أهلا وسهلا يا أصدقاء ! في بوست النهارده هقولكم على مصادر تساعدكم على اختيار الوان متناسقة للتصاميم
ساعات كتيرة واحنا بنعمل أي تصميم أو أي حاجة بنستخدم فيها ألوان بنكون عايزين نختار ألوان متناسقة بس مهما اخترنا ألوان بنحس انها مش متناسقة بردو ومش عاجبانا ، عشان كدا في بوست النهارده هقولكم على أكتر من موقع بستخدمهم عن نفسي وبيساعدوني كتير أوي في اني اختار ألوان متناسقة بكل سهولة
ازاي المواقع دي هتساعدنا في اختيار الوان متناسقة؟
أو بمعنى أصح ازاي استخدم اللون اللي اختاره ؟ أي لون من الألوان بيكون له كود ، غالبًا الكود ده بيكون مكتوب قبله رمز شباك # يعني مثلًا اللون الاسود رمزه دايمًا #00000 ، كل اللي بنعمله اننا بننسخ الكود ده ونلصقه في الأداة أو البرنامج اللي بنستخدمه في التصميم ، مثلًا لو بنستخدم موقع Canva ، نقدر نلصق الكود ده – نعمل له paste – زي ما واضح في الصورة كدا وهظهر لنا اللون اللي له الكود اللي اخترناه
يعني ايه باليتة الوان Color Palette ؟
باليتة ألوان يعني مجموعة ألوان مع بعض ، غالبًا بيكونوا متناسقين مع بعض ولايقين على بعض ، فـ بنسمي مجموعة الألوان دي باليتة ، كلمة باليتة بردو بتتقال على القطعة الخشبية اللي الرسامين بيحطوا عليها الألوان بتاعتهم – خاصة ألوان الزيت – ويستخدموها في رسم اللوحات
ودلوقتي بقى يلا بينا نبدأ في المواقع بتاعتنا ، طبعًا أي موقع من دول تقدروا تدخلوا عليه لما تضغطوا على اسمه
مصادر ومواقع لـ اختيار الوان متناسقة
1. Color Hunt
موقع بيقدم لنا مجموعة من باليتات الألوان الجاهزة بكل الدرجات ، الموقع ده انا بحبه جدا عشان تقدروا فيه تختاروا لون معين ويطلع لكم باليتات ألوان لايقة عليه ومتناسقة معاه
2. COLOURLovers
الموقع ده فيه باليتات كتيرة جدًا ، الباليتات دي تم مشاركتها من قبل اكتر من 300 ألف مصممين وفنانين ومبدعين ، ناس زيي وزيك حبوا انهم يشاركوا باليتات الوانهم المفضلة وكانت النتيجة هى الموقع التحفة ده
3. Adobe Color CC
الموقع ده بيسمح لنا نعمل الباليت الخاصة بينا ونحفظها ونعدل عليها بشكل مجاني تمامًا ، ونقدر نشوف باليتات الألوان الـ Trend أو الأكثر استخدامًا الأيام دي
كمان الموقع بيساعدنا اننا نختار الألوان دي طبقًا لقواعد معينة زي :
- الألوان المتكاملة (المتتامة) Complementary Colors
- الألوان الأحادية Monochromatic
- الألوان الثلاثية Triads
كمان نقدر ننشر باليتات الألوان بتاعتنا ونشوف الآلاف من باليتات الألوان لمصممين وفنانين تانيين
وفي ميزة كمان وهى اننا لو بنستخدم Adobe Creative Cloud نقدر نفتح الباليتة بتاعت الألوان بتاعتنا في برامج التصميم زي Adobe Illustrator CC
4. Coolors
الموقع ده بيسمح لكم تعملوا عدد لا نهائي من باليتات الالوان اللي تقدروا تحفظوها في حسابكم عليه وكمان تستخدموا الألوان اللي فيه زي ما انتم عايزين
5. Color Palettes
موقع سهل وبسيط جدًا في الاستخدام ، الباليتات اللي فيه مستوحاة من صور بردو ، بيعرض لكم الصورة وجمبها الالوان المستخدمة في الصورة دي
6. Design Seeds
الموقع ده بيستخدم ألوان مستوحاة من الطبيعة والحاجات اللي حوالينا في الحياة ، تقدروا تبحثوا فيه على لون معين أو موضوع معين زي مثلًا ألوان لها علاقة بالخريف وهكذا
7. Colord
الموقع ده بيقدم لنا أدوات جميلة جدًا نقدر نوصل بيها للألوان اللي عايزينها ونقدر نحفظ باليتة الألوان بتاعتنا بأكتر من صيغة
8. Copaso
الاداة دي تابعة لموقع Colour Lovers اللي اتكلمنا عليه من شوية ، ومن الأدوات القوية جدًا ، استخدامها مش صعب بس بردو مش سهل ، محتاج ناس محترفة شوية
الموقع ده بيقدم لنا مجموعة من باليتات الألوان المتناسقة ، اللي يقدر أي حد يستخدمها بكل سهولة
يلا نبقى اصدقاء هناك كمان 
