اهلا وسهلا بيكم يا أصدقاء ! في بوست النهارده هحكي لكم على زيارتي لمعرض كتاب القاهرة الدولي في دورته الـ 53 ، كان يوم جميل حبيت احكي لمن عن تجربتي هناك
عن معرض القاهرة الدولي للكتاب:
المعرض السنة دي في مركز المنارة للمعارض في التجمع الخامس ومفتوح للجمهور بدايةً من 27 يناير 2022 حتى 7 فبراير إن شاء الله
من الساعة 10 صباحًا حتى الساعة 10 مساءً ويوم الجمعة من الساعة 1 ظهرًا حتى الساعة 10 مساءً
آخر مرة روحت معرض الكتاب
كان بقالي فترة طويلة جدًا مروحتش معرض الكتاب ، آخر مرة روحت المعرض كنت لسه بدرس في الكلية ، وكان المعرض ساعتها في بيقام في أرض المعارض فـ كان المكان قريب من الكلية فـ عرفت اروحه بسهولة ساعتها
قبل المعرض بيوم
- أول حاجة عملناها قبلها بيوم هى اننا حجزنا التذاكر الخاصة بالمعرض
من الحاجات الجميلة اللي حصلت السنة دي انه بقى في حجز الكتروني لتذاكر الدخول للمعرض ، نقدر نشتريها قبلها ، وشراء التذاكر من الموقع سهل جدًا وبيوفر وقت كتير
تقدروا تشتروا تذاكر المعرض من الموقع الخاص بمعرض الكتاب بكل سهولة
سعر التذكرة 5 جنيه مصري سارية في أي وقت ، يعني لما بتشتروا التذكرة مش بتكون بتاريخ محدد تقدروا تستخدموها في أي وقت طول فترة المعرض
دفع سعر التذكرة أونلاين بيتم من خلال الكريديت كارت أو ميزة أو خدمات كاش
الدخول مجانًا : الأطفال تحت سن 12 سنة، كبار السن، ذوي الهمم ومرافقيهم
ممكن أي شخص يحجز أي عدد من التذاكر بدون حد أقصى أو الاختيار التاني لحجز التذاكر وهو من خلال شباك الحجز على البوابات
فـ سعر تذكرة دخول المعرض جميل جدًا ومناسب حتى لو مش هتشتروا أي حاجة من جوا المعرض واليوم بالنسبة لكم هو مجرد خروجة وتغيير جو فـ هتنبسطوا اوي ان شاء الله
- تاني حاجة عملتها هى تجهيز قايمة المشتريات
كتبت قايمة كدا على الموبايل باسامي كل الكتب اللي عايزة اشتريها ، وكل كتاب تابع لدار نشر ايه وكمان حفظت صورة ع الموبايل لغلاف كل كتاب منهم عشان يبقى شكله مألوف لعيني لما اجي ابحث وادور على الكتاب
الدخول للمعرض
زيارتي للمعرض كانت يوم السبت 29 يناير 2022 ، وصلنا هناك الساعة 10 ونص الصبح تقريبًا
دخول المعرض كان سهل وكان في اهتمام بإن كل الزوار يلبسوا الكمامة وكانوا بيقيسوا درجة الحرارة لكل اللي داخلين المعرض
والتذاكر بتاعتنا كان مكتوب عليها بوابة 3 ، فـ دخلنا من بوابة 3 ، ودي حاجة كويسة اني في اكتر من بوابة فـ ده هيقلل من التكدس والازدحام اثناء الدخول للمعرض
داخل المعرض
لما دخلنا من بوابة 3 كانت أقرب صالة لينا هى صالة 4 ، وده من حسن حظنا
لأن صالة 4 فيها سور الأزبكية وانا كنت عايزة ادور فيها على كتب معينة قبل ما اروح للصالات اللي فيها دور النشر ، فبدأنا جولتنا في صالات معرض الكتاب
صالة 4
كمان صالة 4 فيها جناح الأزهر الشريف ، وفيها دور نشر جميلة جدًا لكتب وقصص الأطفال زي دار الفتح ودار الحسام للنشر والتوزيع
في كام كتاب عجبوني في سور الأزبكية بس مشترتش منهم حاجة لأنهم كانوا محتاجين اني افاصل في سعرهم فـ مشترتش حاجة من هناك
واشترينا بس مجلات تبع ناشونال جيوجرافيك ، سعر الواحدة منهم كان 10 جنيه
صالة 5
بعد كدا روحنا صالة 5 ، وصالة 5 دي تعتبر للأطفال بس تقريبًا ، فيها مكان مخصص لأنشطة الأطفال بيحكوا فيه قصص للأطفال
صالة 5 فيها دور نشر كتيرة جدا للأطفال زي دار الفاروق للنشر اللي فيها سلسلة قصص شعوري بـ ، من اجمل القصص المناسبة للأطفال في سن سنتين فيما فوق وبتعرفهم ازاي يوصفوا احساسهم ويتعرفوا على مشاعرهم المختلفة زي الغيرة الحب الاصرار الخوف وغيره
ومن الحاجات اللي عجبتني في دار الفاروق انهم ادوني الحاجات اللي اشتريتها في شنطة أو كيس قماش مش بلاستيك
صالة 5 فيها العاب تعليمية للأطفال وقصص تلوين وحاجات تانية كتيرة جدًا بأفضل الاسعار مقارنةً بباقي الصالات
بعدها الظهر كان أذن فـ روحنا صلينا الظهر والحمدلله كان في مصلى للسيدات ومصلى للرجال والمصلى كان كويس
صالة 3
بعد كدا روحنا صالة 3 ، صالة 3 فيها دور النشر الخاصة بكل دولة ، يعني فيها ركن لدولة اليابان ، فيها مجسمات عن التراث الياباني زي الأكل الياباني
وفيها دور نشر تابعة للدول العربية زي دار نشر جرير ، ودار نشر العبيكان السعودية
صالة 2
من احسن الحاجات اللي في صالة2 هى دار نهضة مصر ، دار نهضة مصر اللي في صالة 3 اسعارها رائعة بجد ، فيها حاجات قيمة جدًا والاسعار فيها تبدأ من 5 جنيه
في كمان فيها حاجات للتلوين سعرها أقل من 4 جنيه ، تقريبا كان 3 جنية و60 قرش
من الحاجات القيمة هناك الكتاب بتاع لماذا الجزء 1 والجزء 2 وكيف التابعة لناشونال جيوجرافيك
الكتاب فيه اجابة عن الاسئلة اللي بتثير فضول الاطفال زي:
- لماذا تطير المناطيد؟
- لماذا يرتدي بعض الناس نظارة ؟
- لماذا تنمو البذور ؟
- كيف تبتلع المكنسة الكهربائية الأتربة ؟
- كيف تحافظ الثلاجة على الطعام باردًا ؟
- لماذا لا تشعر البطاريق بالبرد؟
- لماذا تطير الطائرات ؟
واسئلة تانية كتيرة ، الكتب دي مناسبة للأطفال فوق الـ 7 سنوات أو الاطفال في أي عمر اللي بدأوا يسألوا الاسئلة دي لأهلهم
سعر الكتاب الواحد من دول في العادي 90 جنيه ، سعره في نهضة مصر 55 جنيه
الناس اللي بتشتغل في نهضة مصر قاعة 2 كانوا متعاونين جدًا وكانوا بيساعدونا وبيقولوا اقتراحاتهم تبعًا لسن الطفل وبيرشحوا ايه المناسب له
صالة 1
صالة 1 في معرض الكتاب فيها دور نشر مهمة زي دار الشروق للنشر ، دار المحروسة للنشر ، دار دوّن للنشر ودار نهضة مصر بردو مرة تانية بس مختلفة عن اللي في قاعة 2 تمامًا
اشتريت بعض الكتب من دار دوٍّن وهكلمكم عليهم بعد شوية
الخدمات والمرافق في معرض القاهرة الدولي للكتاب:
المعرض كان فيه خدمات ومرافق كويسة ، ونقدر نقول كويسة جدا جدا مقارنةً بـ لما كان المعرض في أرض المعارض ، اقدر اقول ان الخدمات والمرافق دلوقتي بقت احترافية اكتر ومستواها أعلى
الصلاة في المعرض
كان في اكتر من مصلى في المعرض للسيدات والرجال ، والمصلى كان كويس الحمدلله
الأكل في معرض الكتاب
في مساحة كبيرة جدًا في المعرض عبارة عن Food court
فيها مطاعم كتيرة جدًا ومناسبة لكل الفئات زي :
- ارابياتا
- كشري سيد حنفي
- ماكدونالز
- سيتي كريب
- محل للاكل السوري مش فاكرة اسمه
ومحلات وكافيهات تانية كتيرة جدًا وفي ترابيزات وكراسي للقعدة قدام كل كافيه ومطعم
الحمام:
في هناك اكتر من حمام ، والحمام نضيف وكويس
اشتريت ايه لنفسي من معرض الكتاب ؟
+اشتريت 4 كتب من دار دوٍّن ، كتابين منهم كان سعرهم 50 جنيه وكتابين كان سعرهم 65 جنيه ، وصديقتي اشترت كتابين كمان واشتريناهم في فاتورة واحدة مع بعض واخدنا من هناك 2 نوت بوك صغيرة هدية
الكتب اللي اشتريتها :
- وصفة قائمة المهام لـ ديمون زهاريادس – To Do List Formula
- صباح استثنائي كل يوم لـ ديمون زهاريادس
- علم اقتناء الثروة لـ والاس دي.. واتلز
- كيف تعيش كل ساعة في يومك كما ينبغي لـ أرنولد بينيت
كمان اشتريت من معرض الكتاب 3 بوك مارك book mark
سعرهم كان 5 جنيه
واخدت 2 بوك مارك من المعرض كدعاية ، بصراحة البوك مارك الدعاية اللي اخدتهم خامتهم اقوى واحسن من اللي اشتريتهم عشان كدا بستخدمهم بردو
اخدت ايه معايا ؟
في المعرض كان معايا شنطة باك – اللي بتتشال على الضهر – افضل بكتير من شنط الخروج اللي بتتشال على الكتف وعملية اكتر
كمان كان معايا شنطة قماش اجمع فيها الحاجات اللي اشتريتها بدل ما امشي بأكياس كتيرة
في ناس طبعًا هناك معاها شنطة سفر بعجل ، بس غالبًا الناس دي بتشتري من المعرض كتب ومراجع حجمها كبير جدًا ، أو بيكونوا ساكنين بره القاهرة وهيسافروا مسافة عشان يرجعوا بيتهم في مدن تانية بعيدة عن القاهرة
كان معايا في شنطتي محفظتي ، موبايلي ، مناديل ، معقم جل لليدين ، سجادة صلاة لأني مكنتش عارفة المصلى كان هيبقى عامل ازاي هناك ، وفي اوضاع كورونا الحالية بفضل اني السجادة في المصلى بردو
مأخدتش معايا ماية ، واشتريت ماية هناك من ارابياتا ، سعر الازازة الصغيرة تقريبًا كان 5 جنيه ، سعرها كان كويس بالنسبة لي
حاجات ساعدتني :
في كذا حاجة حسيتها سهلت عليا اليوم من ضمنها :
- ان قبل المعرض عرفت جروب على الفيسبوك اسمه زغلول يقرأ ، الجروب فيه معلومات مفيدة جدًا عن المعرض وخصوصًا لو عايزين تشتروا قصص للأطفال ، كمان في دور نشر كتيرة في المعرض بتقدم خصومات لأعضاء جروب زغلول يقرأ
- اننا حجزنا التذاكر ده سهل علينا كتير جدًا
- اني كنت كاتبة انا عايزة اشتري ايه ، حتى لو في حاجات ملقيتهاش بس على الأقل احسن من اني بعد ما ارجع البيت اقول يا ريتني كنت اشتريت كذا او دورت على كذا في المعرض
- اني اخدت شنطة باك كانت عملية جدًا ومش لخمة في المعرض
الخلاصة :
- لو هتروحوا معرض الكتاب البسوا هدوم تقيلة لأن الجو برد اوي هناك وخدوا شنطة عملية
- احجزوا التذاكر قبلها اونلاين وروحوا بدري قدر المستطاع
- جهزوا قايمة بالحاجات اللي عايزين تشتروها
- لو عايزين تشتروا قصص وكتب للأطفال فأفضل الصالات هى صالة 4 و5 ، ودار نهضة مصر اللي في صالة 2
بس كدا ، دي كانت كل حاجة عن زيارتي لمعرض الكتاب ، بالنسبة لي كانت خروجة حلوة وتغيير جو الحمدلله
لو روحتوا معرض الكتاب متنسوش تحكوا لي عن تجربتكم في التعليقات ، ولو انتم مش من مصر وعندكم معرض كتاب أو حاجة شبه كدا احكوا لنا في التعليقات بردو وشاركونا تجاربكم وبتشتروا كتب منين
ودمتم بألف صحة وخير
.
شكرًا عشان وصلتوا للنقطة دي وإلى اللقاء في بوست جديد
***
يلا نبقى أصدقاء هناك كمان :
***
اخترت لك :
