روتين ترتيب البيت

بيت مرتب ونظيف دايما بأقل وقت ومجهود – روتين واقعي أثناء العمل من المنزل

طول عمري انسانة فوضوية وابعد ما يكون عن الترتيب التنظيم و التنظيف ، في البداية كان الموضوع مش بيسبب لي أي مشكلة ، وكنت بقدر اتعايش والبيت حواليا مكركب والموضوع مكنش بيأثر عليا بالسلب ، لحد لما بدأت اشتغل من البيت ، ولقيت اني مش بقدر انجز كويس والدنيا حواليا مكركبة وشم نضيفة ، لقيت ان لما يكون المكان حواليا رايق ومنظم بعرف اركز في شغلي اكتر وبعرف ارتب افكاري وبقيت بعرف انجز اكتر

المشكلة ان انا شخص ابعد كا يكون عن التنظيم ، فـ هنا كانت المعضلة اني الاقي حل ونظام مناسب ليا لـ ترتيب وتنظيم البيت والحفاظ عليه نضيف اغلب الوقت

عارفين احساس السكتة القلبية لما تعرفوا ان في ضيف هيجي بيتكم دلوقتي ؟

احساس دايما كنت بحس بيه لما حد يجي لي زيارة مفاجأة ، واطلع اجري في البيت كله مش عارفة ارتب ايه ولا انضف ايه ، الحق انقذ مين ولا مين

إحساس الارهاق الشديد وان ورايا شغل كتير اوي عشان تنضيفة العيد ، الاحساس ده كان دايما ملازمني قبل كل عيد ، وجملة يا سلام لو البيت يفضل نضيف كدا طول السنة دايما كنت برددها بعد ما اخلص تنضيفة العيد

آجي الاسبوع اللي قبل العيد الاقي البيت يضرب يقلب ، ومحتاج تنضيف وترتيب ، اقضي الاسبوع كله في ترتيب وتنضيف البيت ، طبعًا بيكون احساس جميل جدا لما العيد يدخل علينا والبيت رايق ومرتب

لكن بيكون مجهود كبير جدًا ووقت كتير وروتين حياة بيتغير لمدة اسبوع بحيث مبقاش بعمل حاجة غير اني بنضف وبرتب البيت

أنظمة ترتيب وتنظيف للبيت جربتها

جربت امشي على اكتر من روتين أو جدول لـ ترتيب وتنضيف البيت :

  • جربت اني اقسم الشقة على الاسبوع كل يوم مكان اروقه ، منجحش معايا بالنسبة لي اني انضف وارتب كل يوم حاجة مملة ومرهقة جدًا فـ مكنتش بلتزم بالجدول اللي بحطه
  • جربت اني اخلي يوم في الاسبوع اكنس وامسح فيه الشقة كلها لكن الموضوع كان مرهق ومجهود كبير اوي بالنسبة لي وطبعًا النتيجة اني كنت بكسل بردو ومش بمشي على النظام ده
  • جربت اني في نهاية الاسبوع – الويك اند – اروق وارتب البيت كله لكن الطريقة دي بردو فشلت معايا ، لأني بحس الويك اند دي للراحة ، والاسترخاء من تعب الاسبوع ، فـ اني اقضيها في الترويق والتنضيف = خطة غير واقعية بالمرة

بعد فشل كل الانظمة دي وصلت للنظام أو الروتين اللي ريحني وقدرت التزم بيه ، ولقيته مناسب لأسلوب حياتي

الناس انواع مختلفة ، في ناس بالنسبة لها التنضيف والترتيب حاجة ممتعة ومعندهمش مشكلة يرتبوا وينظموا كل يوم ، انا بقى النوع التاني ، اللي عايزة اقضي اقل وقت ممكن في ترويق وترتيب وتنظيف البيت بس في نفس الوقت عايزة البيت يبقى رايق ونضيف

عشان كدا وصلت للنظام أو الروتين المناسب للناس المشغولة ، اللي وقتهم ضيق ، أو اللي مش عايزين يقضوا كل يوم في حياتهم بينضفوا

وهقولكم على الخطوات بتاعت الروتين ده دلوقتي حالًا بشكل عام وهقولكم انا بطبقها ازاي بالظبط عشان لو حابين تعملوا زيي

ترتيب وتنظيم وتنظيف البيت

نظام و روتين لـ ترتيب وتنظيم وتنظيف البيت

  • أول خطوة هى انكم هتقسموا الشقة أو البيت اللي عايشين فيه لأربع أقسام

بالنسبة لي قسمته كالتالي:

القسم 1 : غرفة المعيشة والطرقة

القسم 2 : غرف النوم

القسم 3 : الريسبشن – الصالة وبلكونتها

القسم 4 : الحمام والمطبخ

  • النظام بتاعنا هيمشي بالأسابيع ، كل شهر عبارة عن أربع أسابيع

الأسبوع بتاعي بيبدأ يوم الأحد وينتهي يوم السبت ، هنخلي كل أسبوع خاص بقسم معين من البيت

التقسيمة اللي بستخدمها :

الأسبوع الأول : ترتيب وتنظيف القسم 1 – غرفة المعيشة والطرقة

الأسبوع الثاني : ترتيب وتنظيف القسم 2 – غرف النوم

الأسبوع الثالث : ترتيب وتنظيف القسم 3 – الريسبشن – الصالة –

الأسبوع الرابع : ترتيب وتنظيف القسم 4 – غرفة المطبخ والحمام

  • رابع خطوة هى تنفيذ الخطة

أي قسم من دول فيه بلكونته بتتنضف معاه ، وخلال الأسبوع بركز على ترتيب وتنضيف القسم ده بشكل عميق

ممكن كل يوم في الاسبوع اختار مهمة يعني يوم ارتب يوم اكنس وامسح أو ممكن في يوم واحد ادخل في مود الترويق واحاول انجز كل الخطوات مرة واحدة

أي قسم بيكون عليه الدور اللي بعمله فيه

  • تلميع الشبابيك
  • لو في بلكونة بنضفها واكنسها وامسحها
  • ارتب المكان
  • المع أي أسطح ، خشبية أو زجاجية
  • اكنس المكان
  • امسح المكان
  • على حسب الوقت أو الموسم ممكن اعمل حاجة اضافية زي اني ارتب الادراج أو اماكن التخزين واروقها ، اطلع كل اللي فيها وافرزه من أول وجديد
  • لو مثلا وقت تبديل الفصول وده أسبوع غرف النوم فـ هشيل الشتوي وانزل الهدوم الصيفي وهكذا

ميزة النظام ده انه هيحسسك ان كل أسبوع عندك عيد ، لأنك بترتبي المكان وتنضفيه بشكل عميق ، بس مش بتحسي انك بذلتي مجهود كبير لأنك في مساحة صغيرة أو مركزة على جزء معين من البيت ، لكن بتحسي باحساس جميل جدًا بعد ما تخلصي لأنك بتكوني نضفتي المكان بعمق زي اجواء العيد

مثلًا في أسبوع الريسبشن فتحت أدراج البوفيه وروقتها وخليت فيها الحاجات اللي بنستخدمها دايمًا وفي حاجات كتيرة رميتها وتخلصت منها وحاجات خزنتها في أماكن تانية

في أسبوع ترتيب وتنظيف غرف النوم ، حاولت اغلب كسلي لأني كنت مكسلة اشيل زينة رمضان ، وكان رمضان والعيد خلصوا من زمن ، فـ لقيتها فرصة حلوة واتشجعت وفتحت سحارة السرير وشيلت فيها كل زينة رمضان ، ربنا يبلغنا رمضان الجاي ع خير يا رب

ممكن كل 6 شهور نغسل الستاير ، وبدل ما نحس اننا ورانا كل ستاير البيت نفكها ونغسلها ونرجع نعلقها ، لآ يبقى كل اسبوع خاص بقسم معين من البيت ، وفي الاسبوع ده هنغسل الستاير الخاصة بالجزء ده في البيت ، يعني كل اسبوع هنغسل ستارة أو اتنين بس بدل ما نغسل ستاير البيت كله في اسبوع واحد

بالنسبة لي بحب اغسل الستاير كل 6 شهور ، وبحب امشيهم بالهجري ، اغسلهم مرة في رمضان ، عشان على العيد ان شاء الله الستاير تبقى نضيفة ، ومرة في شهر ربيع أول ، بعد رمضان بـ 6 شهور

تنظيف البيت و العمل من المنزل

التعديل على النظام

طبعًا النظام قابل للتعديل حسب مساحة بيتكم وحسب كل جزء في بيتكم بيحتاج مجهود قد ايه

  • يعني في البداية كان المطبخ والصالة – الريسبشن – قسم واحد فـ لما جربت الموضوع لقيته مرهق فـ خليت الريسبشن في أسبوع لوحده ، والمطبخ في الاسبوع اللي بعده
  • لو البيت بتاعكم بيتكركب بسرعة أو عندكم وقت أكبر للترتيب والتنظيف ، يبقى ممكن تخلوا كل قسمين في أسبوع ، بحيث البيت كله يكون اتنضف واترتب بعمق خلال أسبوعين ، وكل شهر البيت بيتنضف بعمق ويتنظم مرتين
بيت نظيف ومرتب بأقل وقت ومجهود

نصائح لينجح هذا النظام والروتين

  • منع التشتت ، عشان نمنع التشتت نحالو نركز في الأسبوع على القسم الخاص بيه ، لو في حاجة عايزة تتنضف في قسم تاني من البيت ممكن نكتبها في نوت على الموبايل أو في قائمة المهام ، بحيث نبقى مطمنين اننا مش هننساها ان شاء الله
  • مش معنى اننا هنخلي كل جزء من البيت في أسبوع يبقى اننا نهمل باقي البيت تمامًا ، لأ طبعًا ، خلال يومنا نحاول نرجع أي حاجة نستخدمها مكانها ، ونحاول نحافظ على الاسطخ مترتبة دايمًا ورايقة قدر الامكان
  • نجيب ورقة في بداية كل شهر ونقسمها أربع اقسام ، كل قسم خاص بأسبوع من الاسابيع الاربعة ، وفي كل قسم هنكتب أي مهمة عايزين نعملها خاصة بالقسم ده ، مثلا أسبوع المطبخ الشهر ده عايزة ارتب درج التوابل وانضف البرطمانات كويس ان شاء الله ، وعايزة ارتب المنظفات اللي تحت الحوض وهكذا

وبس كدا دي كانت كل حاجة لبوست النهارده ، لو عندكم نصايح أو طرق تانية بتساعدكم في ترتيب البيت اكتبوها لنا في التعليقات وخلينا كلنا نستفيد

.

شكرًا عشان وصلتوا للنقطة دي وإلى اللقاء في بوست جديد

ودمتم بألف خير

يلا نبقى أصدقاء هناك كمان :

InstagramFacebook | Youtube

اخترت لك :

نصائح للأمهات للعمل من المنزل

أفكار للعمل من المنزل مناسبة للطلاب

فيديو : أسرار نجاح قناتي على يوتيوب في فترة قصيرة

error

Enjoy this blog? Please spread the word :)