أنا جاية النهارده عشان اشارككم أهم قرار أخدته في 2023 وأعتقد انه هيبقى من أهم القرارات اللي آخدها في حياتي كلها وهو اني مبقتش عايزة ابقى انفلونسر خلاص
وهشارككم كل الخواطر اللي فكرت فيها ، وكل المشاعر اللي حسيت بيها وتأثير الانفلونسرز والسوشيال ميديا عليا وازاي وصلت في النهاية للقرار ده
ازاي بدأت في صناعة المحتوى ؟
زمان لما بدأت في صناعة المحتوى كنت عارفة اني عايزة اصنع محتوى وانشره اونلاين بس مكنتش عارفة اتكلم عن ايه بالظبط وكنت مشتتة جدًا ، شوية انشر وصفات أكل ، شوية اتكلم عن التغذية ، شوية اعمل تصميم حلو وانشره ، شوية اتكلم عن العناية بالشعر وكل شوية بتكلم عن موضوع شكل وكنت مستغربة ليه المحتوى بتاعي مش بينتشر والمتابعين مش بيجوا ليه 😂
لحد ما قررت اني اركز في صناعة المحتوى في اكتر حاجة بحبها ومهتمة بيها ومش بزهق من الكلام عنها وهى العمل الحر وخصوصًا تصميم الجرافيك والربح منه الحمدلله بدأ المحتوى اللي بقدمه سواء على المدونة انستجرام او يوتيوب يجذب اهتمام المتابعين وبالفعل بقى عندي متابعين واصدقاء كتير مهتمين بالمحتوى اللي بقدمه
ليه كنت عايزة ابقى انفلونسر ؟
لما بتابع حد بحس اني عايزة اعمل زيه :
لما بتابع نوع معين من المحتوى بحس اني عايزة اصنع محتوى شبهه ، الفترة اللي تابعت فيها ناس بتقدم محتوى عبارة عن ريلز فيه فلوج صغير عن يومها ، عجبتني الريلز دي
الموضوع عندي مش بيقف لحد اني اتفرج وخلاص ، بلاقي عندي رغبة شديدة في اني اقدم نفس نوع المحتوى ده ، وبالفعل بدأت اصور اجزاء من يومي وعملت فعلًا فلوج صغير عن يومي ونشرته على الاكونت iamsalmahaggag
بس بعد كدا مسحته لما اخدت قراري
حسيت اني عايزة افيد الناس بكل حاجة اعرفها
لما نجحت على تحفة ، حسيت إن أي معلومة اعرفها عن ترتيب البيت ، الوصفات والأكلات الحلوة ، العناية بالبشرة والشعر ، لازم انشرها وافيد بيها الناس ، واكتشفت بعد كدا ان ده مش صح خالص ، وبالفعل تسبب لي نشر محتوى عن مواضيع مختلفة بارهاق وتشتت رهيب
ازاي أخدت قرار اني مش عايزة ابقى انفلونسر ؟
مش كل حاجة لازم انشرها على السوشيال ميديا
اتعلمت خلال الفترة دي انه مش كل حاجة لازم انشرها على السوشيال ميديا، عندي في حياتي حاجات كتيرة بحب اعملها ، واهتمامات كتيرة بحب اعمل تريكو ، وبحب الزراعة جدا بستمتع بزراعة نباتات من البذور ، بحب الطبخ واني اعمل حلويات ومخبوزات ، ومنقدرش ننسى طبعا اني ربة منزل وعندي بيت مسئولة عن ترتيبه وتنظيفه كل دي حاجات بعملها في حياتي ، كمان انا بحب تصميم الجرافيك جدا ، سواء اني اشتغل فيه او اعلمه للناس
اتعلمت ان الحاجات دي اقدر احبها واستمتع بعملها من غير ما انشر عنها اي تفاصيل على السوشيال ميديا ، ودي اهم حاجة اتعلمتها السنة دي و أهم قرار أخدته في 2023
تأثير السوشيال ميديا عليا :
خلال فترة وجودي على السوشيال ميديا كنت بتابع ناس كتيرة ، من ضمنهم ناس المحتوى بتاعهم مش عن حاجة معينة ، هو عن حياتهم أيامهم ويومياتهم ، المحتوى اللي بيقدموه قائم على بياكلوا ايه بيشربوا ايه بيلبسوا ايه وبيسافروا فين
مقدرش انكر ان الموضوع في الأول كان ممتع ، لأني في نهاية اليوم ببقى عايزة اتفرج على حاجة مفيهاش أي صراعات أو تفكير ، حاجة خفيفة وفي نفس الوقت تخلص بسرعة ، وتفصلني من مود الشغل والجد خلال اليوم
مع الوقت لقيت ان متابعة الانفلونسرز له تأثير سلبي عليا وخصوصًا الناس اللي مش بتقدم أي حاجة ذات قيمة غير يومها عملت فيه ايه وجت منين وراحت فين
يعني مثلًا لما اشوف ناس بتخرج وتروح وتيجي وتلف بلاد وده مش في مقدرتي حاليًا ، لما اتفرج على ناس معاها السواق وعندها الناني واحنا الرفاهية دي مش موجودة عندنا ، مع الوقت ده بقى له تأثير سلبي بشكل غير مباشر عليا
اللي هو وانتِ يا ترى هتشوفي الرفاهية دي في يوم من الأيام ولا لآ ، ونسيت الحقيقة الأساسية للدنيا دي كلها انها أصلًا فانية ، واننا طلاب آخرة
ده مش معناه إن الواحد يبقى كسول ومتواكل في الدنيا ، لكن بردو مهم إن الواحد يركز من وقت للتاني على هدفه الحقيقي ، ويسأل نفسه انا عايزة فعلًا الحاجات دي سواء السفر أو الرفاهية بأي شكل من الأشكال عشان أنا فعلا محتاجها وعايزها ، ولا عشان انا شوفتها عند شخص تاني فـ حسيت بنقصها عندي
مراعاة مشاعر الآخرين :
بالرغم من اني الحمدلله مستوايا الاجتماعي كويس وراضية وبحمد ربنا عليه ، إلا اني لما تابعت بعض الانفلونسرز حسيت إن يااه أنا فايتني حاجات كتيرة اوي
من أهم العوامل اللي خلتني اطرد فكرة اني ابقى انفلونسر وانشر كل حاجة عن حياتي الخاصة على السوشيال ميديا هى اني مش عايزة ابقى سبب في يوم من الأيام إن شخص يحس بعدم الرضا عن حياته أو ان فايته كتير ، بالرغم ان حياته مليانة نعم ، لكن عشان شاف جانب مشرق وايجابي في حياتي مش موجود عنده هيحس ان نمط حياته مش أفضل حاجة
اقرأ أبضًا : خططي وأهدافي لعام 2023 ونموذج تخطيط مجاني
كنا بنفرح ازاي زمان ؟
من كتر ما بنشوف الناس بتعبر عن كل أنواع المشاعر على السوشيال ميديا ، وبيشاركوا العالم كله الاحداث اللي في حياتهم حتى التفاصيل واللحظات الخاصة من اول الخطوبة الجواز وصولًا للطلاق ، اعياد الميلاد الحمل حفلات جنس المولود ، حتى الاجهاض الناس بتشارك يومياتها عنه
أي حدث ممكن يحصل في حياة الانسان لو عملت سيرش عنه ع اليوتيوب هتلاقي قاىمة بفيديوهات عنه ، ناس مصورة حياتها أثناء ما كانت بتمر بالحدث ده من كتر ما بنشوف الاحداث دي متصورة صوت وصورة وساعات كمان لايف
نسينا كنا بنفرح ونزعل ازاي زمان كنا لو في خبر حلو في حياتنا نقوله للاهل والأصدقاء المقربين ونفرح مع بعض ، نتصور عشان الذكرى الجميلة اللي نبص عليها في المستقبل ونبتسم مش عشان شوية لايكات وشير حتى لما كنا نحزن كنا بناخد وقت عشان نحزن ونزعل ونفكر ونتعلم وناخد الحكمة من الحزن او الحدث الصعب اللي حصل
اسألوا نفسكم الأسئلة دي :
هل انتِ محتاجة تشاركي العالم كله خرجتي فين عشان تحسي بالسعادة ؟
هل انتِ محتاجة تشاركي العالم كله خبر انك حامل عشان تفرحي بحملك ؟
هل انتِ محتاجة تشاركي العالم كله الهدية اللي زوجك جابها لك في ذكرى زواجكم الـ 12 عشان تحسي بالسعادة ؟
هل انت محتاج تشارك العالم كله الأكلة الحلوة اللي زوجتك طبختها عشان تحس بالسعادة ؟
اجابتي كانت لأ ، أنا عايزة افرح زي زمان
التشتت التشتت ثم التشتت :
لو جينا للأسباب العملية فـ لقيت إن نشر محتوى في اكتر من اكونت في مجالات مالهاش علاقة ببعض ده سبب عظيم للتشتت ، وقت كتير ومجهود كبير بيضيع ، صعوبة في اني الاقي افكار للمحتوى لأني بنشر محتوى عن مواضيع بعيدة عن بعضها بُعد الشرق عن الغرب
وده اللي يخلي قرار اني مش عايزة ابقى انفلونسر أهم قرار أخدته في 2023 ، لأنه هيقلل التشتت ويوفر لي وقت ومجهود اعمل بيهم حاجات مفيدة اكتر
المتعة انتهت وحسيت بالملل :
لما بدأت آخد الموضوع بشكل جد وخلاص بقى ده هيبقى المحتوى بتاعي اللي هنشره على الاكونت التاني Salma Haggag ، لقيت ان المجال أو النيش ده مش مناسبني خالص
مش حاسة بأي متعة وانا بصمم بوستات عن العناية بالبيت والطبخ ، لقيت صعوبة في اني اصور فيديوهات حتى لو لحظات من يومي ، وبقيت بحس ان تصوير الفيديوهات دي عامل عليها حمل أو load
حسيت انه لآ مش دي الحتة بتاعتي ، ومش ده المجال اللي عايزة اكمل فيه ابدًا ، الكار ده مش كاري
الابداع الحقيقي يبدأ عند التخلي :
لما بدأت اتخلي عن بعض الحاجات زي نشر محتوى عن حياتي الشخصية أو الطبخ وغيره لقيت اني قادرة افكر بشكل افضل وبقيت عارفة ابدع واشتغل احسن وقت كبير وجهد وفرته لما بطلت اصور الاكل اللي بعمله ، وبعض خطوات تحضير الاكل ده
لما بطلت انشر محتوى عن شغل البيت بقيت بعمل شغل البيت او الاكل واركز في المهمة دي من غير توتر ، أو تشتت اني لازم اصور اثناء ما انا بطبخ وده حقيقي وفر عليا الوقت اللي بقضيه في المطبخ
لو قارنت المدة اللي بقضيها في المطبخ وانا بطبخ من غير تصوير ومركزة فقط في الطبخ ف هنلاقيها اقصر بكتير عما لو كنت بطبخ وبصور الخطوات وبصور الاكلة او الوصفة بعد ما خلصتها
لما كل المحتوى اللي بقيت بقدمه بقى بيدور حوالين تصميم الجرافيك بدأت اركز اكتر في صناعة المحتوى عن تصميم الجرافيك ، وتقديم منتجات عن تصميم الجرافيك حقيقي اني اقعد ادور على افكار في مجال بعينه زي تصميم الجرافيك أسهل بكتير جدا لما يكون في اكتر من مجال بدور على أفكار فيهم
اقرأ أيضًا : اكتر من 100 فكرة لأهداف وعادات للعام الجديد
قررت اعمل ايه في الاكونت التاني ؟
وسط ما كنت بصمم محتوى للأكونت التاني iamsalmahaggag كنت بعمل تصميم لحكمة quote
وسبحان الله وسط كل البوستات اللي كنت بصممها بوست الحكمة ده كان اكتر حاجة مبسوطة وانا بصممها ، عرفت فعلًا ان دي الحاجة اللي عايزة اكمل فيها
ايه اللي يخليني اكمل في حاجة انا مش بحبها ومش مستمتعة بيها ، طالما عندي الاختيار اني اسيبها واختار الحاجة اللي بحبها ؟
قررت ان الاكونت التاني انشر عليه الاقتباسات والحكم والـ Quotes اللي بقراها وبحبها
أهم قرار أخدته في 2023
قررت اني اقضي وقتي في عمل الحاجة اللي بحبها ، قررت اني اركز على تصميم الجرافيك وما حوله ، قررت من أعماقي اني مش عايزة ابقى انفلونسر ابدًا ابدًا ابدًا
ملحوظة مهمة :
كل الكلام اللي ذكرته في البوست هنا هو رأيي الشخصي ووجهة نظري بناءً على تجربتي ، وبقدم كامل احترامي لكل شخص رأيه مختلف عن رأيي وبيتبنى وجهة نظر أخرى ، كل التقدير والاحترام لكم جميعًا
اخترت لك :