أفكار للعمل من المنزل مناسبة للطلاب – أفكار دخل سلبي

أهلًا وسهلا بيكم يا أصدقاء ! في بوست النهارده هكلمكم عن أفكار دخل سلبي و مجالات عمل اونلاين مناسبة للطلاب وكل الناس المشغولة بالدراسة أو الناس اللي أغلب وقتها مشغول بالشغل مثلًا وعندها وقت فاضي قليل ، المجالات اللي هقولها دي هى الانسب ليكم لأنها كلها مصادر دخل سلبي

دخل سلبي للطلاب
يعني ايه مصدر دخل سلبي ؟

مصدر دخل سلبي يعني حاجة انا بكسب منها فلوس بس مش بشكل مباشر ، يعني مش بعمل الشغلانة دلوقتي وباخد المقابل بتاعها ، لأ انا بعمل مجموعة من الخطوات وبشتغل على مشروع معين وبعد كدا بطلق المشروع ده ، ولما أي حد يشتريه باخد فلوس ساعتها

الموضوع شبه لما تكونو بيجي لكم دخل كل شهر من ايجار شقة ، في الأول هتدوروا على شقة مناسبة وتدفعوا فيها فلوس عشان تشتروها وتوضبوها وبعد كدا تعملوا اعلان او تتفقوا مع مكتب عشان يعرضها على مجموعة عملاء وبعد كدا في مستأجر يجي يأجر الشقة ويدفع لكم كل شهر ايجار للشقة دي

بس هنا الفرق ان المصادر اللي هقولكم فيها مش هتدفعوا أي فلوس عشان تبدأوا فيها ، كل اللي هتتكلفوه هو وقتكم والمجهود اللي هتعملوه
دلوقتي بقى هقولكم على مصادر دخل سلبي ومجالات عمل اونلاين مناسبة للطلاب

 

التسويق بالعمولة:

التسويق بالعمولة بكل بساطة ان في موقع عنده منتجات بيبيعها ، فلما تيجوا ترشحوا المنتجات بتاعت الموقع ده لشخص والشخص ده يشتري عن طريقكم انتوا بتاخدوا نسبة ربح

دخل سلبي - التسويق بالعمولة

ازاي الكلام دي بيتم ؟ وايه النظام اللي بيمشي بيه التسويق بالعمولة ؟

كل اللي عليكم تعملوه هو انكم :
تكتبوا اسم المجال او الموقع الاونلاين اللي عايزين تعرفوا اذا كان عنده برنامج تسويق بالعمولة ولا لآ على جوجل وجمبه تسويق بالعمولة يعني مثلا اعملوا بحث على جوجل على
سوق تسويق بالعمولة أو Amazon affiliate program

هيظهر لكم برنامج التسويق بالعمولة وبتشتركوا فيه وعلى حسب كل برنامج 

  • في حاجات بتدخلوا فيها رابط المنتج اللي عايزين تسوقوا له وبيطلع لكم رابط خاص بيكم ، والرابط ده هو اللي هتنشروه بين الجمهور أو الناس اللي عايزينهم يشتروا من خلاله
  • وفي بعض الحاجات زي عرب كليكس Arab clicks فيها روابط وكمان اكواد خصم خاصة بيكم ، لما حد يستخدم الاكواد دي انتم كدا بتاخدوا نسبة ربح من كل عملية شراء بتتم

***

طباعة بالطلب | Print on Demand:

الطباعة بالطلب انا بتكلم عليها بقالي فترة طويلة وفي ليها فيديوهات على قناتي على اليوتيوب تقدروا تشوفوها كلها من هنا ، وفي بوستات بتكلم عنها بالتفصيل على مدونتي هتلاقوها هنا

وهى باختصار ان انتم بتعملوا تصاميم حلوة ، وبعد كدا ترفعوها على مواقع الطباعة بالطلب المختلفة اللي اتكلمنا عليهم هنا ، ولما بترفعوها على المواقع دي بترفعوها على منتجات زي تي شيرتات وكوبايات ولوحات وغيره

ولما حد يعجبه المنتج اللي عليه التصميم بتاعكم بيشتريه ، والموقع بيطبع التصميم بتاعكم على المنتج ويبعته للعميل ، وانتم بتاخدوا نسبة الربح بتاعتكم اللي تقدروا تحددوها بنفسكم من خلال اعدادات الموقع ، الحلو في الموضوع انكم بتتعبوا في التصميم وترفعوه وبعد كدا التصميم ممكن يتباع لعدد لا نهائي من المرات

***

بيع المنتجات رقمية:

المنتجات الرقمية دي ممكن تكون زي المطبوعات ، زي البلانرز والقوائم وأي حاجة ممكن تكون بتتطبع ، وتقدروا تاخدوا فكرة عن ايه المطبوعات اللي ممكن تصمموها لو دخلتوا على موقع Etsy وعملتوا بحث على كلمة Printables
هتطلعوا بأفكار مطبوعات كتيرة جدًا ، فبعد ما تصمموا المطبوعات دي ، ترفعوها على موقع بيسمح لكم انكم تبيعوا منتجات رقمية زي Teespring ، ولما عميل يشتري المنتج بيدفع الفلوس ويحمل المنتج ويطبعه وانتم بتكسبوا فلوس

***

 

بيع الكتب الورقية المطبوعة او الكتب الالكترونية:

 

دخل سلبي - الربح من الكتب

تقدروا تكتبوا كتاب عن أي موضوع أو تعملوا حاجة اسمها Low content book زي مثلا كتب التلوين وكتب اللي فيها صور تعليمية للأطفال أو تصمموا بلانر وترفعوه على موقع امازون بعد ما تعملوا اكونت على Amazon Kindle Direct Publishing

ولما حد بيشتري المنتج بتاعكم؛ امازون بيطبعه ويبعته للعميل وانتم بتاخدوا نسبة الربح بتاعتكم ، أو ممكن تختاروا ان الكتاب بتاعكم يكون Ebook أو كتاب رقمي وانه لما الشخص يدفع الفلوس يقدر يحمل الكتاب بكل سهولة

***

 

بلوج أو مدونة خاصة:

تقدروا تفتحوا مدونة خاصة بيكم بشكل مجاني تمامًا على بلوجر أو ووردبريس.كوم ، وتكتبوا عليها مقالات في مجال معين ، زي مدونتي كدا

وتروجوا للمدونة دي وتسوقوا لها على مواقع التواصل الاجتماعي زي فيسبوك وانستجرام ، ولما يزيد عدد الزوار اللي بيدخلوا على المدونة ساعتها تقدروا تكسبوا منها بطرق مختلفة زي :

  • تحطوا عليها اعلانات
  • تعملوا عليها بوست او صفحة فيها منتجاتكم المفضلة مع روابط الشراء بتاعتها – تسويق بالعمولة مع التدوين –
  • براندات وماركات تتفقوا معاهم انكم تكتبوا بوست عن المنتج او الخدمة بتاعتهم بمقابل مادي

***

بيع التصاميم والخلفيات:

في مواقع زي shutterstock & Freepik ومواقع تانية اتكلمنا عنها في الفيديو ده

 

تقدروا تبيعوا عليها الصور اللي بتصوروها والتصاميم اللي بتعملوها وممكن تكون تصاميم بسيطة جدًا زي الخلفيات مثلا ، وأي حد يحمل التصاميم بتاعتكم من الموقع الموقع بيدفع لكم مبلغ بسيط تقريبا ربع دولار أو ربع يورو
هو صحيح مبلغ صغير وبسيط ، لكن الموقع ده بيدخل عليه كل يوم ملايين الناس اللي اغلبهم مصممين وزي حالاتي كدا ساعات بيحملوا حاجات كتيرة جدًا ومش شرط يستخدموها كلها ، يعني انا ساعات بدخل على المواقع دي واحمل خلفيات كتيرة اوي واقعد اجرب على التصميم واشوف مين الخلفية المناسبة اكتر لحد ما استقر على واحدة

 

ملحوظة مهمة :

لسه في معلومات اكتر ولو قعدت اكتب تفاصيل اكتر عن كل مجال من اللي فاتوا دول البوست مش هيخلص ابدًا ، فقولوا لي في كومنت ايه اكتر مجال حابين نتكلم فيه اكتر ونقول تفاصيل عنه اكتر ؟

ونصيحتي ليكم هى ان المجال اللي يعجبكم ابحثوا واقروا عنه اكتر وابدأوا نفذوا اللي بتتعلموه خطوة بخطوة وركزوا في مجال واحد عشان متبقوش مشتتين بين اكتر من مجال

***

مميزات الدخل السلبي:

  • تقدروا تشتغلوا عليه في أي وقت تحبوه مش مرتبطين بـ Deadline أو وقت لازم تخلصوا فيه المهام اللي وراكم
  • محتاجين تعملوا الشغل مرة واحدة بس وتقدروا تكسبوا منه اكتر من مرة
    يعني في التسويق بالعمولة هو كود واحد بس ، لكن يقدر اكتر من شخص انه يستخدمه وتكسبوا منه في كل مرة أي شخص يستخدمه
  • بتكسبوا فلوس وانتم نايمين
    هو صحيح في شغل كتير ومجهود كتير بيبتذل لكن بيبقى احساس تحفة لما تناموا وتصحوا الصبح تلاقوا ان في حد حمل المنتج بتاعكم او استخدم الكود بتاعكم وانكم كسبتوا فلوس

 

عيوب الدخل السلبي:

  • انت مدير نفسك
    هو يعتبر ميزة وعيب ، ان انتم اللي محتاجين تزقوا نفسكم وتشوفوا امتى الوقت المناسب عشان تشتغلوا ، مفيش عميل بيزن عليكم ، أو تقييم مستنينه فهو ده اللي بيدفعكم للشغل ، مفيش الكلام ده ، انتم بتعملوا مجهود عشان انتم عايزين تشتغلوا
  • محتاج مجهود ووقت وصبر
    على قد ما بيبان سهل وايه الحلاوة دي ، لكن الموضوع في البداية محتاج شغل وومجهود ، وبعد كدا بيحتاج صبر ونفس طويل عشان تقدروا تكملوا في الحاجة بالرغم من انه لسه مفيش ربح أو فلوس جت
  • مفيش دخل في نفس لحظة الشغل زي الفريلانسنج
    دي حاجة بتحبط شوية أي حد بيشتغل في مصدر ن مصادر الدخل السلبي ، لأنكم بتكونوا داخلين متحمسين وحاسين ان خلاص الفلوس هتجري في ايديكم دلوقتي ، و لما تعملوا الشغل مش بيكون في نتايج في نفس اللحظة فساعات بعض الناس بيجي لها احباط ومش بتكمل ، لكن زي ما قلت لكم السر في الاستمرارية والنفس الطويل

هل اشجع انكم تبدأوا في العمل على مصدر دخل سلبي ؟

آه طبعًا اشجع جدًا ، ومش بس بشجع الطلاب أو الناس اللي بتشتغل ووقتها ضيق ، لآ بشجع كل الناس مهما كانت ظروفها الحياتية انها تبدأ تعرف اكتر عن اي مصدر دخل سلبي وتبدأوا تشتغلوا عليه

انا دايمًا بحب فكرة تعدد مصادر الدخل ، اني مش بس ابقى معتمدة اني بيجي لي فلوس من الشغل وخلاص كدا ، لأ زيادة الخير خيرين ، لو بيجي لكم فلوس من الشغل سواء بتشتغلوا عن بعد – فريلانسرز- أو بتشتغلوا في وظيفة حكومية ، ويكون عندكم مدونة بتكسبوا منها فلوس حتى لو رقم بسيط

بعد كدا تعرضوا عليها اعلانات ويبقى مصدر دخل كمان ، كل ده لما يتجمع على بعضه هيديكم رقم اكبر وده بيسموه تأثير كرة التلج أو Snow ball effect
يعني زي كرة التلج بتكون في الاول حبة تلج صغيرين وكل ما يتضاف حبة تلج كمان بتكبر اكتر واكتر ، نفس الفكرة النسبة للدخل ، حبة صغيرين من هنا على حبة صغيرين من هنا كل ده بيدي تأثير أو مفعول أكبر في الناتج النهائي

وكمان عشان اذا في يوم من الايام مصدر دخل وقف لسبب ما يبقى في مصدر دخل تاني وتالت موجودين يحسسونا بالأمان المادي نوعا ما

 

بس كدا ولحد هنا خلص بوست النهارده ، يا رب تكونوا استفدتوا منه ، شاركوني في الكومنتات ايه اكتر مصدر دخل سلبي عجبكم ؟
.
شكرًا عشان وصلتوا للنقطة دي ودمتم بخير

***

 👇يلا نبقى اصدقاء هناك كمان 

InstagramFacebook | Youtube

***

اخترت لك :

بودكاست احب الاستماع إليها – مفضلاتي

خطوات لتطوير وبناء علامة تجارية شخصية قوية – بيرسونال براند

فيديو : خطوات للربح من مجال الطباعة بالطلب ( مصدر دخل يُعتمد عليه للمصممين وغير المصممين)

فكرتين عن“أفكار للعمل من المنزل مناسبة للطلاب – أفكار دخل سلبي”

التعليقات مغلقة.

error

Enjoy this blog? Please spread the word :)