تحدي ديسمبر تحفة – نشر العلم

تحدي ديسمبر تحفة

أهلًا يا أصدقاء ! في أول بوست من التحديات الشهرية ! أهلًا بيكم في تحدي ديسمبر تحفة ! من أول شهر ديسمبر 2020 هنبدأ في سلسلة تحديات شهرية وكل شهر جديد في تحدي جديد إن شاء الله

وهنشارك سوا تفاصيل التحدي هنا على المدونة وعلى انستجرام وهقولكم بعمل ايه في التحدي كل يوم على الستوري عشان اشارككم بالتفصيل ايه اللي بيحصل معايا

تحدي الشهر ده هيكون شعارنا الاساسي هو نشر العلم ، السبب الأساسي اللي خلاني أفكر في التحدي ده هو انه جالي كذا كومنت على قناتي على اليوتيوب واحد منهم صاحبته سألتني ازاي بتقولي للناس سر الصنعة وانه في العادي الناس كانت بتحب تخبي ، وايه السر ورا ده ؟

 

كومنت كمان كانت صاحبته بتقول شكرًا عشان بعلم الناس سر الصنعة وان فعلًا محدش بياخد رزق حد

الحاجة اللي انا حابة نتعلمها من التحدي ده ونطلع بيها اننا يبقى جوانا حب لنشر الحاجات اللي بنتعلمها ، مش بس حب اننا نطور نفسنا وننمي مهاراتنا ، كمان اننا منبقاش عايزين نكتم العلم اللي بنتعلمه ده جوانا ونخبيه عن الناس اللي حوالينا

عايزة كل شخص يتعلم حاجة جديدة يكون عنده استعداد انه يعلمها لشخص تاني ، وانه لو حد تاني سأله عليها ميخبيش جوا نفسه ويبقى عايز يحتفظ بالمعلومة لنفسه فقط

الجدير بالذكر ان كل الحاجات اللي اتعلمتها بفضل الله اتعلمتها بشكل مجاني تمامًا ، يا اما من مصادر مجانية ومكنتش مثلا بسرق كورسات او بنزلها بشكل مش مظبوط

يا اما ادور على طرق شرعية وقانونية آخد بيها الكورس ده يا اما كنت بستغل الفرصة لما الكورس اللي بفلوس ينزل بشكل مجاني لفترة محدودة ، وكنت بدخل على الكورس

 

دلوقتي بقى يلا نتكلم عن التحدي بتاعنا بالتفصيل

ايه فكرة التحدي ؟

التحدي فكرته اننا نختار كورس في مجال معين ونحاول نخلصه في 15 يوم ، وبكدا نكون خرجنا من 2020 بانجاز كبير ، انا كنت بفكر ابدأ بسلسلة التحديات دي مع بداية السنة الجديدة ويبقى أول تحدي في يناير 2021 لكن بردو حابة اغير فكرة اننا نستنى معاد معين عشان نطور من نفسنا أو لازم ابدأ من اول الاسبوع او أول الشهر او اخلي حماسي يتأجل لحد ما السنة تبدأ

 

هنعمل ايه في تحدي ديسمبر تحفة ؟

ايه الكورس اللي ناخده في تحدي ديسمبر تحفة

في التحدي هنختار كورس معين وممكن الكورس ده يكون:

كورس  مجاني من يوديمي في أي مجال تحبوه ، وتقدروا تاخدوا كورسات يوديمي المدفوعة بشكل مجاني في المجال اللي تحبوه بالطريقة اللي شرحتها في الفيديو والبوست ده ممكن تدخلوا عليه من هنا

 

تقدروا تختاروا الكورس اللي يعجبكم من كورسات لينكد ان وتستغلوا الفرصة انها مجانية لفترة محدودة ، واتكلمنا على الكورسات دي كلها في البوست ده تقدروا تدخلوا عليه من هنا

 ممكن تختاروا أي كورس مدفوع من كورسات يوديمي وبرشح لكم مجموعة من الكورسات دي في الصفحة دي وممكن تدخلوا عليها من هنا

ممكن تختاروا الكورس اللي يعجبكم من موقع كورسيرا وتقدموا على الدعم المادي وتاخدوا الكورس بشكل مجاني واتكلمنا عن طريقة التقديم في البوست ده بالتفصيل ممكن تدخلوا عليه من هنا ، وتبدأوا في الكورس لحد ما الدعم المادي يتقبل ولو في أي مجال عايزين تاخدوا فيه كورس ومش عارفين تعملوا ايه ممكن تكتبوا لي كومنت وانا هساعدكم على قد ما اقدر ان شاء الله

 

هنعمل ايه خلال تحدي ديسمبر تحفة ؟

هنمشي على النتيجة أو الكالندر دي ، تقدروا تحملوها بكل سهولة ، وكمان تحملوا الصورة الخاصة بكل يوم هتنزل عندي على الستوري ، عايزاكم كل يوم تنزلوا الصورة الخاصة باليوم في ستوري وتجاوبوا ع السؤال اللي فيها وأهم حاجة تعملوا لي منشن في الستوري عشان اشوفها واعمل لها شير عندي وننشر التحدي والعلم سوا

 

التحدي هيبدأ يوم الأحد 13 ديسمبر إن شاء الله وهتكون خطتنا كالتالي

نتيجة ومخطط تحدي ديسمبر تحفة

  • اليوم الأول: هنختار الكورس وهنقسم المحتوى بتاعه على الـ 15 يوم ، وهنشارك في ستوري على انستجرام اسم الكورس اللي اخترناه للتحدي
  • اليوم التاني: هنحدد معادين يناسبونا نقعد فيهم نذاكر او نحضر الكورس ونشوف الجزء الخاص بانهارده ، يعني مثلًا هنقول اننا هنحضر الكورس الساعة 10 الصبح أو الساعة 2 الضهر ، ولو فوتنا 10 الصبح يبقى لازم نقعد 2 الضهر نخلص الجزء الخاص بالنهارده، وهنحدد كمان وقت أو deadline ، لازم نكون مخلصين الجزء اللي علينا قبله ، يعني مثلا الساعة 6 المغرب ، لازم اكون مخلصة الجزء بتاع الكورس قبل الساعة 6 المغرب وهنشارك في ستوري المعادين اللي اخترناهم والديد لاين الخاص بينا
  • اليوم التالت: أول يوم فعليًا للكورس اللي بنحضره ، واليوم ده والايام اللي جاية همشوف الجزء اللي علينا من الكورس وهنجاوب على سؤال معين ، ونشاركه مع الناس ، وسؤال اليوم ده هو اخترنا الكورس ده ؟
  • اليوم الرابع: هنشوف جزء النهارده ، وهنشارك في ستوري امتى أول مرة سمعت فيها عن المجال ده ؟
  • اليوم الخامس: الكورس ده مناسب لمين ولأي فئة ؟ للبنات الولاد؟ الناس المهتمة بايه ؟
  • اليوم السادس: كلمنا عن مجال الكورس اللي بتاخده ! اوصفه ولو بجملة بسيطة
  • اليوم السابع: حاجة اتعلمناها من الكورس خلال الـ 3 أيام اللي فاتت ، حتى ولو معلومة بسيطة
  • اليوم التامن : الكورس ده هيفيدنا في ايه ؟
  • اليوم التاسع: امتى أول مرة سمعت فيها عن المجال ده ؟
  • اليوم العاشر: تطبيق ناويين نعمله من الكورس أو حاجة اتعلمناها منه وناويين ننفذها ان شاء الله
  • اليوم الحادي عشر: حاجة اتعلمناها من الكورس خلال الـ 3 أيام اللي فاتت ، حتى ولو معلومة بسيطة
  • اليوم الثاني عشر: ليه فكرت تاخد كورس في المجال ده ؟
  • اليوم الثالث عشر: ناوي تستفيد من الكورس ازاي بعد ما يخلص ؟
  • اليوم الرابع عشر: لو في نصيحة تحبوا تقدموها لصاحب الكورس هتكون ايه ؟
  • اليوم الخامس عشر: حاجة اتعلمناها من الكورس خلال الـ 3 أيام اللي فاتت ، حتى ولو معلومة بسيطة
  • اليوم السادس عشر: ايه اكتر حاجة عجبتك في الكورس ؟
  • اليوم السابع عشر: تقييمك للكورس ، تدي له كام من 10 ؟

 

ولحد هنا خلص بوست النهارده ، هنبسط جدًا بمشاركتكم في التحدي وتفاعلكم معايا ، قولوا لي تحبوا التحديات الجاية تكون عن ايه ؟ وإلى اللقاء في بوست جديد ! 

.
شكرًا عشان وصلتوا للنقطة دي ودمتم بخير

***

 ?يلا نبقى اصدقاء هناك كمان 

InstagramFacebook | Youtube

***

اخترت لك :

مصادر لتعلم الجرافيك ديزاين من الصفر

أفكار للعمل من المنزل مناسبة للطلاب – أفكار دخل سلبي

فيديو : التخطيط لمحتوى انستجرام

 

4 أفكار عن “تحدي ديسمبر تحفة – نشر العلم”

  1. Pingback: اهدافي للعام الجديد 2021 | تُحفة

التعليقات مغلقة.

error

Enjoy this blog? Please spread the word :)