خطوطي الانجليزية المفضلة من خطوط جوجل

عشان تعملوا تصاميم حلوة فأكيد محتاجين يكون عندنا خطوط جميلة نختار ما بينها ، النهارده هقولكم على مجموعة من خطوطي المفضلة من خطوط جوجل واللي تقدروا تحملوها بكل سهولة

وشرحنا في الفيديو ده ازاي نحمل خطوط عربية وانجليزية من Google Fonts بالتفصيل ، وازاي بحمل الخطوط دي وبثبتها على الجهاز عندي

ليه بحب استخدم خطوط جوجل Google Fonts ؟

خطوط جوجل بيقدموا مجموعة كبيرة ومتنوعة من الخطوط وكمان خطوط للغات مختلفة زي العربي الانجليزي الهندي وغيره كتير جدًا

غير ان في خطوط كتيرة ومتنوعة ، كمان هو يعتبر مصدر آمن لتحميل الخطوط ، والخطوط اللي بنحملها على الجهاز هتظهر لنا في كل البرامج تقريبًا زي :

ادوبي فوتوشوب
ادوبي اليستريتور
ادوبي بريمير وباقي برامج ادوبي اللي بتدعم النصوص
برامج ميكروسوفت زي ميكروسوفت وورد وباور بوينت وغيرهم

حتى لو انتم مش جرافيك ديزاينر أكيد هتحتاجوا مصدر خطوط تحملوا منه خطوط حلوة ومميزة

كمان الميزة الرهيبة الاضافية ان اغلب الخطوط رخصتها مفتوحة أو نقدر نستخدمها بشكل مجاني من غير ما نذكر المصدر ، سواء للاستخدام الشخصي أو التجاري

خطوط جوجل بيقدموا أكتر من 1000 خط مجاني ، وطبعًا عشان تختاروا ما بينهم الموضوع بيكون محير جدًا ، عشان كدا في بوست النهارده جمعت لكم مجموعة من خطوطي الانجليزية المفضلة

لو عايزين بوست تاني زي ده للخطوط العربية اكتبوا لي في التعليقات

خطوطي الانجليزية المفضلة :

Oswald

الخط ده مناسب جدًا للعناوين ، والكلمات اللي عايزينها تبقى واضحة في التصميم بتاعنا أو المقالة بتاعتنا

Slabo 13px

الخط ده متاح منه مقاسين ، مقاس 13 بيكسل ومقاس 26 بيكسل ، تقدروا تحملوا اللي يناسبكم أكتر أو تحملوا الاتنين

Concert One

الخط ده انا بحبه اوي ، لأني بحسه مرح جدًا ، وفيه روخ حلوة ، تحسوه مناسب للاعلانات وللكتابة على التي شيرتات وتصاميم الطباعة بالطلب

Cormorant

الخط ده عبارة عن عيلة كبيرة من الخطوط ، يعني العيلة دي بيندرج تحتها اكتر من خط تاني ، وفي ما بينهم فروقات بسيطة وممكن طبعًا تحملوهم كلهم أو تحملوا منهم اللي يعجبكم