اهلا وسهلا يا أصدقاء في بوست جديد ! النهارده هنتكلم على الكتابة السريعة أو ساعات بيسموها الطباعة Typing Skill
ودي من المهارات اللي نفسي اطور من نفسي فيها اوي وابقى اسرع بكتير من دلوقتي عشان كدا في بوست النهارده هنعرف سوا ازاي نطور من المهارة دي وازاي نستفيد بيها أكتر
ايه هى الكتابة أو الطباعة السريعة Fast Typing ؟
الكتابة السريعة وساعات بيسموها الطباعة لأن ترجمة كلمة Type
في القاموس هى ان الشخص يطبع ، وده غالبًا راجع لأن زمان أو ما الناس بدأت تحويل النصوص من كتابة بخط اليد لكتابة مميكنة كانت الآلة المستخدمة في الموضوع ده هى الآلة الكاتبة ، والآلة الكاتبة كانت بمجرد ما نضغط على حرف تطبعه على الورق ، عشان كدا النص مكانش مجرد نص بيتكتب بشكل افتراضي لأ ده كان بيتطبع على الورق على طول
هى مهارة مطلوبة جدا دلوقتي ، ومن المهارات اللي نفسي اتعلمها من زمان ، من وانا صغيرة لا كنت اشوف حد بيكتب بسرعة على الكيبورد كنت بنبهر جدا واقول واو وكان بيبقى نفسي ابقى بكتب بسرعة كدا
لما كبرت اكتشفت اني ببكتب على الكيبورد كتير جدا ، وجز كبير من شغلي معتمد على اني اكتب على الكيبورد – لوحة المفاتيح – زي مثلا شغلي على المدونة هنا
اكيد كل ما كنت سريعة اكتر في الكتابة كل ما قدرت اكتب بوستات اكتر وانجز شغل اكتر
عشان كدا بدأت ادور على مواقع وطرق اقدر بيها اني اكتب اسرع ، بحيث اتعلم المهارة دي اكتر ، مش بس ابقى معتمدة على الممارسة واني افضل اكتب وابقى مستنية اني اتحسن وسرعتي تزيد
لأ انا عايزة زي دروس أو تمارين تساعدني اكتب اسرع وتحسن من مستوايا في المهارة دي
ليه نتعلم الطباعة السريعة ونطور المهارة دي ؟
- الكتابة السريعة هتساعدكم جدا لو كان جزء من شغلكم بيعتمد على الكتابة على الكمبيوتر سواء كتابة سكريبت ونصوص أو كتابة محتوى زي المقالات ، الرد على الايميلات ، كتابة التقارير ، حتى التحضير لبوستات السوشيال ميديا بيحتاج كتابة وكل ما كانت سرعتكم في الكتابة أعلى كل ما قدرتوا انكم تنجزوا اللي عايزين تكتبوه في أقل وقت ممكن
- الرد على الشات والمحادثات بسرعة رهيبة وبالتالي ننجز شغل اكتر في وقت أقل
- التقليل من الاخطاء ، الكتابة السريعة بتخليكم تكتبوا من غير ما تبصوا على الكيبورد – لوحة المفاتيح – وبالتالي عينكم هتكون دايما على الشاشة والنص اللي بتكتبوه وبالتالي نسبة الاخطاء أقل بكتير لأنكم مش محتاجين تراجعوا كل شوية على اللي كتبتوه ، أول ما تكتبوا حاجة غلط هتلاحظوها على طول
- الكتابة السريعة مش بس مهارة هتسهل عليكم شغلكم ، لأ دي كمان مهارة ممكن تشتغلوا بيها ، في مجالات شغل كتيرة تقدروا تكسبوا منها فلوس لو بتقدروا تكتبوا بسرعة وهنتكلم عليهم في بوست قادم بالتفصيل ان شاء الله
مستوايا دلوقتي في الكتابة السريعة
سرعة الكتابة بتتحدد بوحدة كلمة/دقيقة ، يعني نقدر نكتب كام كلمة في الدقيقة الواحدة وطبعًا كل ما عدد الكلمات اللي نقدر نكتبها في الدقيقة زاد كل ما سرعتنا كانت اكبر وكدا المستوى بتاعنا أفضل
عملت لنفسي اختبار عشان اقدر اعرف سرعتي في الكتابة باللغة العربية ، الاختبار عملته على موقع أكاديمية الطباعة وسرعتي طلعت 37 كلمة في الدقيقة
شاركوني في التعليقات سرعتكم طلعت كام ؟
المستوى اللي نفسي أوصل له في مهارة الطباعة السريعة
المستوى اللي بحلم اني اوصل له في الكتابة هو اني ابقى بكتب من غير ما ابص على الكيبورد تمامًا ومن غير أخطاء ، وتبقى الكتابة بالنسبة لي حاجة تلقائية واوتوماتيك يعني مش محتاجة افكر الحرف ده فين او ابص على الكيبورد عشان اشوف فين الحرف اللي عايزة اكتبه
كمان نفسي ابقى سريعة وبعرف اكتب كويس لدرجة ان حتى الرموز زي الشباك # والشرطة – وغيره و علامات الترقيم زي الفاصلة والنقطة ابقى بقدر اكتبها من غير ما ابص على الكيبورد – لوحة المفاتيح – خالص
أفضل المواقع لتعليم الكتابة السريعة دون النظر للكيبورد
في مواقع كتيرة نقدر نتدرب فيها ونطور من مستوانا في الكتابة السريعة ، المواقع دي بتدينا زي تمارين أو تدريبات عشان نقدر بيها نتمرن اكتر وسرعتنا تزيد ، عشان كدا جمعت لكم أفضل المواقع لتعليم الكتابة السريعة على الكيبورد – لوحة المفاتيح – سواء باللغة الحربية أو الانجليزية
كمان المواقع دي بتقول لنا كل حرف مفروض نضغط عليه بأي صابع – اصبع – من اصابع ايدينا
لأن الكتابة عشان تبقى مهارة نقدر ننفذها بسرعة لازم نمشي على قواعدها صح
الموقع عليه متخصص لتعليم الطباعة السريعة باللغة العربية فقط
دروس تعليم الكتابة السريعة للمبتدئين ومن الصفر كمان تقدروا من عليه تختبروا سرعتكم وتشوفوا تقدروا تكتبوا كام كلمة في الدقيقة ، كمان فيه قسم اسمه التدريب الحر وده لو عايزين تدربوا على كتابة نصوص من غير ما تمشوا بترتيب الدروس
الموقع ده تقدروا تتعلموا منه الطباعة السريعة باللغة العربية والانجليزية كمان ، أقصد حروف عربية وحروف اجنبية ، طبعا لو بتعرفوا تكتبوا بسرعة بالحروف الاجنبية فـ تقدروا تكتبوا بسرعة في اكتر من لغة مش بس الانجليزية بس ، لآ تقدروا تكتبوا بسرعة في كل اللغات اللي بتستخدم نفس الحروف زي الانجليزي الايطالي الأسباني مع فوارق بسيطة
الموقع ده أجنبي مش عربي خالص ، الجميل فيه انه فيه خطة مجاني وبيقدم دروس لتعليم الطباعة السريعة من الصفر للمبتدئين وايه الخطوات اللي نمشي عليهم خطوة خطوة
كمان فيه خطة مدفوعة والحلو فيها إنها مفيهاش اعلانات وفيها بعض المميزات الاضافية
الموقع ده كمان اجنبي مش عربي ، فيه اختبار لسرعتكم في اكتابة ن كمان بيقدم دروس لتعليم الكتابة السريعة ، وتقدروا تعملوا دعوة لأصدقائكم وتنافسوا بعض وتحمسوا بعض
لو تعرفوا موقع كمان غير دول اكتبوا لي اسمه في الكومنتات ، عشان انشره هنا ونستفيد كلنا ومتنسوش تختبروا مستواكم وتقولوا لي في كومنت سرعتكم في الكتابة كام كلمة في الدقيقة ؟
ولو حابين تعرفوا اكتر عن طرق نكسب بيها فلوس من الكتابة اكتبوا لي كومنت عشان انزل لكم البوست ده في اقرب وقت ان شاء الله
وإلى اللقاء في بوست جديد ! دمتم بخير
اخترت لك :
أفضل المواقع لتحميل Mockups مجانية لأعمال احترافية
أكثر من سبعة مواقع لاختيار ألوان متناسقة لأعمالك
أفضل طريقة لاستلام ارباحك اونلاين
يلا نبقى اصدقاء هناك كمان
***
