عام جديد بدأ ! وروح التنظيم وتحقيق الاهداف بترفرف في المكان ، هو ده اكتر وقت من السنة الناس بتحب تنظم وترتب فيه حياتها وكل انسان يقرر انه يبقى انسان جديد
بلانرز جديدة بنشتريها و vision boards بنعملها وقائمة أهداف بنكتبها ، وأجواء التغيير والترتيب والأحلام والطموحات بتكون مسيطرة
وعشان كل الأسباب دي هنعمل مع بعض تصميم لبلانر أو منظم أسبوعي weekly planner هنعمله بطريقة سهلة ومجانية والأهم من ده كله إنه شكله هيكون احترافي جدًا
اقرأ أيضًا : كورس تعليم برنامج Inkscape المجاني – بديل اليستريتور
نستخدم البلانر أو المنظم الأسبوعي weekly planner في ايه؟
نقدر نستفيد من التصميم بتاعنا ده بأكتر من طريقة
- الطريقة الأولى : نطبعه لنفسنا ونستخدمه وننظم فيه المهام الأسبوعية بتاعتنا
- الطريقة التانية : ودي طريقة نكسب بيها فلوس وهى اننا نطبعه كمنتج ورقي حقيقي ونبيعه ويبقى أحد المنتجات في المشروع بتاعنا
- الطريقة التالتة : ودي بردو طريقة نكسب بيها فلوس وهى اننا نبيعه اونلاين كـ منتج رقمي ، والعميل لما يدفع الفلوس يحصل عليه كملف pdf وهو يطبعه بنفسه
اقرأ أيضًا : ازاي بعمل الـ Reels بالموبايل والكمبيوتر؟
حاجات لازم نراعيها قبل ما نعمل تصميم البلانر :
المقاسات والأبعاد
مهم جدًا نراعي مقاس أو أبعاد الورقة اللي هنطبع عليها البلانر ، لو مثلا المنتج بتاعنا ده هنبيعه أو هنطبعه في بلد زي مصر فمقاس الورقة هل هيكون A4 or A5 ولا ايه مقاسها بالظبط
كذلك لو المنتج ده هيتم طباعته في امريكا مثلا فـ لازم نراعي ان مقاس الورقة يكون Letter مش A4
ألوان الطباعة
لو هنبيع المنظم أو البلانر بتاعنا كمنتج رقمي فأنا بفضل اني دايمًا اضيف نسخة أبيض وأسود إلى جانب النسخة الملونة ، عشان المنتج بتاعي يكون مناسب لكل امكانيات الطباعة المتاحة
بحيث لو حد عنده طابعة في البيت بس أبيض وأسود مش ألوان يقدر يستفيد من المنتج بتاعي ويطبعه ويستخدمه
وبالفعل عملنا في الفيديو نسخة أبيض وأسود من التصميم بتاعنا
لغة التصميم
على حسب المكان اللي هيتم فيه بيع التصميم ومين هو الجمهور اللي هيشتري التصميم ده ، بنحدد لغة التصميم ، اذا كان باللغة العربية أو الانجليزية أو غيرهم ، وطبعا نقدر نخلي المنتج بتاعنا عبارة عن كذا نسخة ، الموضوع يرجع لنا
صيغة تحميل التصميم
أفضل صيغة نحمل بيها التصميم بتاعنا عشان نطبعه أو عشان نبيعه كمنتج رقمي والعميل يطبعه بنفسه هى صيغة الـ pdf
مش الصور ، الملف الـ pdf بيدينا أفضل جودة أثناء الطباعة ودي نقطة مهمة جدًا جدًا
ودلوقتي بقى يلا بينا ندخل في تفاصيل التصميم اللي عملناه
تصميم بلانر أو منظم أسبوعي Weekly Planner Design
التطبيق المستخدم في تصميم البلانر الأسبوعي
استخدمت ابليكيشن كانفا Canva وعملت بيه أكتر من منظم أسبوعي
كلهم شكلهم أحلى من بعض ، وكل ده باستخدام الخطة المجانية فقط ومن غير ما استخدم الخطة المدفوعة أو البرو
والتصميم كله عملته بالموبايل
اقرأ أيضًا : قصتي مع الفريلانس والشغل من البيت
الكلمات المفتاحية المستخدمة أثناء التصميم بالموبايل
كل أشكال الجرافيك اللي استخدمتها النهارده ليها كلمة مفتاحية معينة لازم اكتبها عشان تظهر لي ، والكلمات اللي استخدمتها هى :
- Rectangle
ودي عشان يطلع لي شكل المستطيل اللي استخدمته في التصميم هنا استخدمت شكل المستطيل التقليدي اللي موجود مع الاشكال Shapes وعدلت على ابعاده عشان اطلع بالمقاس اللي عايزاه ، المستطيل اللي استخدمته أبعاده 57.4*70.5 mm
- Sun
ودي استخدمت منها شكل الشمس اللي لونها أصفر في النسخة الملونة والشمس اللي بالأبيض والأسود في النسخة الأبيض وأسود
الألوان المستخدمة
دي باليتة الألوان اللي استخدمتها في التصميم ، حبيت يكون فيها أجواء ملونة وتكون روحها حلوة ومبهجة
ودي باليتة الألوان جاهزة على التحميل ، ممكن تحملوها وتستخدموها على طول زي ما عملت في الفيديو بالظبط
اقرأ أيضًا : أكثر من سبعة مواقع لـ اختيار الوان متناسقة لأعمالك
الخطوط المستخدمة
كل الخطوط اللي استخدمتها في التصميم هى خطوط مجانية ، تقدروا تستخدموها بكل سهولة
الخطوط اللي استخدمت اسمها
- Ahaleel
ده الخط اللي استخدمته عشان اكتب بيه كل النصوص في التصميم بتعي ، وغيرت بس في حجم الخط Font size**”**
اقرأ أيضًا : ازاي نعمل مدونة وموقع احترافي وكل التفاصيل الخاصة بمدونتي
نفس التصميم بأكتر من شكل
عملت شوية تعديلات بسيطة على التصميم ، زي اني غيرت الألوان والعناصر المستخدمة ، وكل العناصر دي مجانية ، شوفوا التصميم بقى له روح مختلفة وكأنه بقى تصميم جديد، والتغييرات اللي عملتها دي مأخدتش دقايق
كمان عملت من التصميم نسخة باللغة الانجليزية عشان لو حد عايز يطبعه بلغة مختلفة ، وطبعًا تقدروا تعملوه بكل اللغات اللي تحبوها
شاركوني في التعليقات مين فيهم أحلى تصميم ؟
وكالعادة لو طبقتوا على الفيديو وعملتوا زي التصميم ده ابعتوا لي تطبيقاتكم على رسايل فيسبوك وانستجرام ، هنشرها هنا باساميكم ان شاء الله
