ازاي نعمل موك اب Mockup ؟ بأكثر من طريقة

اهلا وسهلا بيكم يا أصدقاء ! في بوست النهارده هنتكلم عن الموك اب Mockup ، وازاي نعمل موك اب Mockup للتصاميم بتاعتنا

في الفيديو ده اتكلمنا بالتفصيل على اكتر من طريقة نقدر نعمل بيهم موك اب

ايه هو الموك اب Mockup ؟

الموك اب هو طريقة نقدر نحول بيها التصاميم بتاعتنا من مجرد تصاميم لصور بتحاكي الواقع

يعني لو مثلا صممتوا لوجو ، التصميم النهائي هيكون شكله كدا

لكن اذا عملتوا له موك اب هيظهر بالشكل ده

كأننا طبعناه فعلا على ارض الواقع

الموك اب مفيد لمين ؟

الموك اب مفيد لأي حد بيعمل تصاميم من أي نوع ولأي هدف

لو انتم مصممين جرافيك وبتشتغلوا مع عملاء، فبتكون حاجة لطيفة جدا انكم تعملوا للتصاميم موك اب Mockup وتبعتوها للعميل ، ده هيدي مظهر جمالي للتصميم وكمان هيساعد العميل يتخيل شكل التصميم لما يستخدمه فعلا على ارض الواقع

لو بتبيعوا التصاميم بتاعتكم في شكل منتجات رقمية ، ف الموك اب بردو هيساعدكم كتير في انكم تعرصوا منتجاتكم الرقمية بشكل احسن

أشكال مختلفة للموك اب Mockup :

تقدروا تعملوا التصاميم بتاعتكم موك اب في شكل

تي شيرتات
مجات mugs
مجلات وورقيات
غلاف كتب
شنط وغيره كتير

ازاي نعمل موك اب Mockup ؟

1. موقع Placeit

موقع placeit بيدينا امكانية اننا نعمل موك اب اونلاين ، من البداية للنهاية يعني ندخل ونختار الموك اب mockup اللي عايزينه (متاح فيه اختيارات مجانية) وبعد ما نعمل الموك اب نحمل الصورة ، وشرحناه في الفيديو اللي فوق

2. برنامج فوتوشوب Adobe Photoshop

تقدروا بعد ما تحملوا ملفات الموك اب بصيغة psd من المواقع المذكورة تحت ، انكم تفتحوها في الفوتوشوب وتعملوا الموك اب بالطريقة اللي شرحناها في الفيديو

3. موقع فوتوبيا Photopea

موقع فوتوبيا كأنه بالظبط برنامج فوتوشوب بس نقدر نفتحه اونلاين وكمان مجاني

عيبه انه بيكون تقيل على بعض الاجهزة ، عشان كدا اتأكدوا انكم تقفلوا كل حاجة على الجهاز قبل ما تستخدموه عشان الجهاز يكون خفيف

وزي الفوتوشوب بالظبط ، بتحملوا ملفات الموك اب من الموقع اللي هنذكرها تحت ، وتمشوا على الطريقة اللي اتكلمنا عليها في الفيديو

مواقع تحميل موك اب Mockup Websites

clipart

موقع clipart فيه خطة مجانية وخطة مدفوعة ، تقدروا تحملوا من عليه اجات كتيرة جدًا تفيدكم كمصممين ، زي اشكال الفيكتور Vector والموك اب وغيره

Freepik

موقع Freepik فيه خطط مجانية ومدفوعة ، من المواقع اللي بحبها جدا وعندي اشتراك فيها ، بيسهل عليكم حياتكم كمصممين وبيقدم لكم حاجات كتيرة جدًا تفيدكم كمصممين ، لكن لو مشتركين في الخطة المجانية فـ الملفات اللي بتحملوها لما تيجوا تستخدموها لازم تعملوا Attribution يعني تذكروا المصدر وهو freepik طبقًا لقواعد الـ Attribution الخاصة بيه