أهلا بيكم يا اصدقاء ! في بوست النهارده هنتكلم عن الـ طباعة بالطلب بس المرة دي هنتكلم عن اكتر من 20 فكرة لمجالات مربحة في المجال ده نقدر نختار مجال منهم ونعمل عنه تصاميم ونبيعها ولو عايزين يبقى عندك خطة عملية تمشوا عليها عشان مجال الـ طباعة بالطلب يبقى مصدر دخل مربح يُعتمد عليه شوفوا الفيديو ده
الموضوع كله بيعتمد ع اننا نفكر في الناس اللي عايزينهم يبقوا العملا بتوعنا وعايزنهم يشتروا التي شيرتات او المنتجات اللي عليها التصاميم بتاعتنا ، نتخيل حياتهم عاملة ازاي وايه الاهتمامات بتاعتهم عشان نقدر نوصل لتصاميم اكتر
البوست ده هيكون متجدد وكل ما الاقي مجال جديد ناجح هزوده هنا في البوست ده
ودلوقتي يلا بينا نبدأ في اكتر من 20 نيش أو مجال لأفكار متاجر مربحة في مجال الـ طباعة بالطلب
1 : مجال الأمهات والآباء والاطفال
تقدروا تعملوا تصاميم مكتوب عليها كلمات وجمل بسيطة زي
Mama , Dad , Big Sister , Aunt is the best !, Uncle is my favourite
وتصاميم كتيرة جدا وتبيعوها ع منتجات مختلفة والميزة في المجال ده انكم تقدروا تعلموا تصاميم في صورة ان تصميمين يكونوا مع بعض يعني تي شيرت للأم مكتوب عليه
Mom of Pincess
وتي شيرت لطفلة عليه تصميم
I am the Princess
وتروجوا لهم ع حساب انستجرام مع بعض انهم مجموعة لايقة ع بعض بحيث الام هتشتريت تي شيرت ليها وتي شيرت لبنتها وبكدا بدل ما تبيعوا منتج واحد هتبيعوا منتجين والربح هيبقى اكتر
***
2 : مجال الطبيعة
لو بتحبوا تصوروا صور حلوة للطبيعة البحر الشجر الغابات السما الشروق والغروب المناظر الطبيعية بشكل عام تقدروا تحطوا الصور دي ع منتجات وتبيعوها مش لازم تي شيرتات ممكن ستاير مخدات كوفر لابتوب وموبايلات ومنتجات تانية كتيرة حسب كل موقع والمنتجات المتاحة عليه
وتقدروا تعرفوا اكتر عن افضل مواقع الـ طباعة بالطلب اللي تقدروا تشتغلوا عليها كـ مصممين جرافيك من البوست ده جمعت لكم فيه أفضل مواقع الـ طباعة بالطلب بكل التفاصيل بتاعتها وكل الاسئلة اللي ممكن تخطر ع بالكم
غير الصور الفوتوغرافية تقدروا كمان تعملوا تصاميم لمحبين الطبيعة زي مثلا
Sea Lover
Everything is fine when there is sunshine
***
3 : مجال الرياضة
في جمل كتيرة اوي تقدروا تحطوها ع تي شيرتات ومنتجات عن ممارسة الرياضة سواء جمل تحفيزية زي
Installing Muscles, Please Wait
You are only one workout away from a good mood
وكمان تقدروا تعملوا تصاميم مختلف للناس اللي بتلعب رياضة معينة ، يعني مثلا تفكروا في رياضة زي التنس وتعملوا تصاميم للناس اللي بتلعب تنس
تفكروا في الناس اللي بتحب تمشي وتعملوا تصاميم للمشي وليكن مثلا مكتوب عليها
Walk ! Walk ! Walk!
فكروا في اي رياضة واعملوا لها مجموعة تصاميم
تصاميم لرياضات مختلفة
***
4 : مجال اصحاب الحرف والهوايات
ممكن يكون مجال تخصص متجركم موجه لاصحاب الحرف والهوايات زي التريكو والكروشيه وفن طي الورق وغيره من الفنون دي
***
5 : مجال محبين القطط
في ناس كتيرة جدا بتحب تربية القطط وبتحب تلبس تي شيرتات عليها تصاميم بتدل على انها بتربي قطة أو انها بتحب القطط
***
6 : مجال محبين الطبخ
سواء سيدات أو رجال ناس كتيرة بتحب تقضي وقت طويل في المطبخ ، سواء بتعمل اكلة حلوة ، بتجرب وصفة جديدة وكمان ناس بتصور فيديوهات طبخ وبتقدمها للناس ، ده غير ان في ناس كتيرة تحب تهادي قريبها اصحابها اللي بيحبوا الطبخ بهدية مميزة عن المجال اللي بيحبوه وبيبتكروا ويبدعوا فيه زي الطبخ
***
7 : مجال محبين الكلاب
ناس كتيرة جدًا بتربي كلاب وبتعتبرها جزء لا يتجزأ من حياتها ، المجال ده حلو جدا وله جمهوره
***
8 : مجال السفر والرحلات
الناس اللي هوايتهم السفر ، وبيسافروا باستمرار وبيتصوروا صور وفيديوهات يوثقوا بيها رحلاتهم ، اكيد هيحبوا انهم يلبسوا هدوم ويبقى عندهم حاجات زي جرابات الموبايلات واللابتوب عليها جمل وتصاميم مميزة بتعبر عن حبهم للسفر
***
9 : مجال الكائنات والطبيعة البحرية
هو يمكن حاجة مش مشهورة اوي بس في ماس هايتها الغوص في اعماق البحار والمحيطات عشان يشوفوا الكائنات والطبيعة البحرية ، ده غير الناس المهتمة بالقروش والدلافين وكل الكائنات اللي بتعيش في البحر ، ممكن يبقى مجال متجركم قائم على الحياة البحرية ، والكائنات اللي بتعيش فيها وحمايتها والحفاظ عليها
***
10 : الوظائف
ممكن يبقى مجال تخصصكم لوظائف مختلفة ، وتنزلوا تصاميم مكتوب عليها
Doctor & Proud
Trust me I’m a Pharmacist
Engineer & Proud
وهكذا ، بحيث ان صاحب أي وظيفة ما يبقى عايز يلبس تي شيرتات عليها تصاميم مميزة بتعبر عنه
***
11 : مجال الخريجين وطلبة الجامعة
ممكن يكون مجال تخصص متجركم هو تصاميم لطلبة الجامعة والخريجين ، سواء كانوا لسه في أول سنة وبيدرسوا بتخصص معين أو وصلوا لمنتصف المدة من الدراسة أو خلاص هيتخرجوا السنة دي من الجامعة
***
12 : مجال الفنون زي الرسم
ناس كتيرة بتقضي اغلب يومها في هواية جميلة زي الرسم ، وممكن كمان تكون مصدر دخلهم هو هواية زي الرسم ، الفنانين دول ممكن جدًا يحبوا يبقى عندهم هدوم ومنتجات عليها تصاميم بتعبر عنهم زي اللي هتبيعوها في متجركم
***
13 : مجال التصوير
التصوير الايام دي مبقاش مجرد هواية لآ ده كمان بقى مهنة ناس كتيرة بتعتمد عليها بشكل اساسي ، ممكن يكون التصاميم بناعتكم موجهة للفوتوجرافرز أو المصورين زي مثلا ان يكون عليها جمل عن التصوير وتصاميم فيها كاميرات وكل الحاجات اللي تهم المصورين وبتعبر عنهم
***
14 : مجال الفضاء والفلك
هو يمكن مجال غريب شوية لكن انا لاحظت ان في ناس كتيرة مهتمة بالمجال ده لدرجة انه بيحلموا يسافروا للفضاء ، وبيتابعوا اخبار الفضاء والاحداث الفلكية بشكل دوري زي مثلا الخسوف وتساقط الشهب وغيره وبيتابعوا اخبار وكالات الفضاء الكبيرة زي ناسا وسبيس اكس ، المجال ده بالرغم من انه غريب لكن مفيش فيه تنافسية عالية ومفيش فيه تصاميم كتيرة بالرغم من ان الجمهور بتاعه كبير واكيد هيهتم انه يشتري منتجات بتعبر عنه
***
15 : مجال الاقوال الايجابية
في أقوال ايجابية وتحفيزية كتيرة جدًا تقدروا تعملوها كتصاميم على منتجات الطباعة بالطلب المختلفة لكن مهم انكم متاخدوش أقوال مأثورة تاعت حد ، وعشان كدا انا بفضل الجمل القصير اللي من كلمتين أو تلاتة وبتأكد الأول انها مش بتاعت حد
***
16 : مجال بلاد العالم
شوفت من كام يوم اكتر من متجر وعجبوني جدا وكان مجال تخصصهم هو بلاد العالم ، وماسكين كذا بلد وكل بلد فيهم له تصاميم مختلفة سواء اسم البلد أو المدينة مكتوب ومرسوم فوقه معلم من معالم البلد أو المدينة دي بجد كانت تصاميم مميزة جدًا وعجبتني اوي
***
17 : مجال القهوة والمشاريب
ناس كتيرة بتحب القهوة ومشاريب تانية زي الشاي وغيره ، حلو جدا ان يكون ده مجال تخصصكم ، مجال سهل وبسيط بس في ناس كتير بتحب تشتري منتجات مكتوب عليها مثلا
But first Coffee
***
18 : مجال الاكلات
الاكلات الموجودة حوالينا كتيرة جدة ومختلفة ، تخيلوا انكم تقدروا يبقى مجال تخصصكم الاكلات ، زي مثلا تصاميم مكتوب عليها
I love Sushi
Fries are my best Friends
Shut up & Eat Burger
***
19 : مجال لا للتدخين
ومش شرط يكون بس مجال تخصصكم هو لا للتدخين لأ ممكن يكون لا لأي عادات سيئة مضرة ، بحيث تكون التصاميم بتاعتكم عليها عبارات ضد العادات السيئة دي
واحد من التي شيرتات الأكثر مبيعًا ع ريدبابل الاسبوع ده هو تي شيرت مكتوب عليه انا أم ضد الـ Vaping أو الشيشة الالكترونية
***
20 : مجال حب السيارات
اكيد قابلتكم ناس في حياتكم مجانين عربيات ، اكيد الناس دي تحب يكون عندها منتجات عليها تصاميم وجمل عن العربيات وحب العربيات وكل ما يتعلق بالسيارات
***
21 : مجال طلاب المدارس والمدرسين
اثناء العام الدراسي المدرسين – المعلمين – ممكن يحبوا يلبسوا تي شيرتات عليها جمل مميزة بتعبر عن وظيفتهم ودورهم في المجتمع
ده غير ان في أولياء امور كتيرة تحب تلبس أولادها تي شيرتات عليها تصاميم بتعبر عن الصف الدراسي اللي هما فيه
***
لو عايزين تعلموا تصاميم احترافية بشكل بسيط ومجاني ، تقدروا تشوفوا الفيديو ده هيفيدكم جدا
ولو عندكم أي سؤال متنسوش تسيبوه في كومنت تحت
.
شكرًا عشان وصلتوا للنقطة دي وإلى اللقاء في بوست جديد
دمتم بخير
?يلا نبقى اصدقاء هناك كمان
***
اخترت لك :
