أهلًا يا أصدقاء ، يا رب تكونوا بألف خير ، في بوست النهارده هجاوب على مجموعة من الاسئلة اللي طرحتها عليها عزيزتي جوهرة من مدونة joharhworld كجزء من سلسلة بوستات ومقالات جائزة The Liebster Award اللي بدأها ومكمل فيها مدونين كتير من مختلف بلاد العالم ، والهدف الاساسي من السلسلة دي اكتشاف مدونات جديدة ونشرها بشكل اكبر وفعلًا انا سعيدة بالفكرة جدًا لأني اكتشفت مدونات جديدة
الفكرة برعاية The Liebster Award وتقدروا تعرفوا عنهم اكتر من هنا
حابة الأول اديكم فكرة عن جائزة The Liebster Award:
ليبستر كلمة المانية الاصل معناها أحلى أجمل أو أحسن ، والهدف من الجايزة دي هو الترويج لمدونات جديدة واننا نساعدهم على الانتشار اكتر ونوصل الناس ليهم
و هى جائزة افتراضية موجودة فقط على الانترنت وبيتم منحها من قبل المدونين لمدونين آخرين ، وأول شخص فاز بالجائزة دي كان سنة 2011 م
في البداية كانت المسابقة فقط للمدونات اللي بتضم أقل من 2000 قارئ بس بسبب الانتشار الكبير للجايزة اصبحت دلوقتي للمدونات اللي فيها أقل من 200 قارئ ، بس ده ميمنعش اننا نشارك وندعم مدونات تانية حتى لو عدد القراء أكبر من كدا
تم ترشيحي وذكر مدونتي من قبل الجميلة جوهرة ، وتقدروا تدخلوا على مدونتها الجميلة من هنا
شكرًا ليكي عزيزتي جوهرة ، سعيدة اني اتعرفت عليكي جدًا
الترشيح ده بيكون عبارة عن ذكر مدونتي في مدونتها الخاصة وانها تسألني مجموعة من الاسئلة واجاوب عليها معاكم هنا وعشان نكمل السلسلة فأنا كمان هرشح مدونات تانية واسألهم مجموعة اسئلة والمطلوب منهم يجاوبوا عليها في مدونتهم باتباع القواعد الآتية:
- Thank the person who nominated you and provide a link back to their blog so others can find them.
- Answer the questions asked by the blogger who nominated you.
- Nominate other bloggers and ask them 11 new questions.
- Notify the nominees about it by commenting on one of their blog posts.
- List the rules and display a Liebster Blogger Award logo on your post and/or your blog site.
- قم بشكر الشخص الذي رشحك ، و وضع رابط مدونته كي يتمكن الناس من العثور على مدونته.
- أجب على الأسئلة التي طرحت عليك من قبل المدون.
- رشح مدونين آخرين واسئلهم ١١ سؤال
- اخبر المدونين الذين قمت بترشيحهم عبر التعليق في إحدى تدويناتهم أو مقالانهم
- اكتب قواعد المسابقة و ضع شعارها في منشورك أو في مدونتك
1. متى بدأت التدوين ؟
بدأت التدوين من زمان جدًا يمكن من 5 سنوات ، كنت لسه في الكلية وجت لي الفكرة اني عايزة اصنع محتوى بس مكنتش مستقرة او واخدة قرار هصنع محتوى عن ايه بالظبط ، بس اللي كنت عارفاه ومتأكدة منه هو اني كنت عايزة يكون في زي مكان أو منصة بكلم الناس منها ، فبدأت أول مدونة ليا خالص على Blogger وبعد كدا لما حبيت الموضوع قررت انه يبقى احترافي اكتر وفتحت الموقع اللي احنا فيه ده tohfa.me ، في شهر نوفمبر سنة 2019
***
2. لماذا تكتبين ؟ ما هدفك ؟
اعتقد افضل اجابة للسؤال ده هو اني “بحبها” ؛ بكتب عشان بحب الكتابة ، انا اصلًا انسانة رغاية ، في امتحان ثانوية عامة مش فاكرة كان موضوع اتعبير عن ايه بس فاكرة اني كتبت 5 صفحات فلوسكاب A4 ، معرفش الكلام جه منين ، بس عمومًا لما ببدأ كتابة سواء على ورقة وقلم أو حتى على كيبورد الكمبيوتر الكلام بيتدفق في دماغي وبنسجم وبقدر اعبر اكتر اثناء الكتابة
هدفي الرئيسي من الكتابة هو اني افيد الناس واترك اثر طيب ، ودايمًا بقول لو تركت اثر طيب في حياة شخص واحد أو حسنت من حاله فهكون راضية جدًا عن نفسي وهكون فخورة بكدا جدا
***
3. هل يزعجك قلة الجمهور في مجال المدونات؟ ، فصلي اجابتك .
في البداية كان الموضوع بيزعجني شوية ، لكن بعد كدا عرفت ان المشكلة مش في مجال المدونات والمشكلة عندي ، لأنه لما بحثت اكتر في الموضوع فهمت وعرفت انه لما نكتب مقالات وبوستات مفيدة وقيمة ويكون فيها حلول لمشاكل الناس ونكتب فعلا عن المواضيع اللي الناس بتبحث عنها وفي حاجة لقراءتها ساعتها هنلاقي الجمهور زاد ، ده بالإضافة إلى انه لما نستخدم طرق صحيحة للترويج لمدونتنا بين الجمهور المهتم بالمجال بتاعنا هنقدر نلاقي الجمهور المناسب اللي هيحب المدونة بتاعتنا وهيتابعها وهيستنى كل جديد منها
***
4. ماهي طقوسك للكتابة ؟
طقوسي بسيطة جدًا ، بقعد في مكان هادي أو على الأقل مفيش حد بيكلمني كل شوية ويقطع حبل افكاري وتركيزي وجبي ازاة -زجاجة – ماية وافتح اللابتوب بتاعي وابدأ اكتب ، ساعات بجمع أفكار الأول وساعات بعمل بحث عن الموضوع وبعدين أبدأ اكتب بأسلوبي على أساس الأفكار اللي جمعتها
***
5. بسطر واحد اوصفي شخصيتك ؟
السؤال ده أصعب سؤال بالنسبة لي ، بس خلينا نقول دبلوماسية ، وبعمل من الفسيخ شربات
***
6. كائن صباحي أم ليلي ؟ ، قهوة أم شاي ؟ ، شتاء أم صيف ؟
- صباحي ، أنا بحب الصباح جدًا ، وبغض النظر عن انه احيانًا كتيرة بضطر اسهر عشان اخلص اللي ورايا ودي حاجة بتبوظ لي يومي لكن مهما انجزت بالليل ، لو صحيت متأخر وفوت فترة الصباح بحس بإحساس مش حلو وانه كدا اتأخرت على اليوم واليوم باظ
- ولا قهوة ولا شاي ، بفضل المشروبات العشبية زي النعناع والبابونج والحاجات دي
- مفيش احلى من الجو المعتدل بتاع الربيع أو ما قبل الشتاء كدا ؛ لما يكون الجو حلو بدون اضافات من غير تكيف أو دفاية ، لكن لو لازم اختار فهختار الصيف، كنت فاكرة نفسي بحب الشتاء ، لكن بعد ما جربت الشتا وبرده والكسل اللي بيكون الواحد فيه لقيت اني بقيت بعد الايام عشان الشتاء يخلص ونرجع للصيف والنشاط والحيوية تاني
***
7. أي منصة اجتماعية تفضلين ( تويتر ، انستغرام ، فيسبوك …. غيره ) ؟ و لماذا ؟
انستجرام ، بحب انستجرام جدًا لأني لما بدأت عليه قدرت اوصل لناس كتيرة جدًا مهتمة بالمحتوى اللي بقدمه واتعرفت على ناس كتيرة ، بعكس فيسبوك اللي بدأت عليه من زمان جدًا ومقدرتش أوصل لربع الناس اللي قدرت اوصل لهم على انستجرام
***
8. كيف كانت سنة 2020 معك ؟
بالرغم من الأحداث الغير متوقعة والغير مألوفة اللي حصلت في السنة دي بس أحب اقول انها كانت سنة مليانة بالنعم اللي ربنا انعم بيها علينا ، الحمدلله والشكر لله ، ومن أجمل الحاجات اللي حصلت ان الاحداث دي عرفتنا ان قد ايه مفيش حاجة مضمونة وان كل حاجة ممكن تتغير في غمضة عين ، وقد ايه في نعم من كتر ما الفناها مبقيناش واخدين بالنا منها ، فـ الحمدلله على نعمة الصحة والعافية ونعمة الروتين والأيام العادية اللي شبه بعضها
***
9. اكتبي جملة تسويقية تجعل الجمهور يهتم بقراءة مدونتك ؟
مدونتي هى المكان الاسب ليكم لو عايزين تتعلموا حاجة جديدة ، تكسبوا فلوس من البيت ويبقى عندكم دخل مادي مستقل خاص بيكم
***
10. كتاب مفضل ترشحينه لقارئ محتار
كتاب أسرار عقل المليونير لـ تز هارف ايكر ولمحبين الروايات : رواية عداء الطائرة الورقية لخالد حسيني
***
11. أهم عمل تقومين فيه ضمن روتينك اليومي ؟
اقف لحظة مع نفسي واركز في الوقت اللي بيعدي واتأمل في النعم اللي حواليا ، لمة العيلة ، صوت العصافير ، نسيم الفجر
***
ولحد هنا خلصت الاسئلة ، يا رب تكونوا انسبطوا بالبوست ده ، ودلوقتي هرشح لكم مدونات تانية عشان نسألهم اسئلة
- مدونة هاجر جورنال لصاحبتها هاجر الغريب وفيها موضوعات مختلفة زي مثلا العمل الحر من المنزل ، تقدروا تدخلوا عليها من هنا
- مدونة شذى عبدالله في مجال تطوير الذات والايجابية ، تقدروا تدخلوا عليها من هنا
- مدونة الشروق لصاحبتها المشرقة شروق وتعتبر كنز ثمين للمطبوعات والمنظمات ، انصحكم بزيارتها ، تقدروا تدخلوا عليها من هنا
والاسئلة اللي حابة اسألها لهم هى :
- كيف بدأ شغفك بمجال تخصصك ؟
- ما اكثر ما تحبيه بالتدوين ؟
- عادة أو طبع تريدين تغييره في نفسك ، ما هى ؟
- ما هو مشروبك المفضل في الفترة الحالية ؟
- ماذا تفضلين ؟ الصباح أم المساء ؟ الشتاء أم الصيف ؟ هل انتِ كائن صباحي أم ليلي ؟
- هل تفضلين تنظيم المهام بشكل رقمي أم ورقي ؟
- ما القصة وراء اسم مدونتك ؟
- ما هى هواياتك ؟
- عندما تأتيكِ حالة من الكسل والاحباط كيف تعودين لنشاطك وحماسك مرة اخرى ؟
- ما هى اللغة التي تحلمين بتعلمها ؟
- هل تفضلين العمل الحر أو الوظيفة ولماذا ؟
ولحد هنا خلص بوست النهارده ، يا رب يكون عجبكم
.
شكرًا عشان وصلتوا للنقطة دي وإلى اللقاء في بوست جديد
دمتم بخير
?يلا نبقى اصدقاء هناك كمان
***
اخترت لك :
دليلك لجدولة محتوى انستجرام مجانًا لزيادة المتابعين
أفكار لمتاجر مربحة في مجال الطباعة بالطلب
