أهلا وسهلا يا أصدقاء في تحدي جديد وهو تحدي تصميم الباترن لمصممين الجرافيك ، التحدي ده هيفيدكم جدًا لأن تصميم الباترن Pattern Design يعتبر تخصص بحد ذاته ، وإذا اكتسبتوا مهارة في تصميم الباترن تقدروا تخلوها مصدر ربح قوي جدًا ، وأحلى حاجة في الموضوع إننا نقدر نكسب منها فلوس بشكل مباشر Active income وبشكل غير مباشر Passive income ودي طريقة الربح اللي بحبها وبنصح دايمًا اننا نسعى ليها
كل يوم في التحدي هيكون في موضوع جديد للباترن اللي هنصممه ، وتقدروا ترسموا العناصر اللي تحبوها بأي طريقة وبأي أسلوب ، كمان تقدروا تستمعوا بتفاصيل خلف الكواليس في ستوري حسابي على انستجرام
ايه هى الباترن ؟
الباترن Pattern هى عبارة عن تصميم مكون من عدد من العناصر ، العناصر دي بيتم تكرارها في التصميم والتكرار ده ممكن يكون بطريقتين :
- طريقة عشوائية ، يعني العناصر نوزعها بشكل عشوائي تمامًا
- طريقة منتظمة ودي اللي بنسميها Seamless Pattern ، يعني التكرارات دي بتبقى بنظام معين نقدر نكرره كتير جدًا من غير ما الباترن تبوظ ودي نقدر نعملها ببرامج تصميم الجرافيك بكل سهولة زي برنامج اليستريتور Adobe illustrator
نصمم الباترن ازاي ؟
خطوات تصميم الباترن بتعتمد على كذا حاجة منها : موضوع تصميم الباترن نفسه ، وقدرتنا ومهارتنا في التصميم ، لكن نقدر نقول إن في خطوات أساسية لتصميم الباترن وهى :
- اختيار العناصر اللي بتعبر عن موضوع الباترن بتاعنا
- تصميم أو رسم العناصر اللي هتتكرر عشان تعمل لنا الباترن ، والخطوة دي نقدر نعملها بكذا طريقة ، يا اما نرسم العناصر بالورقة والقلم وننقل الرسمة للكمبيوتر ونحولها لرسمة رقمية على برامج التصميم المختلفة زي اليستريتور أو نرسم الرسمة على طول بشكل رقمي على الكمبيوتر ، وده بيرجع لمدى قدرتنا على التصميم والرسم
- تحويل مجموعة العناصر بعد رسمها لباترن بشكل تلقائي عن طريق برامج التصميم المختلفة
وفي الفيديو ده بنشرح بالتفصيل ازاي نحول مجموعة عناصر لباترن على ادوبي اليستريتور
ازاي نكسب فلوس من تصميم الباترن ؟
مصدر دخل مباشر Active income :
نقدر نكسب من الباترن بأكتر من طريقة من ضمنهم إننا نخلي الباترن مصدر دخل مباشر لينا Active Income ودي عن طريق :
1) تقديم خدمات تصميم الباترن : ونقدر نقدم الخدمة دي على مواقع العمل الحر المختلفة ، وكمان نقدمها على حسابات السوشيال ميديا الخاصة بينا بعد ما نكون صممنا أكتر من باترن وعندنا معرض أعمال أو Portofolio قوي فيه أعمال تشد وتجذب العملاء
2) بيع الباترن لأصحاب صناعات المفروشات : زي ال والطرح – الحجابات – ورق الحائط والديكورات ، وكل المنتجات اللي ممكن نضيف عليها الباترن ، وهنا احنا دورنا بيقف لما بنبيع الباترن ، ومش مسئولين عن طباعتها على المنتج أو بيع المنتج نفسه ، يعني المنتج النهائي اللي بنبيعه هو الباترن أو التصميم بتاعنا
3. طباعة الباترن على منتجات وبيعها : وهنا احنا اللي بنطبع الباترن على منتج زي مثلا Cover الموبايل ونبيع المنتج ده ، يعني المشروع بتاعنا المنتج النهائي اللي بنبيعه فيه هو Cover الموبايل
مصدر دخل غير مباشر Passive income :
وكمان ممكن نكسب من تصميم الباترن ونخليها مصدر دخل غير مباشر لينا Passive Income وده نوع من الدخل أنا بفضله أكتر وبسعى دايمًا له وبنصح الناس به ، لأنه برأيي مصادر الدخل الغير مباشر هى الأساسا لبناء الثروات والطريق للحرية المالية ، لأننا بنعمل الحاجة وبنشتغل عليها مرة واحدة فقط ولما بنطلق المشروع أو المنتج ونسوق له والناس تعرفه المبيعات بتزيد ، وبعد كدا مش بنحتاج نعمل مجهود إضافي ونستمتع بالأرباح
ومن طرق الربح الغير مباشر من تصميم الباترن :
1)الربح من الطباعة بالطلب : تقدروا ترفعوا التصاميم بتاعتكم على مواقع الطباعة بالطلب المختلفة ، سواء العربية أو الاجنبية ، وتخلوا التصميم بتاعكم متاح على منتجات كتيرة جدًا ، وكل شخص هيشتري منتج عليه تصميم الباترن بتاعكم الموقع هيطبع المنتج ويشحنه للعميل وأنتم هتكسبوا نسبة الربح بتاعتكم
الـ Patterns من التصاميم اللي بتلقى رواج كبير جدًا ، والعملاء بيحبوا يشتروها ، لأنها بتدي شكل جمالي على منتجات كتيرة زي المفروشات والوسائد ، جرابات الموبايل وشنط اللابتوب ومنتجات تانية كتيرة
وطبعًا تقدروا ترفعوا نفس التصاميم على مواقع الطباعة بالطلب المختلفة عادي جدًا وتمسبوا من نفس التصميم من أكتر من موقع
2) بيع التصاميم وعرضها على المواقع اللي بتقدم عناصر التصميم المختلفة زي : Freepik و Canva ولما حد يستخدم التصاميم بتاعتنا أو يحملها احنا بناخد نسبة ربح ، قد تكون نسبة الربح بسيطة ، لكن مبلغ صغير على مبلغ صغيرة بيتجمعوا في الآخر ويعملوا مبلغ كبير
واتلكمنا على الطريقة دي بالتفصيل في الفيديو ده
تقدروا تعرفوا أكتر عن مصادر الدخل الغير مباشر أو الدخل السلبي Passive income من البوست ده
يلا نبدأ في تحدي تصميم الباترن :
شاركوا في التحدي :
تقدروا تشاركوا في التحدي والتصاميم اللي هتعمولها هنشرها هنا بأساميكم لما تبعتوها لي على رسايل الفيسبوك أو انستجرام
مواضيع التحدي :
التحدي هيكون لمدة 7 أيام ، كل يوم في تصميم جديد ، والمواضيع بتاعت التحدي هتكون كالتالي :
- ملابس
- ورق شجر
- أكواب ومجات
- أشكال
- فضاء أو سماء
- آيس كريم – مثلجات
- زهور
اليوم الأول : ملابس
في اليوم الأول من التحدي الموضوع هيكون : ملابس ، نختار أي ملابس بنحبها ونرسمها ، عن نفسي اخترت اني ارسم فستانين وجيبة وتي شيرت
رسمتهم الأول على الورق وبعدين صورت الرسمة بتاعتي ونقلتها على اللابتوب وبدأت ارسمها بشكل رقمي
تقدروا ترسموا أي عناصر من خيالكم أو تحملوا ملف التدريب وترسموا نفس العناصر اللي رسمتها بالظبط
احصلوا على ملف العمل بكل سهولة :
تقدروا تحملوا ملف العمل بكل سهولة وتتدربوا على رسم العناصر دي بنفسكم ، وكل ما تتدربوا أكتر كل ما الرسم على الكمبيوتر أو اللابتوب هيبقى أسهل بكتير سواء باستخدام الماوس أو تابلت جرافيك
أكواد الألوان :
ودي النتيجة النهائية للباترن اللي صممتها بالرسومات بتاعتي
اليوم الثاني : ورق شجر
في اليوم التاني من التحدي حبيت إن الباترن تكون عن ورق الشجر ، رسمت أكتر من ورقة شجر في الاسكتش بتاعي وبعدين نقلتهم للابتوب وبدأت ارسمهم بشكل رقمي على اليستريتور ، وكل التفاصيل هتلاقوها موجودة في الفيديو القادم
احصلوا على ملف العمل بكل سهولة :
تقدروا تحملوا ملف العمل بكل سهولة وتتدربوا على رسم ورق الشجر بنفسكم ، وكل ما تتدربوا أكتر كل ما الرسم على الكمبيوتر أو اللابتوب هيبقى أسهل بكتير سواء باستخدام الماوس أو تابلت جرافيك
أكواد الألوان :
وده كان الشكل النهائي للباترن لما تتحط على منتج :
اليوم الثالث : زهور
في اليوم التالت من التحدي حبيت إن الباترن تكون عن الزهور ، رسمت أكتر من زهرة أو وردة بالقلم الرصاص في الاسكتش ، وبعدين نقلت الرسمة للابتوب وبدأت ارسمهم بشكل رقمي على اليستريتور ، وكل التفاصيل هتلاقوها موجودة في الفيديو القادم
احصلوا على ملف العمل بكل سهولة :
تقدروا تحملوا ملف العمل بكل سهولة وتتدربوا على رسم الزهور بنفسكم ، وكل ما تتدربوا أكتر كل ما الرسم على الكمبيوتر أو اللابتوب هيبقى أسهل بكتير سواء باستخدام الماوس أو تابلت جرافيك
اليوم الرابع : أكواب
الأكواب أو المجات من الحاجات اللي بتشدني جدًا وبحب اشتريها واتفرج على اشكالها ، في اليوم الرابع من التحدي الباترن موضوعه هيكون أكواب، رسمت أكتر من كوب ومج بايدي في الاسكتش الأول ، ونقلت الرسمة للابتوب وبدأت ارسمهم بشكل رقمي على اليستريتور ، وكل التفاصيل هتلاقوها موجودة في الفيديو القادم
احصلوا على ملف العمل بكل سهولة :
تقدروا تحملوا ملف العمل بكل سهولة وتتدربوا على رسم الأكواب بنفسكم ، وكل ما تتدربوا أكتر كل ما الرسم على الكمبيوتر أو اللابتوب هيبقى أسهل بكتير سواء باستخدام الماوس أو تابلت جرافيك
اليوم الخامس : آيس كريم
في اليوم الخامس مع بعض هنرسم باترن الموضوع بتاعها هو آيس كريم أو مثلجات ، حسيت باحساس جميل اوي وانا برسمها ، شكلهم كان كيوت ولذيذ جدًا وحسسوني بإن الصيف كدا داخل علينا ، تقدروا تشوفوا كل تفاصيل الرسمة من الفيديو الجاي
احصلوا على ملف العمل بكل سهولة :
تقدروا تحملوا ملف العمل بكل سهولة وتتدربوا على رسم آيس كريم أو مثلجات بنفسكم ، وكل ما تتدربوا أكتر كل ما الرسم على الكمبيوتر أو اللابتوب هيبقى أسهل بكتير سواء باستخدام الماوس أو تابلت جرافيك