عشر نصائح تساعدك في العمل الحر من المنزل

أهلا وسهلا بيكم يا أصدقاء في بوست جديد ! لسه مكملين كلامنا عن العمل الحر من المنزل أو الـ Freelancing وفي بوست النهارده هقولكم على مجموعة من النصايح هتفيدكم سواء كنتم لسه فريلانسر مبتدئين أو في مرحلة متقدمة

النصايح دي اتعلمتها مع الوقت وبالتجربة ، وفي بعض النصايح عرفتها لما قريت اكتر في مجال العمل الحر على الانترنت

هتلاقوا وسط النصايح امثلة حصلت بالفعل معايا من مواقف حقيقية مريت بيها خلال تجربتي في العمل الحر من المنزل واتعلمت منها كتير

متنسوش تشوفوا البوست اللي فات : مواق1ع العمل الحر على الانترنت ومميزات وعيوب العمل الحر من المنزل هيفيدكم جدًا ويعتبر مكمل للبوست ده

ودلوقتي يلا بينا نبدأ في:

نصايح مفيدة للفريلانسرز وكل اللي مهتمين بالعمل الحر على الانترنت:

اوعد اقل واعط اكتر

ودي استراتيجية مهمة ومفيدة اوي في العمل الحر وبيع اي حاجة سواء خدمات او منتجات

لو مثلا بتصمم لوجو ، وخدمتك هى تصميم لوجو ومعاه ٢ موك اب ، نفذ الشغل وسلم للعميل لوجو و٣ او ٤ موك اب ، او لو وعدته بتنفيذ حاجة معينة نفذها وزود عليها حاجة ولو بسيطة ، دي حاجة بتخلي العميل ينبسط جدا ويحس انه اخد اللي متفق عليه وزيادة

الالتزام بالمواعيد

دي حاجة ناس كتيرة بتفتقدها للأسف ، مفيش اي احترام للمواعيد ، تتفق مع حد على موعد معين يجي لك بعد ساعة ويضيع لك وقتك ، عن نفسي حاجة بتستفزني جدا وكفيلة اني اتقفل من الشخص نهائي

الالتزام بالمواعيد - نصائح العمل الحر من المنزل

عشان كدا لازم تلتزم بمواعيدك ، قلت هتسلم الشغل كمان ٢٤ ساعة يبقى تسلمه في وقتها ، لأن عدم التزامك بالمواعيد هيبوظ تقييم العملاء ليك وهيضيع السمعة اللي عايز تبنيها لنفسك

اتفق مع العميل انك تنفذ الشغل في يومين وتسلمه في معاده احسن ما تقوله بعد ١٢ ساعة وانت عارف انك مش هتلحق وتتأخر

اشكر العميل بدل ما تعتذر

لو لأي ظرف اتأخرت ، وده وراد يحصل لظروف قهرية بس ميبقاش الطبيعي، اشكر العميل على الانتظار بدل ما تعتذر منه ، لو في حاجة فهمتها غلط ، رد على العميل وقوله : شكرا لتفهمك انا هصلح الموضوع حالا بدل ما تقول له بعتذر على سوء التفاهم

تنظيم الوقت

انت المدير زي ما قلنا ، ولما تكون فريلانسر ده ساعات بيخليك اوقات عايز تشتغل ٢٤ ساعة في اليوم وساعات بيخليك عايز ترتاح طول اليوم ، حدد وقت للشغل وده الوقت اللي تقعد فيه تشتغل وتركز ومتعملش فيه حاجة غير الشغل ،ووقت للراحة وده الوقت اللي تنسى فيه انت بتشتغل ايه ووراك ايه وتعمل حاجات بتحبها بس عشان تفصل تماما وتقدر ترجع بعد كدا تكمل

مكان للشغل

من الحاجات اللي هتسهل عليك هى انك تحدد مكان للشغل سواء مكتب او ركن تحط فيه الحاجات اللي بتستخدمها في شغلك ، وتنظمها كل يوم بعد ما تخلص شغل

لو انتِ أم او شخص صعب يشتغل في نفس المكان كل يوم ، حددي ايه الحاجات اللي بتستخدميها في الشغل وحطيهم مع بعض دايما، يعني مثلا بتستخدمي في شغلك اللابتوب النضارة سماعات نوته وقلم ، دايما خليهم مع بعض عشان يكون سهل اول ما تحبي تشتغلي تاخديهم مع بعض وتقعدي تشتغلي مش لسه هتدوري وتجيبي كل حاجة من حتة مختلفة

استمتع بالحياة الاجتماعية

صحيح ان الشغل اونلاين مفيهوش ميزة انك تقابل ناس كل يوم ، بس انت تقدر تحولها لميزة وبدل ما بتقابل ناس ممكن متبقاش حابب تشوفهم كل يوم في شغلك ؛ قابل ناس بتحبها واقضي وقت معاهم

استمتع بالحياة - نصائح العمل الحر من المنزل

لو بتشتغل من البيت وعايش مع عيلتك لازم كل يوم على الاقل ساعتين تقضيهم مع عيلتك ، عيلتك بس من غير موبايل ولا لابتوب وغيره

اشترك في جيم او نادي واتعرف على ناس جديدة

ارجع كلم اصحابك من الجامعة او المدرسة وقابلهم لو متاح او اتكلموا مكالمة فيديو

اعمل كل الحاجات اللي تربطك بالناس وتخلي في ناس حقيقية مش افتراضية في تعاملاتك اليومية

مع أخذ الحذر طبعا واتخاذ الاجراءات الوقائية بسبب فيروس كورونا

جرب اكتر من موقع

في العمل الحر على الانترنت انصحك انك تجرب اكتر من موقع ، بلاش تكتفي بموقع واحد وتفضل قاعد مستني وتيأس ، جرب اكتر من موقع لدرجة اني انصحك انك تجرب كل المواقع اللي ذكرتها فوق دي لو تقدر ، وتقدم على شغل فيهم كلهم ، يمكن موقع معين هو اللي تلاقي فيه شغل بشكل اسرع وترتاح في الشغل عليه وتنجح عليه اكتر من الباقي ، ومش هتعرف مين فيهم الموقع المناسب غير لما تجبهم كلهم

الصبر

اصبر على تعديلات العميل وحاول تنفذها مع انها ساعات بتكون مش متوافقة مع رأيك ، زي كبر اللوجو او اختيار الوان مش متناسبة ، انصحه واعمل له اللي يشوفه مناسب لو مقتنعش ، و لو انت مصمم جرافيك تقدر تضيف للبورتوفوليو بتاعك النسخة اللي شايفها مناسبة لذوقك انت لو تعديلات العميل ضد اساسيات التصميم من اساسه

اصبر كمان لو مفيش شغل واستمر في التقديم على عروض ومتيأسشش ، لازم على الاقل تستمر 6 شهور قبل ما تقول الكلام ده مش نافع

اتعلم تقول لا ومتشتغلش من غير فلوس

اهم حاجة اتعلمتها اني يكون عندي الشجاعة والجرأة اني اقول لأ لو الشغل مش عاجبني

لو الشغل اقل من السعر الاي بتقدمه لخدماتك قول لأ

لو الشغل حرام او ضد مبادئك قول لأ

لو هتشتغل من غير فلوي قول لأ حتى لو كان المقابل اللي تم الاتفاق عليه رقم خيالي ومتحلمش بيه

من اكتر المواقف اللي علمت معايا هو ان في عميل طلب مني اعمل له تصميم معين وكان فيه شغل كتير ، واني اخلصه في اقل من ٦ ساعات ، والمقابل المادي كان كبير نوعا ما بالنسبة لي في وقتها ، بس مش هاخد اي فلوس غير لما العميل يستلم الشغل ويعجبه

وافقت ساعتها ومنمتش الليلة دي ، لاننا اتفقنا ع الشغل بالليل وكان مفروض اسلم الشغل قبل الساعة ١٠ الصبح

آه ! كنت مغفلة ، بس فعلا محدش بيتعلم ببلاش

كان ورايا حاجة عائلية مهمة اليوم اللي بعده ومع ذلك سهرت الليلة كلها ومنمتش غير لما خلصت الشغل وسلمته الساعة ٧ الصبح وعليه علامة مائية watermark ، رد عليا العميل وقالي ان الشغل مش في المستوى المطلوب ، ومش هيدفع غير كذا (رقم أقل بكتير) ولما رفضت رفض هو كمان يديني المقابل المادي اللي اتفقنا عليه

ومن ساعتها اتعلمت اني مش هتشغل ابدا بدون اي مقابل ، يا اما العميل يقبل الصفقة في الموقع وبقولهم كدا في وشهم هبدأ شغل لما حضرتك تقبل العرض بتاعي (يعني يدفع الفلوس في الموقع)

ولو الشخص بشتغل معاه من خلال الموقع بتاعي بردو هبدا الشغل بعد اتمام عملية الدفع

وبالنسبة للجملة بتاعت طب انا ايه اللي يضمن لي ان الشغل يعجبني ، فانا برد واقول اني واثقة في شغلي وانه حضرتك تقدر تقول التعديلات اللي تحبها لحد ما نوصل للشكل المطلوب ، لكن انا بردو مش بشتغة من غير اتفاق ومقابل تقديرا لوفتي ومجهودي

طور من نفسك وقدر نفسك صح

لازم لازم لازم متقفش في مكانك ، حتى لو بيجي لك ربح ودخل كويس من العمل الحر لازم تكمل تعليم ، التعليم مالوش نهاية ، ومش بيخلص ، اتعلم اكتر واعرف اكتر عن مجالك وطور من مهاراتك دايمًا وخليك مطلع على كل جديد

لما تطور من نفسك هتقدر تزود اسعار الخدمات والعروض بتاعتك ، وكمان في بعض العلامات بتساعدك تعرف اذا كان مفروض تزود سعر الخدمة بتاعتك ولا لآ ، والعلامات دي اتكلمنا عليها في الفيديو ده

انصحكم تشوفوه عشان في ناس كتيرة وخاصة الفري لانسرز العرب بيقللوا من التقدير المادي اللي يستحقوه في مقابل المهارات بتاعتهم ، ولو لسه في البداية ومش عارفين على أي أساس تحددوا أسعار الخدمات بتاعتكم تقدروا تشوفوا الفيديو ده هيساعدكم جدًا ان شاء الله