نصائح وعادات يومية للاهتمام بالصحة النفسية

في الزمن اللي احنا فيه وكأشخاص عندنا طموح تحديات وأهداف عايزين نحققها وفي زحمة الحياة ساعات بننسى نفسنا ونهمل صحتنا النفسية

لو بتشتغلوا في شركة أو مؤسسة أو كنتم بتشتغلوا شغل حر من البيت أو صناع محتوى فأكيد ممكن تمروا ببعض الازمات النفسية زي مثلًا القلق أو الاكتئاب أو التقلبات المزاجية

النهارده هكلمكم على بعض الطرق والنصايح اللي هتساعدكم تهتموا بصحتكم وحالتكم النفسية وفي نفس الوقت متهملوش شغلكم ومشاريعكم وتقدروا توازنوا بين البيزنس الخاص بيكم وحالتكم النفسية

بما اني بشتغل من البيت وبصنع محتوى و ورايا مسئوليات تانية في البيت ، فانا عارفة قد ايه صعب اننا نوازن بين شغلنا والمهام اللي ورانا وشغل البيت وكمان نلاقي وقت نرفه فيه عن نفسنا ونهتم بيها

لكن في الفترة الاخيرة ادركت فعلا ان قد ايه لما تكون نفسيتي كويسة ، واكون مش مضغوطة ولا قلقانة ده بيأثر بشكل ايجابي على شغلي وانتاجيتي وعلى فرحتي بالانجاز اللي بحققه

على عكس لو مثلا قلقانة أو مزاجي مش حلو ، او حاسة بالضغط فـ ده بيأثر بشكل سلبي كبير جدا على كل حاجة بعملها وحتى فرحتي بأي انجاز او هدف بحققه بتبقى مكسورة ومش حاسة بطعمها

عشان كدا حبيت اتكلم معاكم في نصايح وخطوات بتساعدني ان حالتي النفسية تبقى أفضل وأيامي تمر من غير توتر أو بتوتر أقل

نصائح لحالة نفسية أفضل وأيام عمل بلا توتر

1. شوف السما كل يوم

طبعًا انا لو قلت لنفسي حتى اني عايزة اخرج من البيت بشكل دوري كل اسبوع أو اعمل أي نشاط خلال الأسبوع هيكون صعب بالنسبة لي جدًا

فـ عشان كدا بحاول ان كل حاجة تبقى بسيطة جدًا واني اعمل الخطوة بأسهل طريقة ممكنة

فـ اللي اقدر فعلًا اني اعمله كل يوم هو اني اشوف السما كل يوم ، من شباك البيت من البلكونة وانا بسقي الزرع

مش محتاجين اكتر من 5 دقايق تسرحوا في السما والشمس ، 5 دقايق على الأقل نفصل فيهم من كل حاجة ونتأمل في الدنيا حوالينا ونحمد ربنا على النعم اللي مالية حياتنا ، الحمدلله والشكر لله

طبعًا لو الـ 5 دقايق بقوا وقت اطول يا حبذا ، ممكن يتحولوا لربع ساعة بريك في البلكونة مع كوباية شاي ، أو مثلا خروجة حلوة مع ناس بنحبها

بس بما ان الحاجات دي مش متاح اننا نعملها بشكل دوري كل أسبوع ، فـ نقدر نكتفي بس بـ 5 دقايق نبص فيهم للسما من أي شباك أو بلكونة

2. الصلاة في اوقاتها:

قد تبدو انها نصيحة دينية بحتة ، بس عن تجربة لو الظهر أذن وصليته وقعدت اشتغل الوقت بيكون فيه بركة وبقدر انجز اكتر بلا توتر لأني عارفة ان قدامي ان شاء الله وقت طويل هعرف اركز فيه لحد ما العصر يأذن ومدة التركيز دي ذهني مش هيكون مشغول ان كل شوية افكر نفسي لازم اقوم اصلي الظهر يلا قومي صلي الظهر وهكذا

ده بالاضافة طبعًا لإن اكيد ربنا بيكرمنا وبيبارك في وقتنا في المقام الأول

3. ابتسم حتى لو ابتسامة مزيفة

في حكمة اجنبية بتقول : “Fake it till you make it” الحكمة دي معناها اننا نصطنع الحاجة لحد ما نعملها أو نتقنها فعلًا

من الحاجات اللي بتنطبق عليها الحكمة دي هى الابتسامة أو التبسم ، بحاول ابتسم وانا قاعدة بشتغل حتى لو ابتسامة مزيفة والشغل تقيل على قلبي

لأننا اصلا لو فكرنا فيها هنلاقي اننا لما نيجي نبتسم حتى لو تصنعنا الابتسام قد نجد أسباب للابتسام حقيقية ، زي اننا في فيض من النعم الحمدلله

وقد نكتشف ان مفيش سبب حقيقي ورا اننا نشتغل واحنا مكشرين ووشنا عابس ، طب ونكشر ليه اصلا وليه نشتغل في نكد لما ممكن نبتسم

وده ياخدنا للنصيحة اللي بعدها وهى :

4. استمتع:

لو وصفت اهدافي في 2022 بكلمة واحدة هتكون اني استمتع Enjoy

احاول اشوف الجمال في التفاصيل الصغيرة واستمتع بيها ، بما ان المؤمن امره كله خير ، فـ احاول اشوف الخير في كل حاجة بتحصل لي وبتحصل حواليا

احاول استمتع بكل حاجة بعملها ، لو بعمل مونتاج لفيديو طويل وتقيل على قلبي ومش راضي يخلص احاول استمتع على قد ما اقدر واشوف الجانب الايجابي للموضوع اني بعمل حاجة بحبها أو اني بعمل مهارة جديدة ، افتكر ان كل ثانية بتعدي مش هترجع تاني فـ احاول استمتع بيها على قد ما اقدر

5. هواية بهدف المتعة لا الربح

كلنا عندنا اهتمامات مختلفة غير مجال شغلنا أو في مجال تاني غير المجال اللي بنكسب منه فلوس

لما يبقى عندنا هواية بنمارسها بهدف المتعة مش بهدف اننا نكسب من وراها فلوس ده هيفرق كتير في صحتنا النفسية وحالتنا المزاجية

لأن هيكون عندنا وقت نقضيه مع نفسنا ونطلع كل الهم والضغط والتوتر اللي جوانا في الهواية دي

الهواية دي ممكن تكون رياضة بنمارسها ، ممكن تكون حرفة بنحبها زي التريكو ، الكروشيه ، ممكن تكون اننا نزرع نباتات منزلية ، ممكن تكون رسم خياطة طبخ وغيره

عن نفسي بحب اعمل تريكو وبحب كمان الزرع جدًا ، بحب ازرع نباتات واهتم بيها ، بحب النباتات المثمرة جدًا ومزاجي بيتحول تمامًا لو بصيت ع الزرع بتاعي لقيته طلع زهرة والزهرة بعد كدا اتحولت ثمرة

ده كفيل انه يغير مزاجي ويشقلب اليوم بتاعي ويملاه طاقة ايجابية ومشاعر جميلة

طبعًا أيًا كانت هوايتكم لو الهواية دي اتحولت لبيزنس ، يعني مثلا بتعملوا كروشيه وبعدين قررتوا تبيعوا المنتجات دي والهواية قلبت مشروع فـ حلو اكيد ، لكن مهم ساعتها تدوروا على هواية جديدة نقلل بيها التوتر ونبسط بيها نفسنا لأن أي مشروع أكيد بيكون فيه ضغط نفسي وممكن يسبب لصاحبه في بعض الاوقات توتر وارهاق نفسي

انتم كمان شاركوني في التعليقات ايه هى هواياتكم اللي بتحسوا انها بترفه عنكم وبتغير لكم مزاجكم وحالتكم النفسية ؟

6. دلع نفسك:

فكروا ايه اكتر حاجة بتحسسكوا انكم مبسوطين وفرحانين ومتستنوش ان حد يعملها لكم واعملوها لنفسكم

لو مزاجكم بيتظبط لما تكونو لابسين لبس حلو ، البسوا لبس حلو ومريح كل يوم في البيت ، سرحوا شعركم ، البسوا حلق أو أي اكسسوارات بتحبوها ، رشوا عطر – برفان – بتحبوه – طالما كل اللي في البيت من محارمكم طبعًا – شوفوا ايه بيحسن من حالتكم النفسية واعملوه

لو ليكم مصدر دخل ثابت مفيش مانع تجيبوا لنفسكم هدية من وقت للتاني بمبلغ يتناسب مع دخلكم ومع المسئوليات اللي وراكم

7. نوم كويس بالليل:

يا الله قد ايه لما بكون نايمة حلو بكون صاحية فايقة ويومي بيكون أقل توتر ، على عكس لو مش نايمة حلو ، بكون متضايقة وعصبية جدًا وبتوتر من أقل حاجة

النوم فعلًا بيفرق جدا في صحتنا النفسية ، وبيأثر بشكل كبير على حالتنا المزاجية ، وخلي بالكم انا مش بتكلم على أي نوم ، ركزوا على الـ 3 كلمات مع بعض

نوم كويس بالليل

النوم مهم جدًا ، ومهم انه يكون نوم بعمق من غير ازعاج قدر الامكان ، ويكون بالليل والدنيا ضلمة مش نوم النهار واليوم مقلوب

جسمنا بيدرك الفرق بين الليل والنهار ، ونوم الليل بيأثر على حاجات كتيرة جدًا زي المزاج بتاعنا ، نسبة الأيض أو عمليات الحرق البناء اللي بتحصل في جسمنا وحاجات تانية كتيرة

بس كدا ودي كانت كل حاجة لـ بوست النهارده

شاركوني في التعليقات نصيحة بتحسوا انها بتحسن من حالتكم النفسية

.

شكرًا عشان وصلتوا للنقطة دي وإلى اللقاء في بوست جديد

دمتم بخير

*******

يلا نبقى أصدقاء هناك كمان :

Instagram| Facebook | Youtube

اخترت لك :

فيديو : دليلك للعمل الحر وربح المال من المنزل

زيارتي لمعرض الكتاب الدولي 2022 وجولة فيه

ازاي اختار الوان متناسقة للتصاميم بتاعتي بطريقة احترافية