ازاي بعمل الـ Reels بالموبايل والكمبيوتر؟

أهلًا يا أصدقاء ! بتيجي لي اسئلة كتيرة عن ازاي بعمل الريلز Reels بتاعتي اللي بنشرها على انستجرام والشورتس Shorts اللي بنشرها على يوتيوب فـ حبيت اجاوبكم على سؤالكم ده بشكل تفصيلي اكتر

هشرح لكم ازاي بعمل الريلز والشورتس دي بأكتر من طريقة ، عن طريق الموبايل وعن طريق اللابتوب كمان ، عشان ميبقاش في عائق أو اعذار لأي حد ، اللي متاح يشتغل من الموبايل فقط يقدر يعملها ، واللي متاح له يشتغل من الكمبيوتر أو اللابتوب بردو يقدر

 

حاجات لازم تكون عندي قبل ما ابدأ في الشغل :

قبل ما ابدأ في مونتاج الريلز أو الفيديوهات القصيرة لازم يكون عندي كذا حاجة وهقولكم بجيب كل حاجة منين

1. خلفية حلوة Background

أول حاجة لازم يكون عندي خلفية حلوة بستخدمها بحيث تبقى ظاهرة في ضهر الموبايل اللي بيكون فيه الشرح ، الخلفية دي بحملها من مواقع تحميل الصور المجانية ، وهى مواقع بتقدم لنا صور احترافية ، نقدر نستخدمها بشكل مجاني سواء استخدام تجاري أو شخصي ، وتقدروا تعرفوا اكتر عن المواقع دي من هنا

مصادر تحميل صور احترافية بشكل مجاني – للاستخدام الشخصي أو التجاري

لما بدخل على الموقع زي موقع Pexels مثلًا بكتب في البحث كلمة Pattern أو كلمة Texture عشان تطلع لي صور زي اللي بحب استخدمها ، صور شكلها حلو ومفيهاش عناصر كتيرة وبحمل الصورة اللي تعجبني عشان استخدمها

2. الفيديو نفسه اللي هعمل له مونتاج أو Edit

تسجيل الفيديو

وده بكون مسجلاه من على الموبايل ، في موبايلات فيها برامج تسجيل للشاشة ، فـ لو موبايلكم كدا مش هتحتاجوا تحملوا برنامج

لكن موبايلي مفيهوش الميزة دي ، فـ بحمل تطبيق من الـ Play Store اقدر اسجل بيه الشاشة وفي برامج وتطبيقات كتيرة تقدروا تختاروا ما بينها ، اكتبوا في بحث Google play كدا : Screen Record وهيظهر لكم نتايج كتيرة جدا

 

عن نفسي بستخدم تطبيق اسمه : AZ Screen Recorder

 

تسجيل الصوت :

• في البداية كنت بستخدم ميكروفون الموبايل عادي ، يعني مكنتش بركب اي حاجة في الموبايل وكنت بستخدم الموبايل نفسه

 

• حاليًا اشتريت ميكروفون بوصله في الموبايل ، اسم الميكروفون BOYA M1

 

3. صورة الموبايل

ودي صورة لموبايل مفرغة من جوا وشفافة ، بحيث اضيفها فوق الفيديو ، فـ بعد المونتاج يظهر كأن الفيديو اللي بشرحه على الموبايل

وتقدروا تحملوا صورة الموبايل دي وتستخدموها من الزرار اللي جاي ده

 

4. صورة الماوس أو اليد اللي بتشاور

ودي صوؤة ليد كدا أو Pointer بضيفها للفيديو لما احب اوضح اكتر اني ضغطت هنا عشان يبقى الفيديو واضح اكتر ، وبردو تقدروا تحملوها بشكل مجاني لما تضغطوا على الزرار اللي جاي

 

ازاي بعمل ريلز Reels انستجرام باستخدم الكمبيوتر أو اللابتوب ؟

عن نفسي دي الطريقة اللي بستخدمها بالظبط ، بعمل الفيديوهات القصيرة (Reels & Shorts) باستخدام اللابتوب وبستخدم برنامج بريمير برو التابع لشركة ادوبي Adobe Premiere – وهو برنامج مدفوع مش مجاني –

وفي الفيديو اللي جاي ده هشرح لكم ازاي بعمل مونتاج بالتفصيل على ادوبي بريمير برو Adobe Premiere Pro

ازاي بعمل ريلز Reels انستجرام باستخدم الموبايل ؟

التطبيق اللي بستخدمه هو تطبيق Inshot

ومتوفر فيه انكم تستخدموه بشكل مجاني أو تشتركوا في الخطة المدفوعة ، وشرحت لكم في الفيديو ازاي تقدروا تستخدموه بشكل مجاني ويطلع الفيديو احترافي بدون علامات مائية Watermarks وازاي نعمل بيه حركات كتيرة حلوة

متنسوش تشاركوني في التعليقات هتستخدموا أي طريقة فيهم وأي برنامج فيهم ؟ تطبيق Inshot من الموبايل ولا Premiere Pro من الكمبيوتر أو اللابتوب ؟