اهلا بيكم في بوست جديد ، النهارده هنتكلم عن خمس وظائف أو افكار لـ شغل اونلاين نقدر نشتغلهم ومش محتاجين خبرة أو كورسات مسبقة كل اللي محتاجينه بس بعض المهارات اللي كتير منها عندنا وحبة وقت فاضي
دايمًا بيجي لي اسئلة عن ايه المهارات اللي نتعلمها عشان نلاقي شغل اونلاين ، ايه الوظايف المتاحة وفي مجالات ايه
وعشان اسهلها عليكم حبيت اني اجمع لكم خمس وظايف تقدروا تشتغلوهم اونلاين وتكسبوا منهم فلوس من غير ما يكون عندكم خبرة مسبقة أو واخدين كورسات ، أغلب المهارات المطلوبة عشان الوظايف دي حاجات عندنا كلنا بس منعرفش اننا ممكن نستغلها ونجيب منها فلوس ودلوقتي يلا بينا نبدأ
الوظيفة الاولى : مساعدة افتراضية – Virtual Assistant
الايام دي في رواد اعمال واصحاب بيزنس بدأت المهام اللي بيعملوها تكتر وبدأ البيزنس بتاعهم يكبر و بيلاقوا نفسهم تايهين ومش عارفين يعملوا كل حاجة عشان كدا بيحتاجوا لمساعدة او زي زمان ما كان مدير الشركة عنده سكرتيره لمكتبه الوظيفة دي فكرتها مشابهة بس عن بعد
كل اللي مطلوب منك تعمليه تنظمي المواعيد والاجتماعات وتظبطي جدول الاعمال والمهام اليومي وتقسميها ع الساعات الفاضية تردي ع الايميلات أو المكالمات التليفونية اللي بتيجي وطبعا كل عميل بيختلف عن التاني في المهام اللي هيطلبها
المهارات اللي مطلوب تكون عندك عشان الـ شغل اونلاين للوظيفة دي:
- قدرة على ترتيب المهام وتنظيم الوقت
- لباقة وفصاحة في الرد على المكالمات
- قدرة على الرد على الايميلات
مرتب المساعدة الافتراضية بيتراوح بين 3 دولار لـ 60 دولار في الساعة ع حسب كمية المهام اللي بتقومي بيها كمساعدة افتراضية
الوظيفة التانية : مدقق أو مصحح لغوي – Proofreader
لو انتِ من النوع اللي في العادي اما تقري بوست ع الفيسبوك او جملة في أي مكان بتاخدي بالك وبتلقطي ع طول ان فيها خطأ في الكتابة أو خطأ في التشكيل يبقى الوظيفة دي مناسبة جدًا ليكي
كل يوم في ناس بتكتب مقالات، كتب، بوستات للمدونات بتاعتها، رسائل وأوراق بحثية بيحتاجوا حد يراجع ويصحح وراهم ممكن عشان معندهمش وقت يراجعوا او معندهمش القدرة على انهم ياخدوا بالهم من الاخطاء اللغوية والنحوية
- المهارات المطلوبة منكم:
- قوة ملاحظة عالية لاكتشاف الاخطاء الاملائية والنحوية
- لغة قوية أيا وكل ما زاد عدد اللغات اللي تتقنوها كل ما تقدروا تشتغلوا اكتر
المصحح اللغوي المرتب بتاعه بيكون حوالي 3 دولار في الصفحة والصفحة بيكون فيها حوالي 300 كلمة يعني نقدر نقول حوالي 9 دولار لكل 1000 كلمة
الوظيفة التالتة : التفريغ الصوتي – Transcription
لو عندك وقت تسمعي ريكوردات وتكتبي اللي فيها في فايل وورد وتسلميه للعميل يبقى دي الوظيفة المناسبة ليكي !
ناس كتير عندها تسجيلات صوتية وفيديوهات وعايزين يحولوا المحتوى الصوتي المسموع بتاعها لمحتوى مكتوب سواء هيضيفوه بعد كدا كترجمة للفيديو نفسه او هيكتبوه في مكان تاني
المهارات الملطوبة:
- وقت فاضي
- مكان هادي تقدري تسمعي فيه تسجيلات صوتية
- برنامج للكتابة عشان تكتبي التفريغ الصوتي عليه
مرتب الشخص اللي بيشتغل في التفريغ الصوتي بيبدأ من 15 دولار للساعة وممكن يوصل لـ 30 دولار للساعة للشخص المحترف يعني لو اشتغلتوا كل يوم حوالي ساعتين ونص في الشهر تقدروا تعملوا من 900 دولار لـ 1800 دولار في الشهر باعتبار انكم بتشتغلوا 24 يوم في الشهر بس وده طبعا بيختلف حسب درجة الاحتراف بتاعتكم
الوظيفة الرابعة : خدمة عملاء ودعم فني – Customer Service & Support
لو عندك نفس طويل وقدرة على ايجاد حلول والرد ع اسئلة كتيرة ورا بعضها وامتصاص غضب بعض العملاء الوظيفة دي مناسبة ليكي
شركات كتير دلوقتي بتطلب ناس تشتغل معاهم في الدعم الفني وخدمة العملاء ومن البيت ، خدمة العملاء مش بس رد على اتصالات لأ ممكن تكون رد على رسايل الفيسبوك وانستجرام كمان
وشوفنا نجاح الموضوع ده ع ارض الواقع لما شركات كتيرة بعد كورونا بدأت تخلي موظفين خدمة العملاء بتوعهم يشتغلوا من البيت
المهارات المطلوبة منكم:
- لباقة في الكلام ونفس طويل
- خدمة انترنت كويسة مش بتقطع
الراتب بتاع خدمة العملاء بيبدأ من 7 دولار في الساعة وبيوصل لـ11 دولار
الوظيفة الخامسة : التدوين – Blogging
لو عندك كلام عايزة توصليه للناس مكان تكتبي فيه براحتك بحرية من غير ما يبقى في حدود لعدد الحروف والكلمات لو عندك خبرة في مجال معين أو عندك شغف بمجال معين ليه ميبقاش عندك مدونتك الخاصة اللي تكتبي فيها كل المعلومات اللي عندك حتى لو مجرد خواطر مش لازم يكون محتوى علمي مثلًا !
المدونة ممكن تكون خواطر عامة ، فاشون ، عناية بالبشرة والشعر ، طبخ ، نصايح للأمهات ، تربية الأطفال وغيره كتير
لو بقى عندك مدونتك الخاصة في اكتر من 10 طرق تقدري تكسبي منها فلوس من ضمنها الاعلانات والبوستات الممولة من شركات وبراندات وغيرها كتير هنتكلم عنهم بالتفصيل في البوستات الجاية
المهارات المطلوبة:
- محتوى قيم ومفيد
- صور جذابة
- وقت فاضي للكتابة والاهتمام بالمدونة
الربح اللي هيجي لك من المدونة بيختلف حسب انتِ بتكسبي منها ازاي وده اللي هنعرفه في البوستات الجاية ان شاء الله
***
السؤال المهم دلوقتي نشتغل الوظايف دي والـ شغل الاونلاين ده فين؟
تقدروا تقدموه كخدمة على موقع خمسات والعميل يشتري الخدمة دي ، تقدروا تشوفوا طلبات العملاء على مواقع زي مستقل منجز وفريلانسر وتقدموا العروض بتاعتكم والعميل يختاركم
الخلاصة: إن في أفكار كتيرة جدًا للشغل أونلاين كفاية بس تؤمنوا بنفسكم وتصدقوا انكم تقدروا ساعتها هتلاقوا الافكار والالهام بيجي لكم هتقدروا ساعتها تبدعوا وممكن كمان تطلعوا بأفكار وظايف وخدمات و شغل اونلاين جديدة تتميزوا فيها وتحققوا منها دخل عالي
لحد هنا خلص بوست النهارده، متنسوش تشوفوا البوست ع انستجرام وتحفظوه عشان تقدروا ترجعوا له في أي وقت
.
شكرًا عشان وصلتوا للنقطة دي ! إلى اللقاء في بوست جديد
ودمتم بخير
?يلا نبقى اصدقاء هناك كمان
Instagram | Facebook | Pinterest
عندي مواضيع كتيرة اوي عايزة اشاركها معاكم في البوستات الجاية ان شاء الله ومحتارة ابدأ بإيه الأول فـ عايزاكم تساعدوني وتقولوا لي تحبوا نتكلم عن ايه في البوستات الجاية ؟ عن التسويق عن طريق انستجرام؟ عن الربح من التدوين ؟ عن العمل الحر والشغل من البيت ؟
اقترحوا عليا البوست الجاي يكون عن ايه في التعليقات تحت
***
اخترت لك:
ازاي نلاقي شغل اونلاين مضمون بمرتب شهري؟
عاوزه اتعلم حجات كتير وخصوصا اي مجال يخص انستجرام والتسويق عليه
ان شاء الله الفترة اللي جاية نحاول نركز على انستجرام اكتر والتسويق عن طريقه وكسب الفلوس من عليه ، شكرًا جدًا أسماء