أهلا يا أصدقاء ! النهارده هكلمكم عن طرق جدولة محتوى انستجرام مسبقًا اللي هتساعدنا في اننا يبقى عندنا خطة للمحتوى ونقدر نمشي على الخطة دي وننفذها مظبوط ، وبالتالي لما يبقى عندنا محتوى مستمر بشكل منتظم ده هيساعدنا في اننا منختفيش فجأة و يبقى عندنا محتوى قيم مستمر على انستجرام وده هيزود عدد المتابعين مجانا وكمان هيزود التفاعل
ليه نجدول محتوى انستجرام مسبقًا ؟
السر في الاستمرارية
السر دايما في المحتوى المستمر و جدولة محتوى انستجرام بشكل مسبق واحدة من اهم الحاجات اللي لازم تعملوها لو عايزين تنزلوا محتوى مستمر ع انستجرام ؛ لأن من الصعب جدا الالتزام بمحتوى بشكل منتظم لو بتعتمدوا ع انكم تنزلوا بوست بشكل يدوي يعني تفتحوا انستجرام يوم بيومه وتكتبوا وصف او كابشن وتنزلوا بوست
تضييع وقت الذروة
زي ما انتوا عارفين مهم انكم تنزلوا بوستات في وقت الذروة او الوقت اللي بيكون المتابعين متواجدين فيه اكتر حاجة ف لو مش معتمدين ع جدولة محتوى انستجرام مسبقا ايام كتيرة هتضيعوا الوقت ده
تنفيذ خطة المحتوى اللي عملتوها
زي ما اتكلمنا في الفيديو ده اننا بنحط خطة لمحتوى انستجرام ونمشي على الخطة دي ، وعشان نعرف ننفذها مظبوط وكل حاجة تتم في ميعادها ان شاء الله فـ لازم نجدول محتوى انستجرام مسبقًا
حل لحيرة هنكتب ايه النهارده وايه البوست اللي هينزل النهارده
زي ما في السؤال المشهور بتاع هنطبخ ايه النهارده ، في كمان السؤال المشهور بتاع “هنكتب ايه النهارده وايه البوست اللي هننزله النهارده ” بنسأله لنفسنا كل يوم وكل مرة لما بننزل محتوى ، لكن لو اعتمدنا ع اننا ظبطنا محتوى انستجرام مسبقا يعني نقعد يوم بالاسبوع مثلا نجدول بوستات الاسبوع الجاي ساعتها هنقدم محتوى قيم وغني جدا ومش هنقع في الحيرة دي
طرق جدولة محتوى انستجرام مسبقا:
Planoly
بلانولي يعتبر أول حاجة استخدمتها في جدولة محتوى انستجرام ، عندهم خطة مجانية وخطط بفلوس
المميزات:
- تقدروا تشوفوا الصور في شكل مربعات جمب بعضها وتحركوا الصور عشان ترتبوها ويبقى شكلها متناسق اكتر
- في منه ابليكيشن وموقع ، يعني تقدروا تحملوا صور من الكمبيوتر والخطة المجانية بتسمح انكم تستخدموه من اكتر من جهاز
- الخطة المجانية بتسمح لكم بعمل مجموعات هاشتاج بحيث تسهل عليكم لما تيجوا تنزلوا بوست تختاروا مجموعة الهاشتاج على طول
العيوب:
- الخطة المجانية بتسمح لكم برفع 28 صورة فقط لكل شهر
- متقدروش تجدولوا فيديوهات في الخطة المجانية
- متقدروش تجدولوا محتوى لاكتر اكونت من انستجرام من نفس الاكونت بتاعكم على بلانولي
Later
المميزات:
- الخطة المجانية بتسمح لكم بتحميل عدد لا نهائي من الصور
- تقدروا تحركوا الصور عشان ترتبوها ويبقى شكلها متناسق اكتر
- في منه ابليكيشن وموقع ، يعني تقدروا تحملوا صور من الكمبيوتر والخطة المجانية بتسمح انكم تستخدموه من اكتر من جهاز
العيوب:
- متقدروش تجدولوا فيديوهات في الخطة المجانية
Preview
المميزات:
- الخطة المجانية بتسمح لكم بتحميل عدد لا نهائي من الصور
- تقدروا تحركوا الصور عشان ترتبوها ويبقى شكلها متناسق اكتر
- الخطة المجانية فيها 2 فلتر للصور عشان تخلوا الصور بتاعتكم شبه بعض
العيوب:
- متقدروش تجدولوا محتوى لاكتر اكونت من انستجرام من نفس الاكونت بتاعكم على بريفيو
- الخطة المجانية بتسمح انكم تستخدموه من جهاز واحد بس موبايل أو كمبيوتر
ودي الطريقة اللي بستخدمها حاليًا وعاجباني جدًا
المميزات
- تقدروا تجدولوا عدد كبير جدا من البوستات بشكل مجاني
- تقدروا تجدولوا فيديوهات وكمان IGTV
- تقدروا تحملوا المحتوى من على جهاز الكمبيوتر أو اللابتوب بكل سهولة
- تقدروا تفتحوا اكتر من اكونت انستجرام من خلاله وتديروهم بكل سهوة
- الخدمة مقدمة من شركة فيسبوك المالكة الحالية لـ انستجرام نفسه
العيوب:
- متقدروش تشوفوا الصور جمب بعض في شكل مربعات وتحركوا الصور عشان ترتبوها ويبقى شكلها متناسق اكتر
- في تطبيق على الموبايل لكن لسه محتاج تطوير وفيه بعض الصعوبات في استخدامه لكن على امل انهم يطوروه بسرعة
الاختيار بين الطرق المختلفة لجدولة وتنظيم محتوى انستجرام مسبقا:
الاختيارات لجدولة محتوى انستجرام كتيرة ومحيرة ، ممكن تختاروا طريقة واحدة بس للالتزام بيها وممكن اكتر من طريقة
نختار طريقة جدولة محتوى انستجرام الانسب لينا ازاي؟
- ايه نوع المحتوى اللي بنقدمه ؛ صور ولا صور البوم ولا فيديوهات قصيرة ولا فيديوهات طويلة IGTV
- هل عايزين ننزل المحتوى بتاعنا من كمبيوتر او موبايل ولا من الاتنين
- ايه شكل الحساب بتاعنا يعني هل ملتزمين بشكل معين في صور بيضا ف النص ولا عادي
- هل ملتزمين بفلتر معين او مهتمين ان الوان معينة تيجي ورا بعضها ولا كله ورا بعضه عادي
قولوا لي في كومنت ايه الطريقة اللي بتستخدموها في جدولة محتوى انستجرام ، ولو بتستخدموا طريقة تانية في جدولة محتوى انستجرام غير اللي ف البوست اكتبوها لي في كومنت
وبكدا نكون وصلنا لنهاية بوست النهارده ، يا رب تكونوا استفدتوا منه
.
شكرًا عشان وصلتوا للنقطة دي وإلى اللقاء في بوست جديد
دمتم بخير
?يلا نبقى اصدقاء هناك كمان
***
اخترت لك :
كورسات مجانية للمجالات الاكثر طلبًا في سوق العمل
مصادر لصور مجانية لمحتوى احترافي
فيديو :استراتيجية وخطة لزيادة التفاعل وعدد المتابعين + (تحدي جديد لنمو حساب انستجرام)
