أهلا وسهلا يا اصدقاء ! النهارده هقولكم على أفكار لـ محتوى انستجرام ، اكيد بيجي لكم وقت مش بتبقوا عارفين تنشروا ايه على انستجرام ، عشان كدا هجمع لكم هنا مجموعة من الافكار لـ محتوى انستجرام هتساعدكم جدا ان شاء الله
ملحوظة :في نهاية البوست ده هتلاقوا خطط لمحتوى شهر كامل في مجالات تخصص معينة ، هتفيدكم جدًا ان شاء الله
أفكار محتوى انستجرام هتساعدنا في ايه ؟
أول حاجة: هتساعدنا اننا ننشر محتوى مستمر على انستجرام وبشكل منتظم ، وده هيساعدنا اننا منختفيش فجأة من انستجرام ونخسر متابعين
تاني حاجة : هتساعدنا اننا نستخدم التسويق بالمحتوى بشكل صحيح ، التسويق بالمحتوى هو طريقة من طرق التسويق عن طريق انكم تروجوا لنفسكم للخدمة اللي بتقدموها او المنتج اللي بتبيعوه عن طريق انكم تقدموا محتوى قيم يفيد الناس المهتمة بالمجال اللي فيه الخدمة أو المنتج بتاعكم
ودلوقتي بقى يلا بينا نبدأ في:
أفكار لـ محتوى انستجرام
1- خطوة مفيدة
من احسن الحاجات اللي ممكن تنشروها ك محتوى على انستجرام ، وتستخدموها في التسويق بالمحتوى هى انكم تنزلوا خطوة مفيدة تنفع الناس في مجال تخصصكم ، النوع ده من المحتوى على انستجرام هيساعدكم كمان تكسبوا عدد كبير من المتابعين والمجتمع بتاعكم يكبر
الخطوة دي مثلا ممكن تكون :
- خطوة لزيادة الانجاز
- خطوة في مجال القراءة تساعد الناس تكتسب عادة القراءة
- خطوة مهمة في مجال التسويق
- خطوة لتنظيم الوقت
وخليكم فاكرين ان ده المحتوى اللي الناس بتحبه وبتحفظه عندها وده بينبه انستجرام ان البوست ده مفيد ومهم
***
2- خلف الكواليس
في اغلب الاوقات الناس بتشوف الصورة النهائية بس ، بس محدش يعرف خلف الكواليس كان في ايه وناس كتيرة بيكون عندها فضول تعرف خلف الكواليس بيحصل ايه والدنيا بتمشي ازاي من البداية خالص لحد ما المحتوى او الخدمة يوصل للناس
المحتوى بتاع خلف الكواليس ممكن يبقى في اي مجال ، يعني مثلا
لو المجال بتاعكم الطبخ ، تقدروا تنزلوا صور للمطبخ وهو مكركب ومش مترتب اثناء تحضير الاكل
لو المجال بتاعكم التصوير ممكن تنزلوا صور من خلف الكواليس وانتوا بتصوروا
لو المجال بتاعكم الجرافيك ديزاين ممكن تنشروا خلف الكواليس وانتم شغالين على مشروع جديد حتى لو لقطات وصور بسيطة
***
3- زاوية مختلفة لنفس الصورة
لو المحتوى اللي بتقدموه على انستجرام من تصويركم ، فـ ممكن تنزلوا نفس الصورة بس من زاوية مختلفة ، ولو بتقصوا الصور عشان يبقى شكلها مربع قبل ما تنزلوها على انستجرام ، فـ ممكن تقصوا الصورة من جهة مختلفة ، وبكدا بقى عندكم صورة جديدة لمحتوى جديد
***
4- جملة ايجابية وتشجيعية
أيًا كان مجال تخصصكم تقدروا تنشروا جملة تحفيزية وتشجيعية ، تشجع الناس انها تبدأ أو تأثر في شخص وتخليه يبتسم او تحسن من حاله
***
5- اعلان او تشويق لحاجة لسه جاية
ممكن تشاركوا جمهوركم بتلميح بسيط عن مشروع جاي بتشتغلوا عليه ، يعني لو عندكم خدمة هتقدموها قريب أو منتج هتعرضوه لجمهوركم ، ولسه بتطوروا في الخدمة دي والخدمة لسه منطلقتش أو لسه المنتج بتجهزوا له فـ ممكن جدا تبدأوا تتكلموا عن الخدمة دي حتى لو بتلميحات صغيرة ، تشوق متابعينكم وتحمسهم للخدمة أو المنتج اللي جاي
***
6- سؤال اجابته عند المتابعين
من ابسط الاسئلة اللي ممكن تسألوها للمتابعين:
- تحبوا تشوفوا محتوى عن ايه الفترة الجاية
- او المشاكل اللي بتواجهكم في مجال التخصص ده
- ايه خطتكم للاسبوع ده ؟
- ايه اهدافكم السنة دي؟
***
7- ليه بدأتوا؟
احكوا للمتابعين في بوست أو فيديو على انستجرام ليه بدأتوا شغل في مجال تخصصكم ؟ ليه اخترتوا المجال ده
***
8- ازاي بدأتوا؟
احكوا للمتابعين في بوست أو فيديو ازاي بدأتوا في شغلكم الحالي ؟ وايه الموقف اللي حصل أو الحكاية ورا بدايتكم في مجالكم
***
9- سببين لحبكم مجال تخصصكم
أيًا كان مجال تخصصكم اكيد في اسباب كتيرة تخليكم تحبوه ، احكوا عن سببين منهم للمتابعين في بوست
***
10- صورة وراها حكاية
حتى لو الصورة مش بتاعتك ومن مصدر صور مجاني ، ممكن الصورة دي تكون بتفكرك بحاجة بذكرى بمكان روحته قبل كدا ، لو صورة فيها مكتب شكله حلو ونفسكم يبقى عندكم واحد زيه ممكن تقولوا الكلام ده في بوست
***
11- منشن لشخص تاني واتكلموا عنه
اكيد في اشخاص في مجال تخصصكم ملهمين بالنسبة لكم ، او استفدتوا منهم أي حاجة ، في بوست على انستجرام اعملوا منشن للشخص ده واتكلموا عنه
***
12- آخر بوست ع المدونة أو آخر فيديو يوتيوب
اذا كنتم بتقدموا محتوى على منصة تانية غير انستجرام فـ اكيد كل فترة بينزل بوست جديد على المدونة أو فيديو جديد على قناتكم على اليوتيوب ، احكوا للمتابعين عن آخر حاجة نشرتوها ولو بجمل بسيطة
***
13- نصيحة تعليمية
أنشروا نصيحة مفيدة في مجال تخصصكم تضيف للمتابعين حاجة جديدة وتعلمهم مهارة او تقنية جديدة
***
14- دورات وكورسات لتعلم مجال تخصصكم
ايه افضل الكورسات اللي تعرفوها في مجال تخصصكم ؟ طيب ايه احدث كورس سمعتوا عنه ؟ احكوا للمتابعين عنه في بوست
***
15- أفضل المعدات أو البرامج في مجال تخصصكم
أيًا كان مجال تخصصكم أكيد في ادوات بتستخدموها أو معدات أو برامج ، احكوا للمتابعين عن حاجة من الادوات أو البرامج دي في بوست على استجرام
***
16- احتفلوا بحدث حقيقي زي العيد
مع الوقت اكيد هتمر عليكم مناسبات زي العيد مثلا ، احتفلوا مع المتابعين بالعيد عن طريق بوست انستجرام لطيف ظريف كدا تعيدوا بيه عليهم
***
17- احتفلوا بحدث افتراضي زي الوصول لألف متابع
في أحداث افتراضية كتيرة بتحصل على السوشيال ميديا ، زي مثلا وصولم لعدد معين من المتابعين ، أو عدد مشاهدات معين على قناة اليوتيوب ، احتفلوا بالحدث ده عن طريق بوست على انستجرام
***
18- صورة من مكان !
حلو جدًا تشاركوا الجمهور بتاعكم بصورة من مكان سافرتوا له أو حتى مكان بتحلموا تسافروا له في يوم من الأيام
***
19- صورة لمكان الشغل
لو في مساحة معينة بتشتغلوا فيها أو عندكم مكتب أو ترابيزة بتشتغلوا عليها شاركوا صورتها مع المتابعين
***
20 – أفضل منتج للشهر ده
أيًا كان مجال التخصص اكيد في منتج مفضل سوا منتج حقيقي وملموس زي كتاب أو بلانر مثلًا أو منتج رقمي زي الكورسات او تطبيقات الموبايل ، شاركوا المتابعين بأفضل منتج جربتوه الشهر ده
***
21- بتتابعوا مين وبتاخدوا الالهام منه
اكيد في ناس بتتابعوهم وبتاخدوا منهم الالهام ، ولما بتتفرجوا عليهم بيدوكم طاقة تكملوا ، اتكلموا عن الناس دي في بوست على انستجرام
***
22- حكمة أو نصيحة في ديزاين حلو
حلو انكم تشاركوا المتابعين حكمة أو قول مأثور في شكل تصميم جميل وجذاب
***
23- الوصول لهدف معين
اكيد في عندكم هدف معين أيًا كان مجال تخصصكم ، ممكن يكون الوصول لوزن معين ، عدد متابعين، عادة بقالكم ايام ماشيين عليها واكتسبتوها، شاركوا الجمهور بتاعكم الهدف ده وازاي وصلتوا له
***
24- تحدي
من اكتر الحاجات اللي بلاحظ ان عليها تفاعل كبير هى التحديات ، تقدروا تعملوا تحدي في أي حاجة تتخيلوها ، تحدي تصميم حاجة معينة ، تحدي تصوير حاجة معينة ، تحدي قراءة كتب ، تحدي للعناية بالبشرة أو تحدي لزيادة الانجاز
اختاروا تحدي معين واشتركوا فيه وادعوا المتابعين بتوعكم انهم يشتركوا في التحدي ده واسألوهم كل شوية عن اخبار التحدي ووصلوا لفين فيه
***
25 – حاليا بتابع او بقرا او بسمع
كل فترة كدا بكتشف حد جديد على انستجرام أو يوتيوب وبيعجبني المحتوى الموجود جدا لدرجة اني بقعد تقريبا 3 أيام مش بعمل حاجة غير اني بتفرج على المحتوى ده ، ممكن تشاركوا المتابعين بتوعكم عندكم هوس الأيام دي بمين وبتتابعوا مين
***
26- أهدافك للشهر ده
في بداية كل شهر أو حتى مش شرط بدايته ممكن بعد ما يعدي حبة أيام من الشهر عادي ، شاركوا المتابعين في بوست على انستجرا بالأهداف بتاعتكم للشهر ده وايه اللي عايزين تحققوه
***
27- أهداف السنة دي أو السنة الجديدة
بداية كل سنة هو الوقت اللي تقريبًا كل الناس بتعمل قائمة بالأهداف بتاعتها ، ليه انتم كمان متعملوش كدا ؟
شاركوا المتابعين بأهداف أو جزء من اهداف السنة الجديدة ، ول بتقروا البوست ده وكان خلاص بداية السنة عدى عليها فترة ، عادي بردو تشاركوا المتابعين بالأهداف بتاعتكم للسنة دي اللي احنا فيها
***
28- هوس
زي ما كل فترة بيجي لي هوس بمتابعة قناة يوتيوب معينة ، ساعات بيجي لي هوس بمشروب معين ، وعادي جدًا اني اتكلم عليه مع المتابعين في بوست
***
29- فشل
محدش بينشر خيبته بس ليه لآ عملت كذا ومنجحش جربت كذا ومنفعش معايا ، انا شايفة انه عادي ننشر تجاربنا حتى لو منجحتش
***
30- ايه السبب ورا تواجدكم على انستجرام
ليه عملتوا اكونت انستجرام وليه قررتوا تقدموا محتوى عليه ؟ شاركوا المتابعين الاجابة
***
31- حلمكم توصلوا لفين؟
أكيد في أحلام نفسكم تحققوها بالنسبة لمجال تخصصكم ، شاركوا المتابعين بتحلموا توصلوا لفين
***
32- رأي الناس
من فترة للتانية انشروا بوست اعرفوا منه رأيهم في المحتوى اللي بتقدموه ، ايه اللي المتابعين عايزين يعرفوه اكتر ؟ وعايزين يشوفوا محتوى عن ايه الفترة الجاية؟
***
33- تواصلوا معي
شاركوا المتابعين في بوست ازاي يتواصلوا معاكم بره انستجرام سواء عن طريق الايميل أو عن طريق أي وسيلة تانية
***
34- جدولك
ازاي بتنظموا وقتكم وايه الجدول اللي بتمشوا عليه لتقديم المحتوى ؟ لو في ايام خاصة بحاجات معينة وفي جدول شاركوه مع الناس
****
35- متواجدين فين اونلاين
انا بتفاجئ ان في ناس مش عارفة انه عندي قناة على تليجرام وبيدج على فيسبوك ، في الغالب انتوا كمان عندكم حسابات على منصات تانية زي لينكد ان او تليجرام أو غيره ، شاركوا الجمهور بكل المنصات اللي انتوا متواجدين عليها وعايزين المتابعين بتوعكم يعرفوها
***
ودلوقتي بقى مع خطط محتوى انستجرام اللي بتكون عبارة عن خطة شهر كامل من المحتوى في محال تخصص معين
خطة شهر من المحتوى للمصورين
خطة شهر من المحتوى في مجال الموضة والفاشون
خطة شهر من المحتوى لمصممين الجرافيك
يا رب تكونوا استفدتوا من البوست
.
شكرا عشان وصلتوا للنقطة دي وإلى اللقاء في بوست جديد
دمتم بخير
?يلا نبقى اصدقاء هناك كمان
***
اخترت لك :
افضل طرق جدولة محتوى انستجرام مسبقًا بشكل مجاني
مصادر لصور مجانية لمحتوى احترافي
فيديو : ازاي نعمل تصاميم مجانية بطريقة سهلة عشان نكسب من مجال الطباعة بالطلب؟