوصل للرقم اللي عايزة احققه ده خلال الفترة الزمنية اللي هى 3 شهور

اهدافي للعام الجديد 2021 من ناحية الجانب التعليمي وتطوير الذات :

انا دايمًا بقول ان التعلم مالوش عمر ومالوش نهاية ، عشان كدا هدفي العام ده ان كل شهر اخلص كورس جديد وكمان اقرأ كتاب واحد على الأقل

لما عملت تحدي ديسمبر تحفة ؛ كان من اهدافي الاساسية هو نشر العلم والمعرفة وتاني حاجة ان اليوم ميخلصش بدون أي انجاز ولو صغير ، لو اليوم صعب وطويل ومهما كنا مشغولين اكيد في وقت نقدر نتفرج فيه على فيديو صغير من كورس أو نقرا صفحة من كتاب ، اذا ثبتنا مواعيد للعادتين دول خلال يومنا ، ونفذناهم كل يوم ساعتها بنهاية اليوم هنكون راضيين عن نفسنا مهما كان يومنا طويل ومتعب او حاسين اننا ضيعناه من غير ما نخلص المهام اللي ورانا

وبالنسبة لي الوقت اللي ثبته للعادتين دول هو أول ما اصحى ، بعد ما اشرب كوباية الماية وقبل ما اقعد على اللابتوب واشوف اللي ورايا هشوف فيديو من كورس واقرا صفحة واحدة على الاقل من كتاب وتقدروا تشوفوا الكتب اللي بحبها وبرشحها لكم في صفحة مكتبتي وتقدروا تدخلوا عليها من هنا

اهدافي للعام الجديد 2021 من ناحية الجانب الحياتي :

مش عارفة اسمي الجانب ده ايه بالظبط ، لكن اقصد بيه بيتي والمكان اللي عايشة فيه ، وده هدف بدأته في شهر ديسمبر 2020

بدأت احس ان لو البيت مكركب اعصابي بتكون مضغوطة ، ومش بس البيت لآ كمان مش بحب افتح درج أو أي مكان تخزين واحس ان فوقيه تحتيه ومش عارفة اوصل للي جواه بسهولة

الغريب في الموضوع اني عمري ما كنت كدا ، بالعكس كنت انسانة فوضوية جدًا وبتعايش مع الفوضى عاد جدًا ، مش عارفة ايه اللي قلب حالي

يمكن عشان بقيت بقضي أغلب وقتي في البيت فـ بقيت بحب اكتر ان الدنيا حواليا تبقى رايقة ومرتبة اكتر  بدأت الاحظ ان في حاجات كتيرة عندي مش بستخدمها ، وبدأت امسك مكان مكان في البيت واشوف ايه اللي فيه ! ايه اللي ممكن استخدمه فعلًا وايه اللي عمري ما هستخدمه ابدًا وبدأت فعلًا اتخلص من الحاجات اللي عارفة اني عمري ما هستخدمها ابدًا ، بتخلص منها يا اما اتبرع بيها لو حاجات سليمة وممكن تنفع غيري او برميها لو حاجات بايظة اساسًا أو لو حاجات بحتاجها على فترات متباعدة بخزنها في سحارة سرير أو مكان بعيد شوية

كمان الحلو اني لقيت ان عندي حاجات ممكن استخدمها بس ناسية انها عندي فـ بدأت اطلعها واخليها في مكان ظاهر عشان تبقى قدام عيني واستخدمها كل ما اشوفها فواحد من أهم اهدافي هو اني احافظ على بيتي مرتب ومنظم قدر الامكان اكيد الدنيا هتتقلب وتبقى فوضى تاني بس المهم اني ارجع انظمها بسرعة قبل ما الفوضى تزيد

ودي كانت أهدافي للعام الجديد 2021 ، شاركوني في الكومنتات أهدافكم للسنة الجديدة ، وخلينا ناخد الالهام من بعض ، وشكرًا على تفاعلكم معايا على انستجرام ، أهدافكم حلوة جدا ومشجعة

.

شكرًا عشان وصلتوا للنقطة دي وإلى اللقاء في بوست جديد

دمتم بخير

اخترت لك :

اجاباتي على اسئلة The Liebster Award

عشر نصائح تساعدك في العمل الحر من المنزل

فيديو : أسرار نجاح قناتي على يوتيوب في فترة قصيرة

Instagram| Facebook | Youtube

***