مواقع العمل الحر على الانترنت ومميزات وعيوب العمل الحر من المنزل

اهلا يا أصدقاء ! في بوست النهارده هنتكلم عن العمل الحر أو  Freelancing ، هحكي لكم عن مميزات المجال ده كـ عمل حر من المنزل وعيوبه ونلاقي شغل فين أو ايه المواقع اللي ندخل عليها عشان نلاقي مشاريع كويسة نشتغل عليها ، وخصوصًا لو كنت فري لانسر عربي واللغة بتمثل لك عقبة واقفة في طريقك عشان تبدأ

يعني ايه فريلانسنج او عمل حر على الانترنت ؟

فريلانسنج Freelancing معناها عمل حر من المنزل أو  عمل حر على الانترنت بمعنى اني بشتغل في مجال ما مع نفسي ، مش في شركة مثلا وفي مدير عليا ، انا اللي بدور على شغل وليا الحق والحرية اني ارفض او اقبل الشغل وبنفذ المشروع واسلمه للعميل وآخد فلوسي

 

وهنا انا بقصد العمل الحر كمصدر دخل مباشر،  يعني انا بنفذ مشروع لعميل واول ما اخلص باخد فلوسي ، على عكس مصادر الدخل السلبي اللي اتكلمنا عليها في البوست اللي فات ، تقدروا تدخلوا عليها من هنا

 

الجدير بالذكر ان لو جيت تتكلم عن نفسك واتسألت بتشتغل ايه وجاوبت فريلانسر كدا دي مش اجابة كافية ، مش هى دي الشغلانة، لازم تقول شغال فريلانسر ايه ؟ هل مبرمج فريلانسر ولا مصمم جرافيك فريلانسر ولا ايه مجالك بالظبط؟

مجالات الفريلانسنج او العمل الحر:

ممكن تشتغل فريلانسر في مجالات كتيرة جدا زي:

• صناعة المحتوى ، في أي مجال سواء طبي تغذية طبخ رياضة وغيره
• تصميم جرافيك
• البرمجة
• الترجمة
• التدقيق اللغوي
• الحسابات وعمل دراسات الجدوى
• الاستشارات القانونية
• المونتاج
• التسويق الالكتروني

 

اقترح عليك قراءة : عشر نصائح تساعدك في العمل الحر على الانترنت

ولو لسه مش عارفين ايه المهارة أو الخدمة اللي عايزين تشتغلوا فيها على الانترنت كـ فريلانسرز فممكن بكل سهولة تدخلوا على مواقع العمل الحر اللي هنذكرها بعد شوية وتشوفوا ايه عروض الشغل اللي بتنزل وتاخدوا افكار عن المهارات اللي ممكن تقدموها

مواقع للعمل الحر من المنزل:

مواقع العمل الحر على الانترنت بقت كتيرة جدًا ، والحمدلله ان الموضوع اختلف عن زمان وبقى في مواقع باللغة العربية كمان يعني مش كل المواقع بالانجليزي ، ودي حاجة هتسهل كتير للناس اللي اللغة الانجليزية عاملة لها أزمة ، المواقع دي زي :

خمسات:

موقع خمسات هو موقع عربي للخدمات المصغرة تابع لحسوب، ومعنى خدمات مصغرة يعني خدمة صغيرة وبسيطة بعر صغير وهو 5 دولار

تقدر تضيف فيه الخدمات اللي عايز تقدمها ، وتكتب الوصف بتاعها ، ولما حد تعجبه الخدمة بتاعتك هيشتريها

المميزات :

• العميل هو اللي بيدور عليك مش انت اللي بتقعد تقدم على عروض

العيوب :

• لازم الخدمة اللي تقدمها يكون سعرها 5 دولار وخمسات بياخد منها 1 دولار يعني ربحك 4 دولار ، تقدر تضيف لها تطوير أو مزايا تانية عشان تزود سعرها ، لكن العميل مش مجبر انه يشتري التطويرات دي ، ولازم يكون في حاة يقدر يشتريها بـ 5 دولار في خدمتك
• بعد ما تضيف الخدمة بتاعتك لموقع خمسات بتاخد حوالي 24 ساعة على ما تتراجع ويتوافق عليها أو لأ ، وفي حاجات خمسات بيرفضوها بس طبعًا بيقولوا لك سبب الرفض وساعتها تقدر تعدل على الخدمة لحد ما تتقبل

 

مستقل:

مستقل هو موقع حلو جدا لأي فري لانسر عربي ، وبردو تابع لحسوب زي خمسات بس النظام فيه مختلف وهو ان بيكون في عملاء عندهم مشاريع وعايزين ناس تنفذها لهم ، فبيدخلوا على مستقل ويكتبوا العرض بتاعهم وهى تفاصيل المشروع ومدة التنفيذ والميزانية المتاحة 

وبيدخل الفري لانسرز أو المستقلين ويقدموا على العروض دي عن طريق انهم يكتبوا ايه اللي يميزهم عن غيرهم ويكتبوا مدة التسليم والسعر اللي شايفينه مناسب 

بعد كدا العميل بيشوف أكتر عرض مناسب له ويختار المستقل المناسب من وجهة نظره

 

اتكلمنا على المميزات والعيوب في الفيديو اللي فوق ده لكن من أهمها :

المميزات :

• الحد الادنى للمشاريع على مستقل هو 25 دولار ، مستقل بياخد منهم 5$ ، يعني أقل مشروع هتنفذه هتكسب 20$ وده مبلغ حلو لأي فريلانسر مبتدئ

العيوب :

• تقدر تقدم على 10 مشاريع بس ، ولما المشاريع تتقفل ساعتها تقدر تقدم على اللي بعده ودي شرحناها في الفيديو ده

 

• محتاج صبر لأن بياخد وقت على ما تتقبل في أول مشروع لك

***

منجز :

من مواقع العمل الحر باللغة العربية ومفيد لأي فري لانسر عربي ، بيمشي بنفس طريقة موقع مستقل ، العملاء بيقدموا المشاريع اللي عندهم واحنا كـ فريلانسرز بنقدم العروض بتاعتنا والعميل بيختار الشخص الانسب له

***

شغل اونلاين:

موقع عمل حر عربي فيه ونظام الشغل فيه زي منجز ومستقل ، بالاضافة لخدمة الوساطة المالية

***

Guru

موقع جورو هو موقع اجنبي للعمل من المنزل ، بتقدروا فيه انكم تقدموا الخدمات بتاعتكم وتحددوا لها السعر المناسب اللي تحبوه ، ولو حد عايز يشتري الخدمة بيشتريها ويقدر يتواصل معاكم

كمان موقع جورو فيه مكان للطلبات ، اللي هى طلبات العملاء ، وتقدروا تشوفوها واللي تلاقوه مناسب لمهاراتكم تقدموا عليه

وبكدا يكون بيجمع بين ميزتين وتقدروا تلاقوا عليه شغل أو الشغل هو اللي يلاقيكم

***

Freelancer:

موقع فريلانسر موقع اجنبي ، سهل الاستخدام والنظام بتاعه شبه مستقل بشكل كبير ، في عملاء بيقولوا تفاصيل المشروع ، والفريلانسرز بيقدموا على المشروع والعميل بيختار الفريلنسر الانسب من وجهة نظره

ميزة كمان في فريلانسر هى انه فيه قسم خاص بالمسابقات ، يعني مسابقات تصميم لوجو ، مسابقات مونتاج ومسابقات في كل المجالات ، لو لسه مش بتتقبلوا في شغل وعايزين تلاقوا شغل تتدربوا عليه

***

Upwork:

ابوورك هو موقع امريكي للعمل الحر من المنزل ، استخدامه مش أسهل حاجة لكن بردو مش صعب ، المواقع اللي فاتت تعتبر اسهل للمبتدين ، لكن بردو الموضوع بسيط

انصحكم تشوفوا فيديو أو اتنين لشرح ابوورك على اليوتيوب قبل ما تبدأوا عليه عشان نظامه يبقى مفهوم بالنسبة لكم اكتر

***

الموقع الخاص بيك أو شغل لحسابك الخاص:

تقدر تشتغل عن طريق الموقع الخاص بيك أو التسويق لنفسك ، يعني يبقى عندك صفحة انستجرام وتشتغل عليها ويبدأ العملاء يجوا لك عن طريقها مثلًا ، وتقدر تستقبل منهم الفلوس عن طريق البايبال وبطرق أخرى لو عندك موقعك الخاص

المميزات:

• تقدر تتواصل مع العميل براحتك لأن مواقع العمل الحر بتمنع ان يكون في تواصل بينك وبين العميل بره الموقع سواء عن طريق الايميل أو غيره
• كل نسبة الربح ليك ، بعكس مواقع العمل الحر بتاخد على الأقل 20% من اللي العميل بيدفعه ليك

العيوب:

• محتاج تسوق لنفسك بشكل كبير عشان توصل للعملاء المناسبين ليك ، بعكس مواقع العمل الحر ، كل يوم بيدخلها ملايين الاشخاص وفرصة ان الخدمة بتاعتك تظهر لهم أو انهم يشوفوا عرض شغلك بتكون اكبر بكتير

مميزات الـ Freelancing أو العمل الحر من المنزل:

• وجود مقابل مادي بشكل مباشر

من احسن الحاجات في العمل الحر على الانترنت ان في مقابل مادي سريع ، يعني تنفذ المشروع وتاخد فلوسك ، ودي حاجة بتحمسك انك تكمل شغل وتدخل في المشروع اللي بعده ، على عكس مصادر الدخل السلبي ؛ لازم تفضل شغال فترة طزيلة ساعات بتوصل ل٦ شهور وسنة ولسه مفيش أي مقابل مادي ودي حاجة احيانا بتقلل الحماس وتخليك تزهق وتمل

 

• حرية اختيار المشاريع

الحلو في العمل الحر انك مش مجبر تنفذ مشروع معين، تقدر تقول لأ على أي مشروع مش عاجبك لأي سبب زي مثلا انه يكون ضد مبادئك أو بيخالف تعاليم دينك

على عكس لو شغال في شركة هتكون مجبر تقبل ومفيش مجال للنقاش

يعني مثلا لو بتشتغل مصمم جرافيك وجالك عرض شغل انك تعمل لوجو لنوع خمرة، تقدر تقول لأ وترفض بكل سهولة

 

• وقتك ملكك

فعليا انت المدير ، تقدر تاخد اجازة وقت ما تحب ، وتقدر تشتغل وقت ما تحب ، لو حصل ظرف مفاجئ غير متوقع تقدر تاخد اجازة براحتك مش محتاج مدير او اجراءات لسه هتعملها ، او لو محتاج تسافر مع العيلة تغير جو مش محتاج تستنى اجازة العيد او اجازة نهاية الاسبوع

 

• تقدر توصل لمكانة أعلى

كل ما تطور نفسك وتاخد خبرة اكتر كل ما تقدر تزود الاسعار بتاعتك وتوصل لربح ودخل أعلى ، على عكس الشغل في شركة ، هتاخد مرتب معين بس مهما زاد المرتب ده فهيزيد بحدود معينة ، على عكس العمل الحر من المنزل، ممكن تعدي الحدود دي كلها وتوصل لأكتر مما كنت تتوقع

 

عيوب العمل الحر على الانترنت :

• عدم ثبات الدخل

في الـ Freelancing أو العمل الحر من المنزل كل شهر له ربح مختلف ، ممكن في شهر يجي لك شغل كتير جدا ويبقى الحال متيسر جدا ، وشهر تاني يجي لك ربع اللي كسبته الشهر اللي فات ، ودي حاجة تعلمك انك مينفعش تصرف كل الفلوس اللي بتجي لك ولازم تتعلم الذكاء المالي وازاي تستثمر فلوسك 

وان لازم يكون في مبلغ على جمب مرتب ٣ شهور على الاقل ، تشيل المبلغ ده وتعتبره مش موجود نهائي،  متستخدموش الا لو في شهر الفلوس فيه قليلة ، مهم تعمل كدا لو شغال فريلانسر و عندك التزامات كل شهر ، بيت اولاد ايجار فواتير كهربا وغيره

 

• مدير نفسك ووقتك ملكك

على قد ما دي ميزة كبيرة بس ممكن تبقى عيب لو منظمتش وقتك صح ، لأن مفيش مواعيد شغل ، مفيش مدير او حد بيزن عليك تشتغل ويسألك خلصت الشغل ده ولا لأ

فأحيانًا ممكن تحس انك تايه ومش قادر تسيطر على وقتك ومش عارف تخرج من مود الراحة والانتخة

 

• ثقافة الشغل من البيت

للأسف في بيوت كتيرة مش منتشر فيها ثقاقة الشغل من البيت والعمل الحر من المنزل ، والمتعارف عليه انه لو حد شافك ماسك الموبايل او قاعد قدام اللابتوب او الكمبيوتر فانت اكيد قاعد بتلعب ، ولو لسه في الاول فصعب انهم يقتنعوا انك بتشتغل بجد ، خاصة لو لسه مفيش أرباح جت لك

هتلاقي اللي يطلب منك طلبات

واللي يقولك هو انت بتعمل حاجة مهمة دلوقتي يعني ؟

واللي يتريق أصلا

وغيره كتير

لكن مع اول مشروع تنفذه وأول ربح لازم تقولهم وتحكي لهم ، عشان ساعتها كل حاجة هتتغير

 

“ايه ده ! ده طلع بجد ؟! انت كنت بتشتغل فعلا ? “

 

وهتلاقي الثقافة دي بدأت تتغير ، وهيبدأوا يحترموا وقتك وشغلك ، وده ميمنعش انك تقول جملة بعد شوية في بعض الاحيان

 

طبعا في حاجات من طلبات الأهل ضرورية ولازم تسيب اللي وراك واللي قدامك عشانها ، بس لو طلب مش ضروري وممكن يتأجل كمان نص ساعة ولا ساعتين ممكن تفهمهم بكل ادب وذوق انك هتخلص شغل وبعد كدا عنيك ليهم (هتعمل لهم كل اللي عايزينه يعني)

 

• العزلة ومفيش ملامح للحياة الاجتماعية

على كل عيوب الشغل الروتيني او في شركة بس انت بتشوف ناس كل يوم وبتسمع حكايات وبتتجبر تبقى اجتماعي ، لكن الشغل الحر انت واللابتوب وكلامك مع العميل عبر الشاشة ، كلها حاجات افتراضية ، مفيش زمايل شغل ، مفيش ناس بتقابلها دي ليها حل سهل جدًا اتلكما عليه في بوست عشر نصايح تساعدكم في العمل الحر من المنزل

• مفيش إستفادة من خبرات الاخرين

لما تكون بتشتغل في شركة بيكون في زملاء ، وبتشوف شغل ناس تانية ، ممكن تاخد رأي حد تاني خبرة اكتر وانت بتنفذ مشروع معين ، على عكس العمل الحر انت مع نفسك

ودي حلها انك تشترك في جروبات فيسبوك فيها ناس في نفس مجالك وتشوف شغلهم ، وتاخد رأيهم وتغذي نفسك دايما بانك تشوف شغل ناس تانية

 

بس كدا ولحد هنا خلص بوست النهارده ، يا رب يكون مفيد بالنسبة لكم

.

شكرًا عشان وصلتوا للنقطة دي وإلى اللقاء في بوست جديد ! دمتم بخير

***

Instagram| Facebook | Youtube

***

اخترت لك :

اكثر من 30 فكرة لمحتوى انستجرام

خمس وظائف للشغل اونلاين بدون خبرة

فيديو : طرق عملية لتحديد أسعار الخدمات للفريلانسرز