نصائح ذهبية للأمهات للعمل من المنزل

نصائح ذهبية للـ عمل من المنزل للامهات

أهلًا بيكم يا أصدقاء في بوست جديد ! في بوست النهارده هنتكلم عن نصايح للـ عمل من المنزل للامهات ، وازاي الأم تقدر توفق بين حياتها مع اولادها في البيت وومغامراتها معاهم وشغلها

انا كتبت البوست ده عشان عارفة ان في فئة كبيرة منكم أمهات ، عندكم بيتكم واولادكم ووراكم مسئولية كبيرة جدًا وكمان عايزين تشتغلوا وتزودوا دخلكم ويبقى ليكم مصدر دخل خاص ومستقل ، لكن اكيد بتواجهوا صعوبة في انكم توفقوا بين الحاجتين ، عشان كدا هقولكم النهارده على حبة نصايح وخطوات تساعدكم في التوفيق والتنسيق بين الشغل من البيت والاهتمام بالاولاد وطلباتهم

النصيحة الأولى : قائمة انبهارات وقائمة المهمات للـ عمل من المنزل للامهات :

طبعًا التنظيم والترتيب مهم جدًا في حياتك عشان تقدري تسيطري على وقتك ويومك ، مهم جدًا انك تكوني عارفة بكرة هتعملي ايه في شغلك ، أو تكوني كاتبة على الاقل المهام اللي وراكي حتى لو من غير تواريخ

ونصيحتي ليكي هى انك تكتبي كل المهام اللي وراكي في قائمة سواء في ورقة أو بشكل رقمي / ديجيتال على اي ابليكيشن ، كل ما يجي في بالك مهمة وراكي وحاسة انك شايلة همها او خايفة تنسيها اكتبيها

وفي نهاية اليوم بالليل خططي لبكرة ايه المهام اللي عايزة انجزها ، اختاري 3 حاجات من قايمة المهمات بتاعتك، وانصحك تختاري المهمات اللي مرتبطة بوقت معين ، وانجزيها الاول لأن دي اللي ليها الاولوية

قائمة مهمات - كيف تعملين كأم من المنزل

يعني لو افترضنا انك بتنزلي فيديو على قناتك كل خميس ، وبكرة يوم الثلاثاء ، يبقى مهمة بكرة اني اصور الفيديو او اعمل له مونتاج ، واحاول اخلص المهمة دي بحيث ان الفيديو يكون جاهز في وقته عشان كل ما هقرب من يوم الخميس وانا لسه مخلصتش اللي ورايا او حتى لسه مبدأتش في الفيديو ده كل ما هتوتر وهقلق والدنيا هتبقى صعبة معايا

زي ما مهم تعملي قائمة مهمات مهم كمان تعملي قائمة انبهارات ، كل ليلة اكتبي المهمات اللي انجزتيها النهارده مهما كانت بسيطة وصغيرة ، اذا عملتي الغدا ف اكتبي المهمة دي واعملي جمبها صح انك انجزتيها ، اذا لميتي الغسيل وطبقتيه اكتبيها ، اذا كتبتي بوست جديد على مدونتك اكتبي المهمة دي بردو وعلمي عليها صح انها تم تنفيذها

لما يعدي اسبوع وتيجي تبصي على الايام اللي فاتت وتشوفي كل يوم انجزتي فيه ايه هيكون احساسك روعة ان ايامك مش بتعدي كدا وخلاص ، هتحسي ان كل يوم عملتي فيه حاجات مفيدة فعلا وكنتِ شخصية منجزة ، مش هتاخدي بالك من اللي بتنجزيه غير لو كتبتيه وبقى قدامك ، لأن من غير توثيق للأحداث بنحس ان الايام كلها شبه بعضها وان مفيش فرق ليوم عن التاني

انك تكتبي قائمة الانبهارات والمهمات بشكل ورقي أو تستخدمي الموبايل دي حاجة ترجع لك ، بس عن نفسي بفضل استخدم تطبيقات الموبايل خصوصا اللي اقدر افتحها على الموبايل واللابتوب

حاولت كتير استخدم ورق لكن مكنتش بقدر استمر خالص ولا اخلي الموضوع عادة ، يا اما بنسى حطيت الورق فين يا اما بكتب مهمات ومش بنجزها فـ بيكون صعب جدا اني اقعد اشطب وانقلها يوم تاني ، على عكس الموبايل بعمل كدا بسهولة ، كمان لو قاعدة في الضلمة قبل ما انام اقدر بسهولة اكتب اللي ورايا بكرة ومش محتاجة اضاءة وقلم وورق عشان اكتب

النصيحة التانية : التخطيط والتنظيم للوجبات وعمل اكل ليومين

من اكبر المشاكل اللي بتواجهنا كأمهات اننا مش لاقيين وقت عشان نقدر نقعد نركز على شغلنا ، أو نوفر وقت عشان ناخد كورس معين ونطور من مهاراتنا

عشان تقدر تلاقي وقت ، لازم تشوفي المهام اللي بتاخد وقت طويل من يومك وتحاولي تنجزيها بشكل اسرع ، فيتبقى لك وقت تقدري فيه تركزي على شغلك وتطوير نفسك

من اكتر المهام اللي بتاخد وقت من يومنا هى الطبخ أو تحضير الوجبات

لو جينا بصينا لتحضير الوجبات أو الطبخ وسألنا نفسنا هو بياخد وقت طويل ليه ؟

هنلاقي من أهم الأسباب اننا اصلا مش بنكون عارفين هنطبخ ايه ، ونقعد فترة نفكر هناكل ايه النهارده

وده بيؤدي لأننا لما نصحى الصبح منكونش طلعنا حاجة تفك من الفريزر ، فـ لسه عقبال اما نقرر ونطلع من الفراخ أو اللحمة أو أيًا كان من الفريزر ، ونستناه يفك ونقوم نطبخ

كل ده قت ضايع على الفاضي

حل المشكلة دي بسيط وسهل جدًا وهو تنظيم الوجبات ، أو التخطيط للوجبات

تنظيم الوجبات للمساعدة في الـ عمل من المنزل للامهات

التخطيط للوجبات يعني انك تيجي في بداية كل أسبوع تشوفي ايه المتوفر عندك وتبدأي تخططي على أساسه وجبات الأسبوع

من الحاجات اللي بتسهل عليكي التخطيط للوجبات هو انه يكون عندك قائمة بكل الوجبات أو الوصفات اللي بتعرفي تعمليها ، فـ تيجي في بداية كل أسبوع تبصي على القايمة دي تختاري منها ايه الوجبات اللي عايزة تطبخيها الاسبوع ده وتقدميها لعيلتك

لما تخططي للوجبات هتكوني عارفة اجابة سؤال “هناكل ايه بكره؟” وبالتالي لو هتستخدمي حاجة مجمدة هتطلعيها من الليلة اللي قبلها وبالتالي الطبخ وتحضير الوجبات هياخد وقت أقل والوقت اللي هتوفريه في تحضير الأكل تقدري تستفيدي بيه في انك تشتغلي او تتعلمي مهارة جديدة

تاني حاجة هتساعدك انك تلاقي وقت هى انك تعملي أكل ليومين في نفس اليوم ، الموضوع ده بجد من اكتر الحاجات اللي بتسهل عليا حياتي ، يعني بدل ما تقفي في المطبخ تعملي الغدا للنهارده بس ضاعفي الكمية واعملي اكل للنهارده وبكره

لو مش عايزة تكرري الأكل ممكن تنوعي ، يعني تعملي رز يكفي ليومين ، وتعملي نوعين خضار ، نوع تاكلوه النهارده ونوع تاكلوه بكره وهكذا

وبكدا هيكون عندك يوم كامل من غير ما تطبخي ، الوقت بتاع وقفة المطبخ وتحضير الأكل استغليه بقى في شغلك وتنمية مهاراتك

(بكتب لكم البوست ده وانا مش ورايا اني اطبخ النهارده ، عملت اكل للنهارده من امبارح ، اوليه اوليه )

لو حابين نتكلم بالتفصيل اكتر عن تنظيم الوجبات اكتبوا لي في الكومنتات وهكلمكم عليه بشكل مفصل ان شاء الله

النصيحة التالتة : تحديد وقت العيلة والراحة ووقت الشغل

من اكتر الصعوبات اللي بتواجه أي حد بيشتغل من البيت ان اليوم بتاعه كله بيكون سايح على بعضه ، مفيش فترات محددة لحاجات معينة

لما تحددي وقت للشغل ووقت للعيلة الموضوع ده هيفرق جدًا ومهم ان مفيش وقت فيهم يدخل على التاني، بمعنى ان لو بتصحي بدري قبل أولادك يبقى ده وقت مخصص للشغل ، لما اولادك يصحوا يبقى ده وقت العيلة

وقت خاص بك - تنظيم الوقت للام العاملة

لو بتحبي تشتغلي بالليل في الهدوء لما الكل ينام يبقى ده وقت الشغل مش وقت الراحة او الفرجة على التلفزيون مثلًا ، وممكن نتفرج على التلفزيون مع وجود اولادنا حوالينا

لو ركزتي في الموضوع هتلاقي انك مش محتاجة وقت ضخم من اليوم عشان تعملي شغلك ، انتِ بس محتاجة من 3 لـ 5 ساعات في اليوم تشتغلي فيهم بتركيز وصدقيني هتقدري تحققي اكتر مما تتخيلي ان شاء الله

طول ما انتِ عارفة ايه المطلوب منك أو ايه الشغل اللي وراكي النهارده وقعدتي تعمليه بتركيز فـ خلاص كدا مبروك عليكي النجاح في حياتك وشغلك

حسب ظروفك ويومك بيمشي ازاي حاولي توزعي 4 ساعات شغل على مدار اليوم ، ممكن مثلا ساعتين الصبح والبيت لسه نايم، أو بالليل بعد ما البيت ينام

النصيحة الرابعة : تعدد المهام

تعدد المهام أو Multi-tasking هو حلو ومش حلو في نفس الوقت ، وهقولك ازاي دلوقتي ، في الشغل مثلا اوعي تعددي المهام ، يعني متحاوليش تنجزي حاجتين في نفس الوقت

اذا افترضنا انك قاعدة تشتغلي ووراكي النهارده مهمتين:

  • تصممي بوستات لانستجرام
  • تكتبي بوست جديد للمدونة بتاعتك

يبقى اختار مهمة واحدة بس منهم انجزها واخلصها خالص وانهيها وبعدين ابدأ في اللي بعدها ومحاولش ابدًا ادخل في مهمة تانية وانا شغالة في الاولانية

تعدد المهام حلو امتى ؟

في شغل البيت مثلا ، تقدري تتفرجي على أي حاجة ترفيهية وقت ما بتطبقي الغسيل ن عن نفسي بكره تطبيق الغسيل جدًا ، عشان كدا بحب الم الغسيل النضيف كله واقعد بيه قدام التلفزيون واطبقه وانا بتفرج على اي حاجة بحبها

بحب اسمع بودكاست وانا بغسل الاطباق ! طبعًا غسيل الاطباق مهمة مش بتخلص تقريبًا ! فـ عشان الوقت يعدي بحب اوي اشغل بودكاست واحس كأن في حد بيكلمني ويسليني وانا بغسل الاطباق ، واتكلمت قبل كدا هنا عن قنوات البودكاست المفضلة اللي بحب اسمعهم في بوست على مدونتي تقدروا تدخلوا عليه وتشوفوهم

النصيحة الخامسة : اشتغلي على النتايج مش على الوقت

من النصايح المهمة جدًا لـ عمل من المنزل للامهات هى انكم تشتغلوا على النتايج مش الوقت ، حياتك كأم مش متوقعة أو مش ماشية بطريقة نمطية ، كل يوم ممكن يكون في مفاجآت ، ممكن على حظك ابنك ينام شوية الظهر النهارده فـ تقدري في الوقت ده تشتغلي وممكن يوم تاني يسهرك بالليل ومتعرفيش تشغلي ، بنتك اللي بتنام كل يوم ساعتين الظهر ممكن النهارده تصحى بعد نص ساعة بس ومتكونيش لحقتي تخلصي اللي وراكي

وبناءً على الكلام ده متحطيش مدة محددة لأي مهمة وتربطي نفسك بالمدة دي

تنظيم الوقت للعمل من المنزل كام - عمل من المنزل للامهات

يعني لما تيجي تقرري ايه المهام اللي وراكي بكرة متقوليش دي هتاخد ساعة ودي هتاخد ساعتين ، المهمة بتاعتك مش هتخلص لما الوقت يخلص ، المهمة بتاعتك هتتم وتخلص لما فعليًا وعمليًا تخلصيها بغض النظر عن خدت وقت قد ايه ، لأنك لو مخلصتيهاش في الوقت الملطوب مفيش غيرك هيعملها بردو ، فـ مالوش داعي تربطي نفسك بوقت معين

النصيحة السادسة : اشباع الاطفال بالحب والحنان:

لو عايزة تشتغلي لفترة عينة وولادك صاحيين معاكي فأفضل طريقة عشان تشتغلي في وجودهم هى انك الأول تديهم جرعة لعب وضحك وحنان ، لنص ساعة او ساعة العبي معاهم من غير اي تشتيت ، يعني العبي معاهم من غير ما يكون معاكي الموبايل او قاعدة معاهم وبتتكلمي في التليفون !

اقعدي معاهم واعملوا اي نشاط تلوين رسم مكعبات بازل حكاية قصص أي نشاط بيحبوه وبعد ما الوقت يخلص قولي لهم انك هتشتغلي ومهم طبعًا انهم يكونوا شبعانين مش جعانين

قضاء الوقت مع الاطفال - للـ عمل من المنزل للامهات

لما تقعدي تشتغلي قولي لولادك في كل مرة ان ماما دلوقتي في الشغل هتخلص اللي وراها وتلعب معاكم تاني وخلي الموضوع فيه مرح من غير نكد

يعني اذا بنتك قربت منك طبطبي عليها واحضنيها ، لو بتكتبي حاجات واولاك في سن مناسب ممكن تديهم ورقة والوان وخليهم يلونوا كأنهم بيشتغلوا زيك وهكذا

لما تشبعي حاجة الطفل العاطفية الاول وبعدين تركزي في شغلك الازعاج والزن هيكونوا اقل بكتير

النصيحة السابعة : تقسيم المهام لنوعين لتسهيل الـ عمل من المنزل للامهات :

لما تيجي تخططي لمهام بكرة قسميهم لنوعين من المهام ، مهام تقدري تنجزيها والاولاد صاحيين ، ومهام مينفعش تنجزيها غير وهما نايمين

يعني مثلا لو هترفعي فيديو على اليوتيوب فـ تقدري عادي ترفعيه وهما صاحيين ، ، لو عندك بوستات انستجرام خلاص صممتيها ممكن تجدوليها وهما صاحيين ، لو كتابة الوصف والعناوين صعبة ممكن تكتبيها وهما نايمين أو وقت ما بيلعبوا اكتبيهم في نوت على الموبايل وتقدري تجدولي المحتوى بتاعك وهما صاحيين عادي

الوقت لما بيكون البيت كله نايم ده وقت من ذهب ! حقيقي قيم جدًا واكتر وقت بتقدري تركزي فيه ، فـ بلاش تضيعيه في مهام تقدري تنجزيها وولادك صاحيين عادي

خليه للمهام اللي محتاجة تركيز زي مثلا كتابة المحتوى أو المهام اللي محتاجة هدوء زي تصوير وتسجيل الفيديوهات

النصيحة التامنة : انتِ مش لوحدك

كل اللي حابة اقوله ليكي هوني على نفسك ! انتِ مش لوحدك

افتكري دايمًا ان كل ثانية بتعدي مش هترجع تاني ، الايام الصعبة بتمر والحلوة بتمر ! استمتعي بكل لحظة واحمدي ربنا على كل النعم اللي حواليكي

وخليكي فاكرة ان الأولوية دايمًا لصحتك النفسية والجسدية ولأسرتك

فـ متخليش أي حاجة تهزك أو توترك ! لو النهارده مكانش احسن يوم فـ متقلقيش ! لسه في بكرة ان شاء الله !

اسألي نفسك دايمًا

انتِ بتشتغلي ليه ؟ وحطي الاجابة قدام عنيكي طول الوقت

ممكن عشان مستواكي المعيشي يكون احسن ! ممكن عشان عايزة مستقبل أفضل لأولادك ! ممكن عشان عايزة تقضي معاهم وقت اكتر فـ عشان كدا قررتي انك تشتغلي من البيت ! انتِ بتشتغلي ليه صحيح ؟ اكتبي لي في الكومنتات حابة اعرف جدًا

ولحد هنا خلص بوست النهارده

.

شكرًا عشان وصلتوا للنقطة دي وإلى اللقاء في بوست جديد ! دمتم بألف خير

اخترت لك :

عشر نصائح تساعدك في العمل الحر من المنزل

مواقع العمل الحر على الانترنت ومميزات وعيوب العمل الحر من المنزل

فيديو : التخطيط لمحتوى انستجرام و جدولة محتوى انستجرام مسبقًا (السر وراء المحتوى المستمر لزيادة المتابعين)

error

Enjoy this blog? Please spread the word :)