اهلا بيكم في بوست جديد النهارده هنتكلم عن المجال الاكثر ربحًا من الانترنت واللي عليه طلب عالي جدًا وهو البرمجة وازاي نبدأ نتعلم برمجة؟
نتعلم ايه في كل لغات البرمجة اللي موجودة ايه اللغة اللي عليها طلب اكتر وايه اللغة اللي سهل نتعلمها في وقت قصير ونقدر نبقى محترفين فيها وتبقى دي المهارة بتاعتنا اللي هنكسب منها فلوس
طبقًا للاحصائيات بتاعت 2019 و2020 اللي اتعملت ع المجالات الاكثر ربحًا من الانترنت احتلت البرمجة المركز الأول ده غير ان البرمجة من المجالات اللي سهل اوي نشتغل فيها كفريلانسرز ونقدم خدماتنا ع مواقع العمل الحر أو اننا نشتغل مع شركات بمرتب شهري ثابت بس من البيت
لغات البرمجة كتيرة جدا وبتدخل في مجالات كتيرة اوي ف عشان منتوهش وسطها هقولكم ايه اللغات اللي عليها طلب عالي في سوق العمل واللغات اللي سهل اننا نتعلمها في فترة قصيرة ويبقى عندنا مهارة جديدة نعمد عليها في الربح من الانترنت
لغات البرمجة الاكثر ربحًا طبقًا للدراسات والاحصائيات
- Html
- Css
- JavaScript
- SQL
Python
طبعًا لغات البرمج اكتر من الـ 5 دول لكن انا اخترت لكم الـ 5 لغات اللي كانوا في بداية القايمة واللي متصدرين سوق العمل الايام دي
دلوقتي هكلمكم عن بعض اللغات اللي اعرفها واللي اتعلمتها من فترة او حاولت اتعلمها
Html
اللغة دي تعتبر الهيكل بتاع الموقع من غير تنسيق، من غير الالوان والحاجات الحلوة اللي بتجمل شكل الموقع ، لو كتبتوا كود باللغة دي وفتحتوا الصفحة اللي كودتوها دي هيظهر لكم منظر عبارة عن صفحة بيضا فيها كلام بالاسود والازرق نفس المنظر ده بيظهر واكيد كلكم شوفتوه كير لما النت يكون بطئ شوية – كالعادة يعني – وانتوا بتحاولوا تفتحوا صفحة أو موقع معين فميحملش حلو ويقف عند نقطة معينة تلاقوا كل حاجة في الموقع موجودة بس مكتوبة بطريقة غريبة تحت بعض أو مش بنفس التنسيق
عشان كدا هى تعتبر لغة اساسية لأي حد عايز يتعلم تصميم ويب
Css
اللغة دي هى بقى المكملة للغة اللي فاتت اللي بتدي التنسيق والمظهر الحلو والمسافات اللي بين الكلام والحاجات اللي ف الموقع وطبعا دي لغة مهمة جدا جدا جدا لأي حد عايز يتعلم ويب ديزاين أو تصميم ويب
Python
بايثون من اللغات المطلوبة جدا الايام دي وميزتها في بساطتها وسهولتها وانها بتستخدم في حاجات كتيرة جدا مش بس في برمجة الالعاب والابليكيشن لآ كمان بيستخدمها محللين البيانات علماء الرياضة وغيرهم كتير
كشغل في مجال البرمجة الشغل بينقسم لحاجتين مصمم ويب ومطور ويب
Web designer or Web developer
مصمم الويب هو شخص بيحب اكتر الالوان وتنسيقها التنسيق بتاع شكل الموقع نفسه والمربعات احجامها ايه وبعد الكتابة عن حواف او هوامش المربع المكتوبة فيه وهكذا ودي شغلانة حلوة جدا ممكن تكسبوا منها فلوس زي مثلا انكم تتعلموا تعملوا ثيمات لورد بريس وتبيعوها بفلوس
هتتعبوا بس في عمل الثيم وتشتغلوا عليه لكن بمجرد انكم خلاص خلصتوه هتنسوه وتكسبوا فلوس كل ما حد يشتري الثيم بتاعكم
مطور الويب هو شخص بيشتغل في تطوير المواقع والبرامج نفسها زي الناس اللي بتطور
Plug-in
ودي زي اضافات بتتضاف للمواقع بتساعد ع حاجة معينة زي اضافة عشان تترجم الموقع من عربي لانجليزي واضافة عشان تخلي انستجرام ظاهر في الموقع من تحت زي ما انا عاملة هنا كدا فـ المجال ده في فكر اكتر يعني واحد جت ف باله الاول فكرة انه عايز اكونت انستجرام يظهر في آخر الموقع او ف الجمب وبعد كدا بدأ يظبط الاكواد بتاعت الموضوع ده، وده طبعا مجال بيكسب فلوس بنفس الطريقة اللي فاتت عشان بردو تقدروا تعملوا اضافات بفلوس وتبيعوها
دلوقتي مع أهم سؤال : نتعلم برمجة منين؟
أولًا : مصادر بالعربي
من أحسن المصادر تتعلموا منها لغات برمجة كتيرة جدًا وكله ببلاش ومتوفر فيديزهات ع اليوتيوب سهلة وبسيطة
قناة يوتيوب فيها دروس تعليم بايثون بأسلوب سهل وبسيط وكمان فيديوها لمشاريع بايثون عشان بعد ما تتعلموا تطبقوا اللي اتعلمتوه
وده من المواقع الجميلة جدا لأن فيه شرح للغات كتيرة وفي شكل مكتوب تحسوا كأنكم فتحين كتاب أو محاضرة مكتوبة وبتقروا فيها وطريقة الشرح جميلة جدًا
فيديو نور حمصي اللي بيتكلم فيه عن تصميم الويب تقدروا تدخلوا عليه من هنا الفيديو حلو اوي لأي حد عايز يعرف اكتر عن المجال ده
ثانيًا : مصادر بالانجليزي
ده غير ان في الفترة اللي احنا فيها دي ناس كتير بتنزل كورسات ببلاش لفترات محدودة الكورسات دي في العادي بتكون بفلوس وانا أول ما بعرف ان في كورس نزل ببلاش في مكان ما بكلمكم ع طول عليه في ستوري الانستجرام فـ خليكم متابعينها أول بأول
بس كدا ولحد هنا خلص بوست النهارده يا رب يكون عجبكم ومفيد بالنسبة لكم
لو عندكم أي اسئلة اكتبوها لي في الكومنتات وهرد عليكم ع طول ان شاء الله
.
شكرا عشان وصلتي للنقطة دي وإلى اللقاء في بوست جديد
اخترت لك:
تجربتي مع العمل الحر
ليه لازم يبقى عندنا ايميل أو بريد الكتروني؟
يلا نبقى اصدقاء هناك كمان