كيف اعود لانستجرام بعد انقطاع

العودة لصناعة المحتوى على انستجرام بعد انقطاع

اهلا وسهلا يا أصدقاء ! كلنا ممكن يعدي علينا فترات نسأل نفسنا نرجع ازاي لـ صناعة المحتوى على انستجرام بعد انقطاع ؟ لأن كلنا معرضين اننا نمر بأوقات ننقطع فيها عن صناعة المحتوى على انستجرام أو أي منصة تانية بنقدم عليها محتوى

وده اللي حصل معايا ، مريت بفترة في حياتي مقدرتش فيها اني اركز في شغلي خالص ، وانقطعت عن صناعة المحتوى على انستجرام ويوتيوب والمدونة وبسبب الظروف اللي مريت بيها كنت مضطرة اني آخد اجازة ومقدرتش استمر في صناعة المحتوى

لما الحمدلله والشكر لله الظروف بدأت تتحسن بفضل الله ، كنت عايزة ارجع من تاني لكن كنت حاسة اني مشتتة جدًا ، ومش عارفة ابدأ منين ، وكل حاجة كانت ملخبطة جدًا

عشان كدا قررت اكتب البوست ده اقولكم على نصايح وخطوات تساعدكم في العودة لـ صناعة المحتوى على انستجرام من تاني واقولكم على حبة خطوات من خلال تجربتي

كلنا ممكن نتوقف عن نشر المحتوى على انستجرام ولأسباب كتيرة زي :

  • فترة أجازة زي أجازات الاعياد
  • تغيير كبير في روتين حياتنا زي اننا بننقل لبيت جديد
  • فترة جمود ابداعي
  • تعليقات سلبية اثرت علينا وجابت لنا احباط

وأسباب تانية كتيرة أو حتى نكون محتاجين ناخد استراحة break من غير أي أسباب

بعد ما ارتحنا وأخدنا البريك ، بنكون عايزين نرجع ومش عارفين نرجع ازاي

أول نصيحة عشان نرجع لانستجرام بعد انقطاع هى اننا ناخد الموضوع ببساطة

هل نشرح للجمهور سبب الانقطاع ؟

أفضل اجابة للسؤال ده هى انكم تتصرفوا بعفوية وتختاروا اللي يريحكم ، تختاروا اللي يمثل شخصيتكم

إذا كانت فترة انقطاعكم قصيرة ، أسبوع أو أسبوعين فـ مفيش داعي لذكر أسباب الانقطاع لأنه الجمهور بتاعكم ممكن ميكونش لاحظ غيابكم

إذا كانت فترة انقطاعكم عن انستجرام أطول من أسبوعين فـ ليكم مطلق الحرية في انكم تحكوا لجمهوركم عن سبب غيابكم في ستوري أو في بوست وممكن تلتزموا الصمت حفاظًا على خصوصيتكم وحياتكم الشخصية

نرجع ازاي لانستجرام ؟

الخطوة الأولى : نشر محتوى بشكل منتظم

أول حاجة محتاجين تعملوها هى انكم ترجعوا تاني لنشر محتوى على انستجرام بشكل منتظم ومن غير انقطاع

هتختاروا اربع أيام في الأسبوع تنشروا فيهم محتوى ، أو ممكن تختاروا انكم تنشروا محتوى يوم بعد يوم – يوم في ويوم مفيش –

مش لازم تستنوا لبداية الاسبوع ، احسن حاجة تعملوها هى انكم تبدأوا دلوقتي ، هتجهزوا محتوى يكون جاهز للنشر خلال الـ 7 أيام القادمة

اللي هتعملوه كالتالي :

  • تكتبوا أفكار للمحتوى
  • تحددوا كل فمرة هيتم تنفيذها في شكل ايه ؟ فيديو – بوست انستجرام عادي – ريل reel – بوست متعدد الصور carousel post
  • هتبدأوا بصناعة المحتوى ، لو في فيديوهات هتصوروها وتعملوا لها مونتاج ، تعملوا كل التصاميم اللي وراكم بحيث يبقى عندكم محتوى جاهز للنشر
  • هتجدولوا المحتوى ، كل حاجة في يومها ، والريلز هتخلوها موجودة على موبايلكم ، وتظبطوا منبه في المعاد اللي مفروض تنزل فيه

الخطوة الثانية : التفاعل وتنبيه الجمهور لرجوعنا من جديد

تاني حاجة هنعملها هى اننا نعرف الجمهور ان احنا رجعنا لانستجرام تاني بس بشكل غير مباشر

وده عن طريق اننا :

  • هنرد على أي تعليقات عندنا مكناش ردينا عليها
  • هنرد على الرسايل اللي لم يتم الرد والاستجابة ليها
  • لو مفيش رسايل أو تعليقات هندور على حسابات بتنشر محتوى في مجالنا أو في مجال مشابه ونتفاعل معاهم ، نعمل لهم لايك ونكتب لهم كومنتات عفوية

الخطوة التالتة : نشر ستوري

تالت خطوة هى اننا ننشر ستوري كل يوم ، ده هيشجع الجمهور انه برجع يتابعنا من تاني ويحسسهم اننا معاهم بشكل يومي

كل يوم محتاجين ننشر على الأقل 6 ستوري ، أو اكتر ، وننشرها خلال اوقات مختلفة في اليوم ، يعني منجيش الصبح ننشر 6 ستوري وباقي اليوم فاضي

لآ ننشر الصبح 2 والعصر 2 وبالليل 2 مثلا وهكذا حسب العدد اللي نقدر نقدمه وأحداث اليوم

الستوري اللي هننشرها ممكن تكون:

  • حكمة أو Quote
  • اعادة نشر لحاجة من المحتوى بتاعنا
  • اعادة نشر لمحتوى حساب آخر
  • دعاء ، وتقدروا تحملوا منتجنا الرقمي – دعاء لستوري انستجرام من هنا
  • يوميات ، زي مثلا القهوة بتاعتكم
صناعة المحتوى على انستجرام

الخطوة الرابعة : عمل تجديد في شكل الحساب

من الحاجات الجميلة اللي نقدر نعملها هى اننا نعمل تجديد أو Update في شكل الحساب بتاعنا ، بحيث يجذب المتابعين القدامى والجداد ويلفت انتباههم

ممكن نعمل تجديد أو تغيير في ايه ؟

  • نعمل تحديث في شكل الشعار Logo بتاعنا
  • نعمل تغيير في الثيم أو نظام ترتيب البوستات والمحتوى اللي بنقدمه ، بحيث ننشر المحتوى بترتيب مختلف
  • نغير في style التصاميم بتاعتنا ، مثلًا لو بنستخدم أشكال جرافيك 2D ممكن نستخدم أشكال 3D ، أو لو بنستخدم رسومات بألوان معينة نستخدم رسومات بألوان مائية وهكذا
  • نعمل اعادة توزيع لألوان البراند بتاعتنا
  • نعمل تغيير في الخطوط اللي بنستخدمها
  • لو بنستخدم فقط صور في التصاميم نستخدم أشكال جرافيك ، ولو مش بنستخدم صور خالص ؛ نبدأ ندخل صور في تصاميمنا وهكذا

مثال من حسابي لما غيرت في شكله وعملت له Newlook

نتوقع ايه بعد ما نرجع لصناعة المحتوى على انستجرام بعد انقطاع ؟

بعد ما نرجع لنشر المحتوى على انستجرام ، لازم منحطش توقعات عالية بالنسبة للتفاعل وعدد المتابعين

لأنه بنسبة كبيرة الاحصائيات هتكون محبطة ومش احسن حاجة ، خوارزميات انستجرام هتاخد فترة على ما تبدأ تشوف حسابنا تاني وتساعدنا في توصيل المحتوى اللي بنقدمه لعدد أكبر من الناس

الموضوع بيحتاج نشر محتوى بشكل منتظم ودوري لمدة شهر أو شهرين عشان التفاعل والزيادة في عدد المتابعين يتحسنوا ويرجعوا زي الأول واحسن ان شاء الله

كلام مهم من قلبي :

افتكروا دايمًا يا أصدقاء ان كلنا بشر ، وان الحياة اوقات كتيرة مش بتمشي على هوانا ، وساعات كتير تأتي الرياح بما لا تشتهي السفن

طبيعي ان في اوقات كتيرة اولوياتنا تتغير ونخلي حاجات اولى من حاجات ، طبيعي ناخد break

ودايما في حياتنا هنقع ونقوم ونقوم ونقع ، ونتكعبل ونعافر ونطلع وننزل

فـ متحملوش نفسكم اكتر من طاقتها ، وكل حاجة تتعوض طالما في بكرة شمس هتشرق من جديد

شاركونا في التعليقات :

شاركوني في التعليقات تجاربكم في الانقطاع عن صناعة المحتوى والعودة له مرة تانية .. وهنشر اجاباتكم هنا في البوست ده عشان كلنا نستفيد

.

شكرًا عشان وصلتوا للنقطة دي ودمتم بألف خير

اخترت لك :

دليلك لـ جدولة محتوى انستجرام لزيادة المتابعين مجانًا

اكتر من 10 افكار لاكونتات للـ ربح من انستجرام

افكار محتوى انستجرام – اكثر من 50 فكرة لـ محتوى انستجرام

تابعونا على انستجرام

اترك تعليقاً

لن يتم نشر عنوان بريدك الإلكتروني.

error

Enjoy this blog? Please spread the word :)