اهلا وسهلا بيكم يا أصدقاء هنتكلم فيه عن أفكار لـ عادات وأهداف للعام الجديد ٢٠٢٣ ، هقولكم على أكتر من ١٠٠ فكرة لأهداف او عادات تقدروا تبدأوا فيها في السنة الجديدة ، أو مش شرط في السنة الجديدة ، تقدروا تبدأوا دلوقتي بالعادات والأهداف اللي تحبوها ، وتحاولوا تستمروا عليها
اي هدف أو عادة من دول هتمشوا عليها هيبقى ليها تأثير ايجابي على حياتكم ، وهتبقى ليها أثر جميل في أيامكم ، حبيت اقسم العادات والأهداف دي لأكتر من قسم ، حسب كل عادة أو هدف مؤثؤ في أي جانب من جوانب الحياة
مدة كل هدف أو عادة:
كل هدف وكل فكرة من المذكورين في البسوت تقدروا تستمروا عليها للمدة اللي تحبوها ، في حاجات ممكن تجربوها مرة واحدة بس وفي حاجات ممكن لو عجبتكم تستمروا عليها طول العمر
تكرار أي هدف أو عادة :
الهدف أو العادة اللي تعجبكم تقدروا تنفذوها بالعدد اللي تحبوه وبالتكرار اللي تحبوه ، ممكن حاجات تعملوها كل يوم وتخلوها عادة يومية ، وممكن حاجات تانية تخلوها مرتين أو 3 أيام في الأسبوع وعادات تانية تخلوها مرة كل شهر
أكتر من 100 هدف أو عادة للعام الجديد :
عادات وأهداف للترتيب والتنظيم :
1. روتين صباحي والاستمرار عليه كل ما كان الروتين بسيط كل ما كان الاستمرار عليه أسهل
2. التخطيط لوجبات الاسبوع القادم بشكل مسبق ، من أكتر الحاجات اللي سهلت عليا حياتي ، وفرت عليا وقت في المطبخ
3. روتين مسائي والالتزام به
4. التخطيط للأسبوع في بدايته
5. كتابة قائمة المهام مسبقًا ، بحب احضر الـ to do list بتاعاني قبلها بيوم ، وحاليًا بكتبها على سبورة بيضا على مكتبي
6. تنفيذ المهمة الاصعب أولًا
7. التخلص من الكراكيب
8. عمل جدول اسبوعي لترتيب وتنظيف المنزل
9. ترتيب السرير كل يوم
عادات وأهداف لحياة صحية أكثر :
10. الاستيقاظ مبكرًا وحقيقي مفيد جدًا والانجاز الصبح بيكون اكتر بكتير والوقت بيكون فيه بركة
11. عدم الضغط على رز الغفوة في المنبه
12. شرب كوب ماء كل يوم على معدة فارغة
13. عمل تمارين رياضية حتى لو تمارين بسيطة زي الـ Stretching أو البلانك
14. شرب مشروب صحي كل يوم زي الشاي الأخضر ، النعناع الينسون ، الكامومايل أو البابنوج قبل النوم حلو اوي وبيساعد على النوم العميق
15. اكل ثمرة فاكهة كل يوم
16. اكل سلطة أو خضراواوت كل يوم
17. تقليل الاكل اللي فيه مواد حافظة
18. شرب مياة كفاية كل يوم
19. النوم بدري ، عن نفسي لما مش بنام كويس بصحى في مزاج سيء جدًا وقدرتي على الانجاز بتقل ، فـ عشان كدا من الافضل اننا منتنازلش ابدًا عن اخذ القسط الكافي من النوم
20. منشربش قهوة او كافيين قبل ٦ ساعات من النوم
21. مشي اكتر من ٥٠٠٠ خطوة في اليوم ، الدراسات اثبتت اننا مهم اننا نمشي اكتر من 5000 حطوة كل يوم عشان نشاطنا وصحتنا البدنية والنفسية
22. تجربة تمرين رياضي جديد
23. الانتظام على الفيتامينات والمعادن باستشارة الطبيب او الصيدلي لأن الاكل اللي بناكله مش بالضروري يكون فيه كل العناصر الغذائية بالكمية المطلوبة اللي بيحتاجها جسمنا ، فـ ساعات بنحتاج فيتامينات أو معادن من بره تعوض النقص اللي موجود
24. مفيش شاشات قبل النوم بساعة ، الدراسات اثبتت اننا لما نشوف ضوء ازرق زي اللي بيخرج من الموبايل في وقت النوم ده بيأخر افراز الميلاتونين اللي بيساعدنا اننا ننام
25. الاستيقاظ والنوم في نفس المواعيد
26. التوقف عن شرب المشروبات الغازية أو التقليل منها
عادات وأهداف دينية :
27. قراءة ورد من القرآن كل يوم
28. قراءة اذكار الصباح والمساء
29. القراءة أو التزود بالمعلومات عن السيرة النبوية
30. حفظ ما تيسر من القرآن الكريم
31. الالتزام بصلاة الفجر
32. القيام للصلاة عند موعدها وعدم تأجيلها بسبب العمل
33. التوقف عن الغيبة
34. الامتناع عن قول أي لفظ بذئ او فاحش مهما كانت الظروف أو المبررات
عادات وأهداف للثقافة وتطوير الذات :
35. الاستماع لبودكاست مفيدة وملهمة ، وبتبقى ممتعة جدًا خصوصُا لو بنسمعها واحنا بنعمل أي عمل روتيني ممل
36. ممارسة هواية او تعلم هواية جديدة ، الهواية ممكن تكون الرسم التريكو الكروشيه واي هواية تحبوه
37. تعلم لغة جديدة
38. اقرا ١٠ دقايق من كتاب
39. تعلم مهارة جديدة١٢ مثل : البرمجة ، تصميم الجرافيك وغيره
40. ممارسة اللغة الانجليزية عن طريق اجراء حديث مع نفسك كل يوم
41. تعليم شخص آخر مهارة أو معلومة
أفكار لعادات في المطبخ :
42. تجربة عمل معجنات او نوع مخبوزات جديد
43. تجربة طبخ اكلة جديدة كل اسبوع
44. تجربة طبخ سلطات مختلفة
45. تجربة طبخ شوربة جديدة
أفكار لأهداف وعادات للتخطيط المالي :
46. تدوين وتوثيق العمليات المالية
47. التبرع بمبلغ مالي كل فترة محددة – اخراج صدقة
48. اقرا اكتر عن الحرية المالية
49. وضع خطة لادخار مبلغ معين من المال
50. انشاء مشروع خاص بك
أهداف وعادات خاصة بالعمل وصناعة المحتوى :
51. التخطيط للمحتوى في بداية الأسبوع ، حتى لو بس هنكتب أفكار وعناوين للمحتوى ونحدد ايه هننشره امتى ؟
52. متشتغلوش في مكان النوم مهما كنا فايقين وصاحيين 100% هنحس اننا عايزين ننام وكسلانين ومرهقين
53. انشاء المحتوى بالجملة
54. التفاعل مع المتابعين بشكل منتظم
55. ترتيب مكان العمل من اليوم اللي قبله
56. نشر محتوى بشكل مستمر بدون انقطاع
57. مراجعة البريد الالكتروني
58. تنظيم ملفات الموبايل
59. تنظيم ملفات الكمبروتر او اللابتوب
60. نقل الملفات للهارد backup
61. العمل مع عملاء اكثر ، مع تحديد العدد مثلا ٣ عملاء كل شهر
62. عدم تصفح السوشيال ميديا الا بعد الانتهاء من مهمة خاصة بالعمل
63. تحديد مدة زمنية محددة للمهام التي تستغرق اكثر من ١٥ دقيقة والالتزام بالمدة الزمنية المحددة لتنفيذ المهمة
64. توقف عن التسويف
65. عمل خطة للخمس سنوات القادمة
66. عمل خطة للشهر القادم ومراجعتها وتقييم ما تم تحقيقه في نهاية الشهر
عادات وأهداف لتحسين الحالة النفسية :
67. رؤية الشمس كل يوم ، من الحاجات اللي بتأثر على الحالة المزاجية اننا نشوف الطبيعة كل يوم ، ممكن ميكونش من السهل اننا ننزل نتمشى كل يوم لكن اكيد اسهل انا نشوف الشمس كل يوم حتى لو من الشباك أو البلكونة
68. متفكروش الناس بتفكر فيكم ازاي ، متشغلوش بالكم الناس بتفكر فيكم ازاي ركزوا في أهدافكم وحياتكم لأن كلام الناس عمره ما بيخلص
69. الاتصال بالاهل والأصدقاء ، كل فترة حاولا تسألوا على حد من القرايب أو الاصدقاء وسلموا عليهم وقولوا لهم كلام حلو
70. ادخال السرور على قلب انسان بكلمة طيبة
71. وقت مع العائلة بدون شاشات
72. كتابة كل يوم ، نكتب عن مشاعرنا والحاجات اللي جوانا بتساعد جدًا اننا نطلع الطاقة السلبية اللي جوانا
73. وقت خاص لنفسي فقط me time نفصل فيه من الشغل أو أي مسئوليات وضغوطات
74. نفس عميق كل يوم ، ناخد دقيقة أو دقيقتين من وقتنا ناخد فيهم نفس عميق جدًا
75. عدم تصفح السوشيال ميديا في أول ساعتين من اليوم ، عشان منفقدش تركيزنا وحماسنا في بداية اليوم أو نقرا أي خبر أو حدث سيء يعكر مزاجنا
76. زيارة مكان جديد
77. تجربة مطعم جديد
78. تجربة زراعة نبات من البذور ، ممكن استخدام بذور متوفرة في المنزل مثل بذور الفلفل الرومي وبذور الطماطم ، متابعة نبات وهو بيكبر من البذرة له متعة مختلفة تمامًا
79. فتح الستائر بعد ما نصحى عشان النور الطبيعي يدخل البيت
80. توفف عن البحث عن المثالية والكمال ونفتكر دايمًا إنه : ما لا يدرك كله ، لا يترك كله ، وده سواء في الشغل المذاكرة أو العلاقات الإنسانية
81. اعتزل ما يؤذيك ، الحاجات اللي بتسبب لنا أذى نفسي نحاول نعتزلها ونبعد عنها سواء كانت شخص في حياتنا بيقولنا كلام سلبي أو مجتمع أو وسط وجودنا فيه بيأثر علينا بشكل مش كويس ، نحاول نعتزل أو نبعد عن مصدر الأذى ده
82. احتفل بالانتصارات الصغيرة ، النجاحات والانجازات الصغيرة تستحق الاحتفال افرحوا بانجازاتكم حتى لو كانت صغيرة
83. العناية بنبات داخلي ، وجود نبات داخلي في البيت في المطبخ أو على المكتب حقيقي بيدي منظر حلو جدًا وبيكون شكله مبهج ، لو معندكوش فكرة عن النباتات الداخلية انصحكم تبدأوا بالبوتس حلو اوي وبيستحمل أغلب الظروف الصعبة
84. احضنوا الناس اللي بتحبوهم ، الأب الأم الأخت الزوج/ة الابناء ، التلامس الجسدي بيخلي الجسم يفرز الدوبامين اللي بيحسسنا باحساس جميل ومبهج
85. تجربة نشاط جديد زي التلوين او تركيب البازل
86. متتكسفوش تقولوا لأ ، ارفضوا أي عرض أو طلب مزعج بالنسبة لكم ، يعني من الآخر أي حاجة هتعملوها بس عشان مكسوفين تقولوا لأ يبقى ارفضوها وقولوا لأ
87. الغاء متابعة الناس اللي مش بتقدم محتوى له أثر ايجابي عليكم ، في فترة من الفترات تابعت ناس مستواهم المادي والاجتماعي مختلف عني إلى حد كبير ، كنت فاكرة انه عادي والموضوع فقط للتسلية لكن مع الوقت اكتشفت ان الموضوع بدأ يأثر عليا بشكل سلبي وبدأت احس ان في حاجات ناقصاني ، بس بعدين بطلت اتابع الناس دي وبقيت اركز اني اتابع الناس اللي هيكون ليها تأثير ايجابي على حياتي وفي كل الاحوال لازم اشكر ربنا على كل حاجة موجودة في حياتي الحمدلله
88. اتفرج على الشروق او الغروب واستمتع بالمشهد
89. وقت الولا حاجة، ٥ دقايق في اليوم لعمل الولا حاجة ، فقط ٥ دقايق من عدم فعل اي شيء
90. ابتسم بسبب وبدون سبب وخليك بشوش
91. قولوا مجاملة او كلمة لطيفة لحد
92. اشتروا هدية لحد بتحبوه
93. اطبخوا للناس اللي بتحبوهم واعملوا عزومة ليهم
أهداف وعادات للعناية بالذات :
94. روتين عناية بالشعر ،الروتين ممكن يبقى بسيط زي تسريحه كل يوم واننا نحط سيروم أو زيت مثلًا على أطراف الشعر
95. روتين عناية بالبشرة ، ممكن الروتين يقتصر على حاجاة بسيطة زي غسيل الوجه بغسول معين ، أو ترتطيب البشرة بكريم مرطب ممكن يبقى روتين مكون من خطوة واحدة أو نزود الخطوات شوية ، زي ما نحب
96. عدم استخدام الحرارة على الشعر لفترة معينة ، استمتعي بطبيعة شعرك وحاولي تتأقلمي معاها
97. عدم استخدام مكياج ، في ناس بتحط مكياج كل يوم واعتقد اننا نستحق اننا نحب نفسنا من غير مكياج ، ونحب نفسنا على طبيعتها ونسيب بشرتنا ترتاح وتتنفس
98. حب الذات وحمد الله على خلقه ، شوفوا اكتر حاجة مش بتحبوها في شكلكم أو جسمكم وحاولوا تتقبلوها زي ما هى تحبوها وتحمدوا ربنا عليها
99. تجربة ستايل أو تسريحة شعر جديدة مثال : انواع مختلفة من الضفائر زي : French braid or dutch braid
100. ارتداء ملابس مريحة وانيقة اثناء العمل من المنزل ، وفعلًا ده من الحاجات الي بتفرق جدًا في الحالة المزاجية اثناء العمل وخصوصًا ل بتشتغلوا من البيت
وآخر عادة أو هدف:
101. ابدأ دلوقتي ، اختاروا فكرتين او تلاتة وابدأوا نفذوهم وخططوا ليهم والتزموا بيهم كعادات بشكل منتظم ومستمر
اكتبوا لي في التعليقات :
ايه اكتر هدف أو عادة عجبتكم وعايزين تطبقوها ؟