أهلا يا اصدقاء ! النهارده هقولكم ع مصادر مجانية لصور رائعة وحلوة جدا بجودة عالية تقدروا تستخدموها في تقديم محتوى احترافي
أي محتوى بتقدموه بغض النظر عن المنصة اللي بتقدموه عليها اكيد هتحتاجوا له صور بجودة عالية واضاءة حلوة والتصوير بتاعها بروفيشنال ، ممكن ميكونش عندكم الوقت الكافي او الامكانيات المناسبة اللي تخليكم تقدروا تصوروا صور حلوة وتعدلوا عليها لحد ما توصلوا للنتيجة المرضية ليكم وأكيد طبعًا منقدرش نستخدم أي صور من جوجل أو بينتريست لأننا منعرفش رخصة الصور دي وهل اصحابها سامحين باستخدامها ولا لآ
نستخدم الصور دي في ايه؟
الصور دي تقدروا تحملوها من المصادر اللي هقولكم عليها تحت وتستخدموها في حاجات كتيرة جدا زي انكم تستخدموها في التصاميم بتاعتكم سواء كنتم مصممين جرافيك وبتحتاجوا صور في تصميم اعلان مجلة غلاف كتاب وهكذا نستخدمها في الديزاين
تقدروا تستخدموها لمحتوى انستجرام ، أيًا كان مجال تخصصكم تقدروا تعملوا سيرش ع صور في مجالكم وتنشروها ع انستجرام وتكتبوا تحتها اللي انتوا عايزينه أو تعملوا عليها تعديل زي انكم تكتبوا عليها حاجة مثلا وبعد كدا تنشروها زي الصور اللي بنزلها ع انستجرام الغالبية العظمى من المواقع دي وبعمل عليها تعديل بسيط ! بحط التاتش بتاعي عليها وانزلها ع انستجرام زي البوست ده كدا
لو عندكم مدونة أو بلوج زي مدونتي العزيزة دي كدا اكيد هتحتاجوا صور سواء عشان البوستات اللي ع المدونة أو صور تستخدموها في التصميم بتاع المدونة نفسه كخلفيات وغيره ، مع ان التدوين اغلبه بيعتمد ع المتابة والكلام لكن صورتين أو تلاتة في كل بوست بيدوا مظهر حلو جدا للبوست والمدونة بتاعتكم والشخص اللي بيقرا بيكون مستمتع وهو بيتفرج ع المحتوى بتاع المدونة كله ع بعضه سواء كلام أو صور ، وطبعًا الصور دي لازم تكون جودتها عالية عشان تلفت النظر وتفتح نفس الشخص اللي بيقرا البوستات بتاعتكم انه يكمل ويقرا اكتر ، فـ لو مفيش وقت او امكانية اننا نصور صور حلوة خاصة بينا يبقى نستغل المصادر المجانية ونستفيد من كل الفرص المتاحة قدامنا
الصور دي مسموح استخدامها في ايه؟
كل المصادر اللي هقولكم عليها مسموح ليكم تستخدموا الصور اللي فيها في أي مكان وأي استخدام سواء استخدام شخصي مش الهدف منه الربح
وكمان مسموح تستخدموها استخدام تجاري بس تحطوا لمستكم عليها ، يعني من حقكم تستخدموا الصور دي في كتاب وتبيعوه أو في أي تصميم بتشتغلوا عليه وهتاخدوا في المقابل فلوس
وكل ده بشكل مجاني ومش لازم تعملوا
Attribution
وده معناه انكم مش لازم تذكروا مصدر الصور دي جاية منين
ايه الممنوع ؟
الحاجة الوحيدة الممنوعة في الصور دي اننا نحمل الصور ونبيعها في موقع تاني من غير أي تعديل عليها كأن احنا اللي مصورينها ، كمان مينفعش ننسب الصور لنفسنا ، احنا مش مضطرين نقول مصدرها أو جايبينها منين لكن كمان مينفعش نكتب تحت الصور انها من تصويرنا وهى مش كدا
دلوقتي بقى يلا بينا نبدأ في مواقع و مصادر مجانية لصور احترافية بجودة عالية
أي موقع من دول تقدروا تضغطوا ع اسمه عشان تروحوا عليه
كل الصور اللي ع موقع بيكسلز تحت رخصة اسمها
CC0 = Creative Commons Zero
يعني نقدر نستخدم الصور دي بأي شكل سواء نعدل عليها ننشرها زي ما هى ، نستخدمها استخدام تجاري أو شخصي
الحلو في بيكسلز اننا مش بس نقدر نحمل كل الصور اللي تعجبنا ، لأ كمان نقدر نعمل اكونت عليه ونعمل حاجة اسمها مجموعات او
collections
يعني انا دلوقتي بقلب من ع الموبايل ومش عايزة احمل الصور دي دلوقتي بس عجبتني وعايزة احفظها ع جمب عشان ارجع لها بسهولة واحملها عشان احطها في بوست ع المدونة هنا ، فـ اقدر اعمل كوليكشن مثلا اسميه طبخ أو اي اسم واضيف الصورة له
كمان لما تحملوا اي صورة بيظهر لكم اسم الشخص اللي صورها وحسابه ع انستجرام لو عايزين تعملوا له منشن او تاج لما تنشروا الصورة ، بس زي ما قلنا ده مش اجباري خالص ومش لازم تذكروا المصدر
الموقع ده عليه اكتر من مليون و800 ألف صورة بجودة عالية ، هو شبه بيكسلز تقدروا تحملوا من عليه صور كتيرة جدا وتقدروا تعملوا عليه اكونت ، بس اغلب الصور اللي عليه موجودة ع بيكسلز، لأن بيكسلز فيه عليه اكونت مشهور باسم بيكساباي بينزل عليه صور كتيرة من موقع بيكساباي
شعار الموقع هو الصور للجميع ، تقدروا تعملوا عليه سيرش ع اي كلمة عايزينها وهتلاقوا كمية صور رهيبة
الموقع ده شعاره صور رائعة بجودة عالية وبالمجان ، تقدروا تعملوا سيرش ع الصورة اللي تحبوها او تختاروا قسم من الاقسام اللي فيه وتتفرجوا ع كمية كبيرة جدا من الصور عالية الجودة واللي متصورة بطريقة احترافية
في الموقع ده هتلاقوا كمية كبيرة جدا من الصور وكمان في اقسام كتيرة تقدروا تختاروا ما بينها وكمان تقدروا تشوفا آخر 100 صورة نزلت ع الموقع ، ده غير انكم تقدروا تشتركوا في النشرة البريدية بحيث الموقع يبعت لكم كل اسبوعين 10 صور جداد ع الايميل بتاعكم
وبكدا نكون وصلنا لنهاية بوست النهارده وقلنا مصادر مجانية لصور احترافية يا رب تعجبكم و يا رب تكونوا استفدتوا منه ، اكتبوا لي في كومنت هتستخدموا الصور في ايه ؟
.
شكرًا عشان وصلتوا للنقطة دي وإلى اللقاء في بوست جديد ! دمتم بخير
يلا نبقى اصدقاء هنا كمان
اخترت لك