العيد خلص… وماذا بعد العيد ؟! سؤال صعب لأن اكيد انتم كمان زيي في حاجات كتيرة اجلتوها لبعد العيد
دايما بنحس إن الرجوع للشغل بعد أيام الراحة مش سهل، خصوصًا وإحنا بنشتغل في مجال كله ابداع زي الجرافيك ديزاين.
لو حاسين إنكم مش قادرين تبدأوا متقلقوش… الموضوع طبيعي، وعلشان كده جمعت لكم عشر خطوات بسيطة تساعدكم ترجعوا تركزوا وتنجزوا بعد العيد
👩💻 ازاي نرجع نشتغل تاني بعد أجازة العيد كجرافيك ديزاينرز؟ 🎨
1. 🧠 خُدها واحدة واحدة
مترجعوش من الأجازة على شغل كتير وضغط، لأن ده هيكون مرهق وموتر نفسيًا وهيصعب خطوة الرجوع للعمل مرة تانية
الافضل اننا نبدأ بخطوة صغيرة، زي إننا نفتح البرامج اللي بنستخدمها، نراجع المشاريعالقديمة، أو حتى نراجع الإيميلات. التدرّج في الرجوع بيخلي الموضوع أريح لعقلك وبيقلل الإحساس بالمقاومة.
2. ✅ رتب أولوياتك
احنا راجعين بعد اجازة جميلة وطويلة الحمدلله بس مش فاكرين اسمنا ايه اساسا وجوا مخنا هيكون في لخبطة وكركبة كتيرة اوي ، الافضل اننا نرتب الفوضى دي عشان منحسش اننا تايهين
خدوا ورقة أو افتحوا الأبلكيشن اللي بتستخدموه في تنظيم شغلكم، وابدأوا اكتبوا كل الحاجات اللي وراكم، سواء مستعجلة أو لأ.
بعد كده حطهم في ترتيب حسب الأهمية والمواعيد النهائية. ده هيساعدكم تحددوا تبدأوا منين بدل ما تفضلوا تايهين وسط المهام.
3. 🧹 نظّف المساحة حوالينك
لو المكتب مليان ورق أو أكواب فاضية، أو اللابتوب مليان ملفات مرمية عالديسكتوب، نظّفوه.
الترتيب البصري حوالينا بينعكس على ترتيبنا الذهني. كمان تقدروا تنظفوا ملفات التصميم، الفونتات، والفولدرات عشان تحسوا بالترتيب والروقان.
سواء المكتب، اللابتوب، أو الملفات… رتّبوهم. الترتيب بيساعد دماغكم تترتب هي كمان!
4. 📅 ارسم خطة بسيطة ل3 أيام
متضغطوش على نفسكم بخطة لأسبوع كامل من أول يوم. اعملوا جدول صغير لـ 3 أيام بس، وحددوا فيهم 2 أو 3 مهام رئيسية في اليوم.
كده هتحسوا بالإنجاز، وفي نفس الوقت هترجعوا لمود الشغل بالتدريج.
5. ✍️ ارسم أو صمم حاجة لنفسك
ابعدوا شوية عن الشغل التجاري والمشاريع الكبيرة وارجعوا اعملوا تصميم بسيط لنفسكم، حتى لو حاجة مش هتنشروها.
التصميم من غير ضغط بيقلل من التوتر، وبيفتّح خيالك.
📌 ممكن يعجبك كمان:
التحدي الأسبوعي – طلع الإبداع اللي جواك
اختصارات Canva السحرية! هتنجز شغلك في نص الوقت
6. 🎧 اسمع حاجة تحفّزك
ممكن تسمعوا بودكاست عن التصميم، أو فيديوهات عن العمل الحر الانجاز ريادة الاعمال، انا بعتبر كأن فيديوهات اليوتيوب اللي بتتكلم عن تنظيم الوقت والانجاز والانتاجية دي كأنها موجهة ليا لوحدي واللي بيقدموها كأنهم اصدقائي بيتكلموا معايا فـ بحس اني مش لوحدي وانه انا كمان عايزة اقوم وانجز حاجات كتيرة وفعلا باخد دفعة وطاقة اني اكمل أو ابدأ حاجاة جديدة
7. 💻 اشتغل بطريقة Pomodoro
نظام الPomodoro بيقسم الوقت لـ 25 دقيقة شغل + 5 دقايق راحة. دي طريقة فعّالة جدًا خصوصًا لما تكونوا مش قادرين تركزوا. هتلاقوا نفسكم أنجزتوا حاجات كتير في وقت قليل ومن غير ما تحسوا بتعب.
8. 🤝 شارك في جروب أو مجتمع تصميم
مجرد إنكم تشوفوا غيركم بيرجع يشتغل، أو حد بينزل تصميم حلو، ده بيحفزكم تلقائيًا.
شاركوا تصميم حتى لو بسيط، واطلبوا رأي الناس. التفاعل بيشجعكم تكملوا
9. ☕ كافئ نفسك على أي إنجاز بسيط
ممكن تكونوا خلصتوا بس ترتيب ملفاتك أو رديتوا على إيميل… كافئوا نفسكم بحاجة بسيطة بتحبوها. المكافأة بتخلق رابط إيجابي بين الشغل وبين المتعة، وده بيخلي الرجوع أسهل.
10. 🙌 افهم إن الرجوع بياخد وقت
متحسوش بالذنب أو الأسف لو حاسين إنكم مش راجعين بكل طاقتكم من أول يوم.
العقل والإبداع محتاجين شوية وقت علشان يشتغلوا بكفاءة تاني.
الصبر الصبر الصبر ! مهم جدًا عشان النجاح في أي مجال، وافتكروا إن كل يوم هتبقوا أحسن من اللي قبله.
مفيش مشكلة لو أول يوم مش مثالي… يوم عن يوم هترجعوا للمود والإبداع.
في النهاية:
الراحة كانت مهمة، والشغل كمان مهم. خدوا وقتكم ، وابدأوا بخطوات صغيرة، وهترجعوا أفضل من الأول.
ومتنسوش… الإبداع محتاج مساحة نفسية مرتاحة.
وكل سنة وانتم طيبين، وعودًا حميدًا ❤️
متنسوش تشاركوني في التعليقات ايه اكتر نصيحة عجبتكم وشكرًا عشان وصلتوا لهنا ودمتم بخير
